MATEYUS 19:16-30 MARKUS 10:17-31 LUKAS 18:18-30

  • WAN GUDU MAN E AKSI FA A KAN KISI TÊGO LIBI

Yesus de na pasi fu go na Yerusalem, ma a de na ini Perea ete. Wan gudu yongu man e lon kon miti en èn a e saka kindi na en fesi. A man disi na „wan tiriman”. Kande Bijbel e kari a man disi wan tiriman fu di a de wan fesiman fu wan snoga noso wan memre fu a Grankrutu fu den Dyu. A e aksi Yesus: „Bun Leriman, san mi musu du fu kisi têgo libi?”​—Lukas 8:41; 18:18; 24:20.

Yesus e piki en: „Fu san ede yu e taki dati mi bun? Nowan sma bun. A wan-enkri sma di bun, na Gado” (Lukas 18:19). Den Fariseiman ben abi a gwenti fu kari sma „bun”, soso fu gi den grani. A kan taki a yongu man disi teki a gwenti disi abra èn dati meki a kari Yesus „Bun Leriman”. A tru taki Yesus sabi gi leri, ma toku a e taigi en taki na Gado wawan den musu kari „bun”.

Yesus e gi a man a rai disi: „Ma efu yu wani kisi libi, dan du ala ten san den komando taki.” Dati meki a yongu man e aksi Yesus: „Sortuwan fu den komando?” Yesus e kari feifi fu den Tin Komando. A taigi a man taki a no musu kiri sma, a no musu du sutadu, a no musu fufuru, a no musu lei gi sma èn a musu lespeki en papa nanga en mama. Baka dati a e taki fu wan moro prenspari wet: „Yu musu lobi tra sma leki fa yu lobi yusrefi.”​—Mateyus 19:17-19.

A man e taigi Yesus: „Mi e du ala den sani disi. Ma san mi musu du ete?” (Mateyus 19:20) Kande a e denki taki a o man kisi têgo libi te a du wan kefalek sani fu yepi sma. Yesus e si taki a man e aksi en a sani disi nanga wan krin ati. Dati meki Yesus „kon lobi en” (Markus 10:21). Ma wan sani e hori a man disi na baka.

A man lobi den gudu fu en tumusi. Dati meki Yesus e taigi en: „Wan sani de ete di yu no e du: Go seri den sani di yu abi èn prati a moni gi den pôti sma, dan yu sa kisi wan gudu na hemel. Kon, tron wan bakaman fu mi.” Iya, a man kan gi en  moni na den pôtiwan di no man pai en baka èn a kan tron wan disipel fu Yesus. Na presi fu dati, a man e opo drai gowe nanga bigi sari. Fu di a man lobi den „furu gudu” di a abi, meki a no man si taki a kan kisi wan moro bigi gudu (Markus 10:21, 22). Yesus e taki: „Gi den sma di abi moni, a o muilek trutru fu go na ini a Kownukondre fu Gado!”​—Lukas 18:24.

Den disipel e fruwondru fu a sani disi di Yesus taigi den èn fu a sani di a o taigi den now. A e taki: „A moro makriki gi wan kameili fu pasa na ini wan nanai-olo, leki gi wan guduman fu go na ini a Kownukondre fu Gado.” Dati meki den disipel e aksi en: „Suma man kisi frulusu?” A de so taki a muilek so te fu kisi frulusu, taki nowan sma man kisi frulusu? Yesus e luku den langalanga ini den ai, dan a e piki den: „Den sani di libisma no man du, na dati Gado man du.”​—Lukas 18:25-27.

Petrus e sori taki en nanga den tra apostel teki wan tra bosroiti leki a gudu man. A e taki: „Wi gowe libi ala sani èn wi kon waka na yu baka. San wi o kisi dan?” Yesus e sori den a bakapisi fu a bun bosroiti di den teki. A e taki: „Te sani meki kon nyun baka èn a Manpikin fu libisma sidon na tapu en gran kownusturu, dan unu di waka na mi baka o sidon tu na tapu twarfu kownusturu fu krutu den twarfu lo fu Israel.”​—Mateyus 19:27, 28.

A de krin taki Yesus e taki fu a ten te grontapu o kon de neleki a dyari fu Eden. A blesi di Petrus nanga den tra disipel o kisi, na taki den o tiri grontapu makandra nanga Yesus. A no de fu taki dati a blesi disi bigi moro iniwan sani di den o libi na baka!

Ma a no soso na ini a ten di e kon den o kisi blesi. Den disipel fu en e kisi wan tu blesi nownow kaba. Yesus e taki: „Ibri sma di gowe libi en oso, en wefi, en brada, en papa nanga mama, noso en pikin fu a Kownukondre fu Gado ede, o kisi moro leki dati na ini a ten disi. Ma na ini a ten di e kon a o kisi têgo libi.”​—Lukas 18:29, 30.

Iya, awinsi pe den disipel e go, den tra bakaman fu Yesus o lobi den trutru, neleki brada nanga sisa. Den o lobi den moro den eigi famiri srefi. Ma soleki fa a sori, dan a gudu yongu tiriman no o kisi a blesi disi èn a no o kisi a grani fu libi na ini a hemel Kownukondre fu Gado. Disi na wan sari sani trutru.

Yesus e taki tu: „Ma furu sma di de den fosiwan o de den lastiwan, èn den lastiwan o de den fosiwan” (Mateyus 19:30). San dati wani taki?

A gudu yongu tiriman na wan fu den „fosiwan”, fu di a de wan fesiman fu den Dyu. Fu di a e hori ensrefi na den wet fu Gado, meki a ben o man du furu leki wan disipel fu Yesus èn sma ben kan fruwakti furu fu en. Ma den gudu fu en prenspari gi en moro ala tra sani na ini a libi. Ma a pipel de heri tra fasi. Den e si taki Yesus e leri den tru tori fu Gado èn den e si taki den kan kisi libi te den e du san a leri den. Te yu luku en bun, dan den ben de den „lastiwan”, ma now den e tron den „fosiwan”. Den sma disi kan abi a howpu fu sidon na tapu kownusturu na ini hemel makandra nanga Yesus èn fu tiri a grontapu di o de wan paradijs.