Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 94

A prenspari fu tan begi èn fu abi sakafasi

A prenspari fu tan begi èn fu abi sakafasi

LUKAS 18:1-14

  • NA AGERSITORI FU NA UMA DI BEN E TAN AKSI FU KISI YEPI

  • A FARISEIMAN NANGA A BELASTING-MAN

Yesus ben fruteri den disipel fu en wan agersitori kaba fu sori den o prenspari a de fu tan begi (Lukas 11:5-13). A kan taki now a de na ini Samaria noso na ini Galilea. Drape a e sori den baka taki den no musu tapu fu begi. A e du disi nanga yepi fu wan agersitori.

A e fruteri: „Na ini wan foto yu ben abi wan krutuman di no ben e frede Gado èn a no ben abi lespeki gi nowan sma. Ma wan uma di en masra ben dede kaba, ben de na ini a foto dati tu. Ala yuru a ben e go na a krutuman èn a ben e taki: ’Yepi mi, so taki mi kan kisi reti na ini a krutu-afersi di mi abi nanga wan tra sma.’ We, wan heri pisi ten a krutuman no ben wani yepi en. Ma bakaten a prakseri: ’Mi no e frede Gado èn mi no abi bisi nanga nowan sma. Ma fu di na uma disi e kon dyaso ala ten fu trobi mi, meki mi o sorgu taki a kisi en reti. Dan a no o kon fruferi mi moro èn a no o tan aksi mi fu du sani gi en.’”​—Lukas 18:2-5.

Yesus e sori san a wani leri den disipel nanga na agersitori disi. A e taki: „Yere san a krutuman taki aladi a no ben de wan reti-ati sma! A no de so dan, taki Gado sa sorgu taki den wan di a kari èn di e bari kari en dei nanga neti, kisi reti? A o abi furu pasensi nanga den tu” (Lukas 18:6, 7). San Yesus wani leri den fu en Papa?

A no de fu taki dati Yesus no wani sori taki Yehovah Gado de leki a krutuman di no de wan reti-ati sma. Yesus wani leri den disipel taki efu wan krutuman di no de wan reti-ati sma kan arki wan sma di e begi en wan sani doronomo, dan a no de fu taki dati Gado o du dati tu. Gado bun èn ala ten a e du san reti. A e piki den begi fu sma di e tan begi en doronomo. Yesus e sori dati krin te a e taki: „Mi e taigi unu: [Gado] sa sorgu taki den o kisi reti esi-esi.”​—Lukas 18:8.

Nofo tron sma no e du san reti gi den mofinawan nanga den pôtiwan, ma furu tron den e du bun gi den guduwan nanga den sma di abi hei posisi. Ma Gado no de so. Te a ten doro, a o sorgu taki den ogri sma kisi strafu èn taki den futuboi fu en kisi têgo libi.

Suma abi bribi neleki na uma na ini na agersitori? Omeni sma e bribi trutru taki Gado o „sorgu taki den o kisi reti esi-esi”? Didyonsro Yesus sori o prenspari a de fu tan begi. Now a wani leri den taki a prenspari fu bribi taki begi kan yepi den. Dati meki a e aksi: „Te a Manpikin fu libisma doro, a sa feni sma na grontapu di e sori a srefi bribi disi?” (Lukas 18:8) Yesus wani sori den taki kande furu sma no o abi a sortu bribi disi te Krestes kon.

Son sma di e arki Yesus feni taki den abi wan tranga bribi. Den e si densrefi leki reti-ati sma, aladi den feni taki den bun moro trawan. Dati meki Yesus e fruteri den wan tra agersitori.

A e taki: „Tu man ben go na a tempel fu begi. A wan ben de wan Fariseiman èn a trawan ben de wan sma di e teki belasting-moni gi lanti. A Fariseiman go tanapu, dan a bigin begi na ini en ati: ’Ke, mi Gado, mi e taki yu tangi taki mi no de leki den tra sma, den sma di e kwinsi trawan, den sma di no bun, den sutaman, noso srefi leki a man disi di e teki belasting-moni gi lanti. Tu tron wan wiki mi e faste èn mi e gi a di fu tin pisi fu ala san mi e kisi.’”​—Lukas 18:10-12.

Den Fariseiman lobi fu du sma-ai sani, soso fu  meki sma denki taki den na reti-ati sma. Nofo tron den e bosroiti fu faste tapu munde nanga fodewroko. Na den dei dati furu sma de na wowoyo èn ala sma man si den te den e begi. Boiti dati, den e sorgu taki den e gi a di fu tin pisi fu pikinpikin sani srefi, soleki spesrei (Lukas 11:42). Wan tu mun na fesi, den Fariseiman sori taki den no abi nowan lespeki gi a pipel. Den Fariseiman ben feni taki a pipel no sabi a Wet fu di den no e frustan a Wet soleki fa den e frustan en. Dati meki den Fariseiman taki: „A pipel disi . . . na frufruktu sma.”​—Yohanes 7:49.

Yesus e fruteri moro fara: „Disiten a man di ben e teki belasting-moni gi lanti ben e tanapu farawe. A no ben wani opo en ai srefi fu luku go na hemel. Na presi fu dati a ben tan naki na tapu en borsu èn a ben e taki: ’Ke, mi Gado, abi sari-ati nanga wan sondari leki mi.’” A belasting-man abi sakafasi èn a e taki krin taki a abi sondu. Dati meki Yesus e taki: „Mi e taigi unu: Di a man disi go na en oso, a ben de moro bun leki a tra man. Bika den o saka a sma di e hei ensrefi, ma den o hei a sma di e saka ensrefi.”​—Lukas 18:13, 14.

Na so Yesus e sori krin taki a prenspari fu abi sakafasi. Disi na bun rai gi den disipel fu en di kweki na ini wan libimakandra pe den heimemre Fariseiman e si en leki wan prenspari sani fu abi hei posisi nanga biginen. A rai di Yesus gi, na bun rai gi ala den bakaman fu en.

Kon sabi moro

A WAKTITOREN

Gado e arki ala begi?

Fu san ede Gado no e prisiri nanga ala begi? San wi musu du so taki Gado e arki wi?