Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 91

Lasarus e kisi wan opobaka

Lasarus e kisi wan opobaka

YOHANES 11:38-54

  • LASARUS E KISI WAN OPOBAKA

  • A GRANKRUTU FU DEN DYU E BOSROITI FU KIRI YESUS

Baka te Yesus miti Marta nanga Maria na ini Betania, den e go na a grebi fu Lasarus. A grebi disi na wan bergi-olo di tapu nanga wan ston. Yesus e taigi den sma: „Un puru a ston.” Marta e broko en ede fu di a no sabi san Yesus wani du. A e taki: „Masra, now a musu e smeri, bika a dede fo dei kaba.” Ma Yesus e taigi en: „Mi no ben taigi yu taki yu o si a glori fu Gado te yu e bribi?”​—Yohanes 11:39, 40.

Dati meki den sma e puru a ston. Yesus e luku go na loktu, dan a e begi: „Mi Tata, mi e taki yu tangi taki yu arki a begi fu mi. Mi sabi heri bun taki yu e arki mi ala ten. Ma fu meki den sma di e tanapu dyaso bribi taki na yu seni mi kon, meki mi taki nanga yu.” Yesus e  begi pe ala sma de fu di a wani meki den sabi taki na Gado gi en a krakti fu du a sani di a o du now. Dan Yesus e bari nanga wan tranga sten: „Lasarus, kon na doro!” Lasarus e kon na doro. En futu nanga anu domru nanga duku èn en fesi tai nanga wan krosi. Yesus e taigi den sma: „Lusu en meki a gowe.”​—Yohanes 11:41-44.

Furu fu den Dyu di kon fu trowstu Maria nanga Marta e si a wondru disi èn den e bigin bribi na ini Yesus. Ma trawan e go taigi den Fariseiman san Yesus du. Den Fariseiman nanga den edeman fu den priester fu a Grankrutu fu den Dyu e hori wan konmakandra. Wan fu den man di de drape, na Granpriester Kayafas. Sonwan fu den Fariseiman e krutu: „A man disi e du someni wondru. San wi musu du? Efu wi meki a go doro na a fasi disi, dan ala sma o bribi na ini en. Dan den Romesma o kon puru wi tempel nanga wi pipel fu dya” (Yohanes 11:47, 48). Aladi sma fruteri den Fariseiman fu den „someni wondru” di Yesus du, toku den no e prisiri nanga den sani di Gado e du nanga yepi fu Yesus. Den e broko den ede soso nanga a posisi nanga a makti fu den.

Na opobaka fu Lasarus meki den Saduseiman kisi syen fu di den no e bribi na ini na opobaka. Kayafas, di de wan Saduseiman, e opo taki now. A e taki: „Unu no sabi noti. Unu no e si taki a ben o bun gi unu efu wán man e dede gi a pipel, na presi taki a heri kondre lasi gowe?”​—Yohanes 11:49, 50; Tori 5:17; 23:8.

Kayafas wani sori den taki Yesus musu dede, so taki den Dyu kerki fesiman no lasi a posisi nanga a makti di den abi. Ma Kayafas „no taki den sani disi fu ensrefi”. Na Gado meki a taki a sani disi, fu di en na a granpriester, a sma di musu leri a pipel sani fu Gado. A sani di Kayafas taki na wan profeititori di e sori taki a dede fu Yesus na wan lusu-paiman. A no o de wan lusu-paiman gi den Dyu wawan, ma sosrefi gi ala „den pikin fu Gado di panya na ala sei”.​—Yohanes 11:51, 52.

Den sani di Kayafas taki meki taki a Grankrutu fu den Dyu bosroiti fu kiri Yesus. Wi no sabi efu Nikodeimus, di de wan memre fu a Grankrutu èn di no e denki takru fu Yesus, fruteri Yesus san den wani du. Awinsi fa a no fa, Yesus e gowe libi a kontren fu Yerusalem wantewante. Na so den no kan kiri en fosi a ten fu Gado doro.