Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 99

Yesus e dresi wan breni man èn a e yepi Sakeyus

Yesus e dresi wan breni man èn a e yepi Sakeyus

MATEYUS 20:29-34 MARKUS 10:46-52 LUKAS 18:35–19:10

  • YESUS E DRESI WAN BRENI MAN NA INI YERIKOW

  • A BELASTING-MAN SAKEYUS E SORI BEROW

Yesus nanga den sma di e teki waka nanga en e doro na Yerikow. A e teki pikinmoro wán dei fu waka fu Yerikow go na Yerusalem. Fu taki en leti, Yerikow abi tu foto. A moro owru foto de sowan 1.6 kilometer fu a nyun foto di den Romesma bow. Yesus nanga den ipi-ipi sma e gowe libi wan fu den foto disi èn den e doro na a trawan. Ne tu breni begiman e yere den ipi-ipi sma e kon. Wan fu den nen Bartimeyus.

Di Bartimeyus yere taki Yesus e waka pasa, dan en nanga en mati bigin bari: „Masra, Manpikin fu David, abi sari-ati nanga wi!” (Mateyus 20:30) Sonwan fu den sma e bari den fu tan tiri, ma den tu man bigin bari moro tranga srefi. Te Yesus e yere a babari, a e tan tanapu. A e aksi den sma di de nanga en fu kari den sma di e bari kari en. Den sma e go na den begiman èn den e taigi wan fu den: „Teki deki-ati, dan yu opo, bika a e kari yu” (Markus 10:49). A breni man breiti. A e fringi en dyakti puru, a e dyompo opo, dan a e go na Yesus.

Yesus e aksi den: „San unu wani mi musu du gi unu?” Ala tu man e taki: „Masra, meki wi si” (Mateyus 20:32, 33). Fu di Yesus e firi sari gi den man disi, meki a e fasi den ai èn a e taigi wan fu den: „Yu kan go, a bribi fu yu meki yu kon betre” (Markus 10:52). Den tu breni begiman e si baka èn a no de fu taki dati den e bigin gi Gado glori. Den sma di si san pasa e bigin prèise Gado tu. Den man di ben breni fosi e bigin waka baka Yesus tu.

Bun furu sma de lontu Yesus te a e waka pasa na ini Yerikow. Ibri sma wani si a man di dresi den breni man. Den sma e pusu Yesus fu ala sei. Dati meki sonwan fu den no man si en srefisrefi. Wan fu den sma disi na Sakeyus. A man disi na a edeman fu den belasting-man fu Yerikow nanga a kontren drape. Fu di Sakeyus syatu, meki a no man si san e pasa. Dati meki a e lon go na fesi èn a e kren na ini wan figabon di de na sei a pasi pe Yesus e waka. Na ini a bon, Sakeyus man si ala sani bun. Te Yesus e kon moro krosibei, a e si Sakeyus na ini a bon. A e taigi en: „Sakeyus, saka kon na gron esi-esi, bika tide mi musu tan na ini yu oso” (Lukas 19:5). Sakeyus e saka komoto na ini a bon èn a e lon go na oso fu sreka sani fu gi a lespeki fisitiman fu en wan switikon.

Te den sma e si san e pasa, den e bigin krutukrutu. Den feni taki a no fiti taki Yesus go na a oso fu wan man di den e si leki wan sondari. Sakeyus kon gudu fu di a e tapu skreki gi sma fu meki den pai moro belasting leki san den musu pai.

Te Yesus e go na ini na oso fu Sakeyus, den sma e krutu: „A go tan na wan sondari.” Ma Yesus e si taki Sakeyus man sori berow. Na dati e  pasa tu. Sakeyus e opo tanapu èn a e taigi Yesus: „Masra, mi o gi den pôti sma afu fu den sani di mi abi. Efu mi bedrigi wan sma fu teki en moni, dan mi o pai en fo tron moro furu.”​—Lukas 19:7, 8.

Dati na wan moi fasi fa Sakeyus sori taki a abi trutru berow! Soleki fa a sori, dan a kan luku den belasting-papira fu en fu si omeni moni a ben kisi fu difrenti Dyu. A e pramisi fu pai den baka fo tron moro furu. Dati na moro leki san a wet fu Gado e taki dati so wan sma musu pai srefi (Eksodes 22:1; Lefitikus 6:2-5). Boiti dati, Sakeyus e pramisi taki a o gi den pôtiwan afu fu den gudu fu en.

Yesus breiti te a si taki Sakeyus abi berow èn a e taigi en: „Tide na osofamiri disi kisi frulusu, bika a man disi na wan bakapikin fu Abraham tu. A Manpikin fu libisma kon fu suku èn frulusu den sma di lasi pasi.”​—Lukas 19:9, 10.

No so langa na fesi Yesus ben fruteri na agersitori fu a lasi manpikin, fu sori san na a situwâsi fu den „sma di lasi pasi” (Lukas 15:11-24). Ma now a abi wan libilibi eksempre fu wan man di pikinmoro ben lasi, ma di feni a pasi kon baka na Yehovah. Den kerki fesiman nanga den bakaman fu den e kragi èn den e krutu Yesus fu di a e poti prakseri na den sma leki Sakeyus. Ma toku Yesus e tan suku den lasi manpikin disi fu Abraham, fu yepi den fu dini Yehovah baka.