Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 93

A manpikin fu libisma o sori ensrefi

A manpikin fu libisma o sori ensrefi

LUKAS 17:20-37

  • A KOWNUKONDRE FU GADO DE NA DEN MINDRI

  • FA A O DE TE YESUS O SORI ENSREFI?

Kande Yesus de ete na ini Samaria noso na ini Galilea. Now den Fariseiman e aksi en o ten a Kownukondre o kon fu di den e fruwakti taki a o kon nanga wan lo pranpran nanga opo-opo. Ma Yesus e taki: „A Kownukondre fu Gado no o kon na so wan aparti fasi taki sma o si en krinkrin. Sma no o taki tu: ’Luku dya!’, noso: ’Luku drape!’ Bika a Kownukondre fu Gado de na un mindri.”​—Lukas 17:20, 21.

Kande son sma e denki taki Yesus wani sori den taki a Kownukondre e tiri na ini na ati fu den futuboi fu Gado. Ma a de krin taki dati no tru, fu di a Kownukondre no de na ini na ati fu den Fariseiman di Yesus e taki nanga den. Toku a Kownukondre de na den mindri fu di Yesus, a sma di Gado o poti leki Kownu fu a Kownukondre, de leti drape na den mindri.​—Mateyus 21:5.

A kan taki baka te den Fariseiman gowe, Yesus e fruteri den disipel tra sani di abi fu du nanga a Kownukondre di o kon. Fosi a taki fu a ten te a o tiri leki Kownu fu a Kownukondre, a e gi den a warskow disi: „Wan ten o kon taki unu o angri fu si wan fu den dei fu a Manpikin fu libisma, ma unu no o si en” (Lukas 17:22). Nanga den wortu disi Yesus e sori den disipel taki a Manpikin fu libisma o tiri na ini a Kownukondre na ini a ten di e kon. Sonwan fu den disipel o angri fu si a ten dati, ma den o abi fu wakti teleki a ten doro te Gado o meki a Manpikin fu libisma kon.

Yesus e taki moro fara: „Sma o taigi unu: ’Luku drape!’, noso: ’Luku dya!’ Ma un no musu go èn un no musu waka na den baka. Bika neleki fa faya e koti fu a wan sei fu hemel te go miti a tra sei, na so a o de tu nanga a Manpikin fu libisma” (Lukas 17:23, 24). San o yepi den disipel fu Yesus fu no waka baka sma di e du leki den na a Mesias? Yesus e taki dati a kon di a tru Mesias o kon, o de leki faya di e koti na loktu èn di sma na ala sei man si. Ala sma di de na ai na a ten dati, o si krin taki a kon leki Kownu fu a Kownukondre.

Baka dati Yesus e taki fu sani di pasa na ini owruten, fu sori fa sma o tyari densrefi te a o kon leki Kownu. A e taki: „Neleki fa a ben de na ini a ten fu Noa, na so a o de tu na ini a ten fu a Manpikin fu libisma . . . Na so a ben de tu na ini a ten fu Lot: Den ben e nyan, den ben e dringi, den ben e bai sani, den ben e seri sani, den ben e prani gron, èn den ben e bow oso. Ma a dei di Lot komoto na Sodom, faya nanga ston di ben e bron fadon komoto fu hemel èn a kiri den alamala. Na so a o de tu na a dei te a Manpikin fu libisma o sori ensrefi.”​—Lukas 17:26-30.

Yesus no e taki dati den sma na ini a ten fu Noa nanga Lot kisi pori fu di den ben e du aladei sani, soleki nyan, dringi, bai sani, seri sani, prani gron èn bow oso. Noa, Lot nanga den famiri fu den ben e du sonwan fu den sani disi tu.  Ma den tra sma ben e du den sani disi sondro fu poti prakseri na a wani fu Gado èn den no ben e prakseri na ini sortu ten den ben e libi. Sobun, Yesus e gi den disipel a rai fu poti prakseri na a wani fu Gado èn fu du a wani dati fayafaya. Na so a e sori den fa den kan tan na libi te Gado o pori a grontapu disi na ini a ten di e kon.

Den disipel o abi fu luku bun taki sani fu a grontapu noso ’sani di den libi na baka’ no puru den prakseri. Yesus e taki: „Na a dei dati, a sma di de na tapu a daki fu na oso èn di abi gudu na ini en oso, no musu saka go na gron fu teki den gudu disi. A sma di e wroko na en gron, no musu go na oso baka fu teki den sani di a ben libi na baka. Un memre a wefi fu Lot” (Lukas 17:31, 32). A tron wan pilari fu sowtu.

Yesus e fruteri go doro fa a situwâsi o de te a Manpikin fu libisma o tiri leki Kownu. A e taigi den disipel fu en: „Na a neti dati, tu sma o de na tapu wán bedi. Gado o tyari a wan gowe, ma a o libi a trawan na baka” (Lukas 17:34). Disi wani taki dati son sma o kisi frulusu, ma trawan o tan na baka. Sobun, den o lasi den libi.

Den disipel e aksi Yesus: „Masra, pe dati o de?” Yesus e piki den: „Pe wan dedeskin de, na drape den aka o kon tu” (Lukas 17:37). Den disipel di o kisi frulusu o de leki aka di ai srapu. Sobun, den o man si krin suma na a tru Krestes èn den o kon na en. Na a ten dati, Yesus o leri den disipel fu en prenspari sani di o yepi den fu tan na libi.