Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 92

Yesus e dresi tin gwasiman, ma wán nomo e kon taki en tangi

Yesus e dresi tin gwasiman, ma wán nomo e kon taki en tangi

LUKAS 17:11-19

  • YESUS E DRESI TIN GWASIMAN

Den man fu a Grankrutu fu den Dyu seti sani fu kiri Yesus. Ma fu di Yesus no wani taki den grabu en, meki a e go na a foto Efrayim di de pikinso go na a noord-owstusei fu Yerusalem. A e tan drape nanga den disipel fu en, farawe fu den feanti fu en (Yohanes 11:54). Ma a Paskafesa fu a yari 33 e doro. Dati meki Yesus o go na Yerusalem baka. Ma now a e pasa na ini Samaria fu go na Galilea di de na noordsei. Disi o de a lasti leisi taki a o go drape fosi a dede.

Te Yesus e bigin waka fu a wán dorpu go na a trawan, a e miti tin gwasiman. Son leisi te wan sma abi gwasi, dan pisi fu en skin soleki en finga, en futufinga, noso en yesi e pori gowe safrisafri (Numeri 12:10-12). A Wet fu Gado e taki dati wan gwasiman musu bari: „Mi no krin, mi no krin!” A sma disi no musu tan na mindri tra sma.​—Lefitikus 13:45, 46.

Dati meki den tin gwasiman e tan fara fu Yesus. Ma den e bari nanga tranga sten: „Yesus, Leriman, abi sari-ati gi wi!” Di Yesus si den, a taigi den: „Go meki den priester luku unu” (Lukas 17:13, 14). Na so a e sori lespeki gi a Wet fu Gado di e taki dati den priester abi a frantwortu fu taki efu wan gwasiman dresi fu a siki fu en. Dan a kan libi baka na mindri sma di de gosontu.​—Lefitikus 13:9-17.

Den tin gwasiman e bribi taki Yesus abi a makti fu dresi den. Den e go na den priester aladi den no betre ete. Te den de na pasi, den e bigin si taki den no siki moro èn den e firi taki den kon gosontu. A no de fu taki dati den breiti taki den sori bribi na ini Yesus!

Neigi fu den tin gwasiman e waka go doro. Ma wan fu den, wan Samaria man, e drai go baka fu suku Yesus. Fu san ede? A man de nanga tangi trutru taki Yesus yepi en. A man disi e „gi Gado glori nanga wan tranga sten” fu di a e frustan taki na Gado meki en kon betre (Lukas 17:15). Te a man feni Yesus, a e saka kindi boigi na Yesus futusei èn a e taki en tangi.

Yesus e taigi den sma di e tanapu drape nanga en: „A no tin sma kon krin? Pe den tra neigi de dan? Nowan fu den drai kon baka fu gi Gado glori? Na a man disi wawan drai kon baka fu gi Gado glori aladi a de wan sma fu wan tra kondre?” Dan Yesus e taigi a man fu Samaria: „Opo, dan yu go. A bribi fu yu meki yu kon betre.”​—Lukas 17:17-19.

A dresi di Yesus dresi den tin gwasiman e sori taki Yehovah Gado e horibaka gi en. Ma fu di wan fu den gwasiman bribi na ini Yesus, meki a no kon betre nomo, ma a kan kisi têgo libi tu. Na ini a ten disi Gado no e meki Yesus dresi sma na a fasi disi. Ma efu wi e bribi na ini Yesus, dan wi srefi kan kisi têgo libi. Wi e sori taki wi de nanga tangi, neleki a Samaria man?