Go na content

Go na table of contents

Yehovah Kotoigi

Tongo Sranantongo

 KAPITEL 95

Yesus e sori fa Gado e si brokotrow èn a lobi pikin

Yesus e sori fa Gado e si brokotrow èn a lobi pikin

MATEYUS 19:1-15 MARKUS 10:1-16 LUKAS 18:15-17

  • YESUS E SORI FA GADO E SI BROKOTROW

  • SON SMA ABI NA OKASI FU TAN SONDRO FU TROW

  • A PRENSPARI FU DE LEKI YONGU PIKIN

Te Yesus nanga den disipel fu en gowe libi Galilea, den e abra Yordan-liba èn den e go na Perea di de na zuidsei. A lasti leisi di Yesus ben de na ini Perea, a ben taigi den Fariseiman fa Gado e si brokotrow (Lukas 16:18). Now den e opo a tori dati baka fu tesi Yesus.

Moses ben skrifi taki wan man ben kan broko trow nanga en wefi efu „na uma du wan sani di no fiti” (Deuteronomium 24:1). Sma abi difrenti denki fu a tori disi. Son sma e bribi taki wan sma kan broko trow fu ala sortu pikinpikin sani ede. Dati meki den Fariseiman e aksi: „Wan man abi a reti fu broko trow nanga en wefi fu ala sortu sani ede?”​—Mateyus 19:3.

Yesus e piki den na wan koni fasi. Na presi fu horibaka gi a denki di furu sma abi, a e sori den fa Gado seti a trowlibi. A e taki: „Unu no leisi taki a sma di meki den na a bigin, meki wan man nanga wan uma, èn taki a ben taki: ’Dati meki wan man o gowe libi en papa nanga en mama. A o tai hori na en wefi èn den tu sma dati o de wán skin’? Sobun, den no de tu skin moro, ma wán skin. Fu dati ede, san Gado tyari kon na wán nowan sma musu prati” (Mateyus 19:4-6). Di Gado seti a trowlibi fu Adam nanga Eva, a no seti nowan sani taki den ben kan broko trow.

Den Fariseiman no e agri nanga Yesus. Den e taki: „Dan fu san ede Moses taki dati a wefi musu kisi wan papira di e sori taki a masra seni en gowe èn taki a broko trow nanga en?” (Mateyus 19:7). Yesus e taigi den: „Moses gi unu pasi fu broko trow nanga un wefi fu di un ati tranga, ma disi no ben de so na a bigin” (Mateyus 19:8). A „bigin” dati no ben de na ini a ten fu Moses. A ben de di Gado seti a trowlibi na ini Eden.

Dan Yesus e taigi den wan prenspari sani. A e taki: „Mi e taigi unu taki efu wan man broko trow nanga en wefi, ma a wefi no du hurudu [Grikitongo, porneya] èn a man trow nanga wan tra uma, dan a du sutadu” (Mateyus 19:9). Bijbel e sori taki hurudu na a wan-enkri sani di e gi wan sma pasi fu broko trow.

Dati meki den disipel e taki: „Efu dati de so gi wan man nanga en wefi, dan a no de wan koni sani fu trow” (Mateyus 19:10). A de krin taki wan sma di wani trow musu hori na prakseri taki a musu tan nanga en trowpatna fu ala ten!

Yesus e taki tu fu sma di no trow. Son sma no e trow fu di den no man abi seks. Kande den gebore nanga wan mankeri na den syenpresi noso kande sma gi den mankeri na den syenpresi. Ma yu abi tra sma di e dwengi den seksfiri fu den èn den bosroiti fu no trow, fu di den wani du moro gi a Kownukondre fu hemel. Dan Yesus e gi den arkiman fu en a deki-ati disi: „Efu wan sma kan tan sondro fu trow, dan meki a du so.”​—Mateyus 19:12.

Now sma e bigin tyari den yongu pikin gi Yesus. Ma den disipel e bari den sma. Kande den e du disi fu di den no wani taki den sma fruferi Yesus. Te Yesus e si dati, a e mandi srefisrefi èn a e taigi den: „Meki den pikin kon na mi èn no pruberi fu tapu den. Bika den sma di de leki den pikin disi sa kisi a Kownukondre fu Gado. Fu tru, mi e taigi unu: Efu wan sma no teki a Kownukondre fu Gado leki wan yongu pikin, dan a no sa go na ini a Kownukondre kwetikweti.”​—Markus 10:14, 15; Lukas 18:15.

Dati na wan moi sani di Yesus leri den sma! Efu wi wani kisi Gado Kownukondre, wi musu de leki pikin di abi sakafasi èn di lobi fu teki leri. Now Yesus e brasa den pikin hori èn a e blesi den. Na so a e sori taki a lobi pikin. A abi a srefi lobi dati gi ala sma di e „teki a Kownukondre fu Gado leki wan yongu pikin”.​—Lukas 18:17.