Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 90

„Mi na a opobaka nanga a libi”

„Mi na a opobaka nanga a libi”

YOHANES 11:17-37

  • YESUS E DORO TE LASARUS DEDE KABA

  • „MI NA A OPOBAKA NANGA A LIBI”

Baka te Yesus gowe libi Perea, a e doro na den boitipresi fu Betania. Disi na wan dorpu di de sowan 3 kilometer na a owstusei fu Yerusalem. Maria nanga Marta, den sisa fu Lasarus, e sari fu di Lasarus dede no so langa pasa. Furu sma kon fu trowstu den.

Te wan sma e taigi Marta taki Yesus e kon, a e lon go miti en. A e taigi Yesus san en nanga en sisa e prakseri fo dei kaba. A e taki: „Masra, efu yu ben de dya, mi brada no ben o dede.” Ma disi no wani taki dati Marta no abi howpu. A e taki: „Ma mi e bribi taki Gado o gi yu ala san yu e aksi en” (Yohanes 11:21, 22). A e denki kande taki Yesus man yepi en brada ete.

Yesus e piki en: „Yu brada o kon na libi baka.” Marta e denki taki Yesus e taki fu a ten te sma o kisi wan opobaka na grontapu. Na a howpu disi Abraham nanga tra futuboi fu Gado ben abi. Marta e sori taki a e bribi taki a sani disi o pasa trutru. A e taki: „Mi sabi taki a o kon na libi baka te na opobaka o de na a lasti dei.”​—Yohanes 11:23, 24.

Ma yu denki taki Yesus kan lusu a problema disi nownow kaba? Yesus e memre Marta taki Gado gi en a krakti fu wiki dedesma. A e taigi en: „A sma di e bribi na ini mi, sa kon na libi baka, awansi a dede. A sma di e libi èn di e bribi na ini mi, no sa dede noiti.”​—Yohanes 11:25, 26.

Yesus no e taki dati den disipel fu en di de na libi na a ten dati no o dede noiti. Yesus srefi musu dede, soleki fa a taigi den apostel fu en (Mateyus 16:21; 17:22, 23). Yesus e sori krin taki te den e bribi na ini en, den kan kisi têgo libi. Furu sma o kisi a libi dati, baka te den kisi wan opobaka. Ma efu wan futuboi fu Gado de na libi te a grontapu disi o kisi pori, dan kande a no sa dede noiti. Awinsi fa a no fa, ala sma di e bribi na ini Yesus kan de seiker taki dede no o abi krakti na den tapu fu ala ten.

Didyonsro Yesus taki: „Mi na a opobaka nanga a libi.” Ma a kan yepi Lasarus ete, now di a dede omeni dei kaba? Yesus e aksi Marta: „Yu e bribi disi?” Marta e piki en: „Iya, mi Masra. Mi e bribi taki yu na a Krestes, a Manpikin fu Gado, a wan di ben o kon na grontapu.” Fu di Marta e bribi taki Yesus kan yepi den a srefi dei dati, meki a e lon go na oso, dan a e taigi en sisa sondro fu meki tra sma yere: „A Leriman de dyaso èn a e kari yu” (Yohanes 11:25-28). Te Maria yere disi, a e gowe libi na oso wantewante. Heri esi tra sma e waka na en baka fu di den e denki taki a e go na a grebi fu Lasarus.

Ma Maria e go na Yesus. A e saka kindi na en futusei aladi a e krei. A e taki a srefi sani di en sisa ben taigi Yesus: „Masra, efu yu ben dya, mi brada no ben o dede.” Te Yesus e si Maria nanga den tra sma e krei, a e geme, a e sari èn a e bigin krei srefi. Disi e naki na ati fu den sma drape. Ma son sma e taki: ’Efu Yesus ben kan dresi wan man di ben breni sensi a gebore, dan fu san ede a no ben kan du wan sani, so taki Lasarus no dede?’​—Yohanes 11:32, 37.