Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 86

A lasi manpikin e drai kon baka

A lasi manpikin e drai kon baka

LUKAS 15:11-32

  • NA AGERSITORI FU A LASI MANPIKIN

A sori leki Yesus ben de ete na ini Perea na a owstusei fu Yordan-liba, di a fruteri sma na agersitori fu a lasi skapu èn di fu a solfru moni di ben lasi. Ala tu agersitori e leri wi taki wi musu breiti te wan sma sori berow èn drai kon baka na Gado. Den Fariseiman nanga den leriman fu Wet krutu Yesus fu di a e bumui nanga den sortu sma dati. Ma yu denki taki den man disi leri wan sani fu den tu agersitori fu Yesus? Yu denki taki den e frustan fa wi hemel Papa e denki fu sma di abi berow fu den sondu fu den? Now Yesus e fruteri wan moi agersitori fu leri sma a srefi prenspari sani disi.

Na agersitori e taki fu wan papa di abi tu manpikin. A moro yongu manpikin na a moro prenspari sma na ini na agersitori disi. Te den Fariseiman, den leriman fu Wet nanga den tra sma yere na agersitori, den o man frustan san Yesus wani leri den nanga den sani di a taki fu a yongu manpikin. Ma nowan sma musu frigiti san Yesus taki fu a papa nanga a moro owru manpikin, fu di wi kan leri wan sani tu fu a fasi fa den tyari densrefi. Sobun, luku san yu kan leri fu ala den dri man disi te Yesus e fruteri na agersitori.

Yesus e taki: „Wan man ben abi tu manpikin. A moro yonguwan fu den taigi en papa: ’Mi papa, gi mi a pisi fu a gudu di mi musu kisi.’ Ne a papa prati a gudu fu en gi den manpikin” (Lukas 15:11, 12). Luku taki a papa no dede ete. Ma toku a moro yongu manpikin aksi a pisi fu a gudu fu en. A wani kisi a pisi fu en nownow, so taki a kan go libi en eigi libi èn du san en srefi wani nanga a moni. San a o du?

Yesus e fruteri: „Wan tu dei baka dati, a moro yonguwan teki ala en sani, dan a go na wan farawe kondre èn drape a frumorsu en gudu, fu di a ben libi wan yayolibi” (Lukas 15:13). A boi disi ben e tan na a oso fu en papa pe a ben abi ala sani. A papa e sorgu bun gi den pikin fu en. Toku a manpikin disi gowe libi en oso fu go na wan tra kondre. Drape a frumorsu ala en gudu fu di a go libi wan yayolibi. Baka dati a libi e kon moro tranga gi en soleki fa Yesus e fruteri go doro:

 „Di a frumorsu ala sani, wan hebi angriten kon na ini a heri kondre dati èn a bigin pina. A go wroko srefi gi wan sma fu a kondre dati. A sma seni en go luku agu na ini den gron fu en. Angri ben kiri en so te, taki a ben lostu a nyanyan fu den agu srefi, ma nowan sma ben gi en wan sani.”​—Lukas 15:14-16.

Aladi Gado Wet taki dati agu no krin, toku a manpikin disi e teki a wroko fu luku agu gi wan sma. Angri e kiri en so te, taki a wani nyan srefi den sani di den agu e nyan. Di a libi kon tranga gi a manpikin disi, „a kisi ensrefi”. San a e du now? A e prakseri: „Den wrokoman fu mi papa abi brede pasa marki, dan mi e dede dyaso fu angri! Mi o go na mi papa èn mi o taigi en: ’Mi papa, mi sondu teige hemel èn teige yu. Mi no warti moro fu yu kari mi yu manpikin. Meki mi tron leki wan fu den wrokoman fu yu.’” Ne a opo go na en papa.​—Lukas 15:17-20.

San en papa o du? En ati o bron nanga a boi fu en èn a o kosi en fu di a teki a don bosroiti fu gowe libi oso? Yu denki taki a papa o sori taki a no e span nanga a boi, noso taki a o gi en a firi taki a no breiti fu si en? Efu yu ben de a papa, san yu ben o du? San yu ben o du efu a ben de yu manpikin noso yu umapikin?

A LASI MANPIKIN DRAI KON BAKA

Yesus e fruteri fa a papa e firi èn san a e du: „A [manpikin] ben de fara fu oso ete, di en  papa si en. Ne a papa firi sari, a lon go brasa en boi èn a gi en wan switi bosi” (Lukas 15:20). Kande a papa yere fu a yayolibi fu en boi, ma toku a e gi en wan switikon. Yu denki taki den Dyu fesiman di e taki dati den sabi Yehovah èn taki den e anbegi en, o leri wan sani fu na agersitori disi? Yu denki taki den o frustan fa wi hemel Papa e si sma di abi berow fu den sondu fu den? Yu denki taki den man disi o si taki Yesus e sori sari-ati tu gi den sma disi neleki en Papa?

A papa disi man si na a boi en fesi taki a e sari trutru èn taki a abi berow. Wan moi sani na taki a lobi-ati papa disi lon go miti en manpikin. Na so a meki a moro makriki gi a manpikin fu taki fu den sondu di a du. Yesus e taki: „Dan a manpikin taigi en: ’Mi papa, mi sondu teige hemel èn teige yu. Mi no warti moro fu yu kari mi yu manpikin.’”​—Lukas 15:21.

A papa e taigi den srafu fu en: „Esi-esi, go teki wan langa krosi, a moro bunwan, dan un weri disi gi en. Poti wan linga na en finga èn susu na en futu. Tyari a fatu yongu mankaw kon èn srakti en. Meki wi nyan èn meki prisiri, bika a boi fu mi disi ben dede, ma a kon na libi baka. A ben lasi, ma mi feni en baka.” Dan den e bigin „meki prisiri”.​—Lukas 15:22-24.

Disiten a moro bigi manpikin de na ini a gron. Yesus e taki fu en: „Di a ben e kon na oso, a yere poku e prei èn sma ben e dansi. Dati meki a kari wan fu den futuboi kon èn a aksi en san e pasa. A futuboi taigi en: ’Yu brada kon èn yu papa srakti a fatu yongu mankaw, fu di yu brada kon baka na yu papa èn a de gosontu.’ Ne a moro bigi manpikin ati bron èn a no ben wani go na inisei. Dan en papa kon na dorosei èn a begi en fu kon na inisei. A taigi en papa: ’Someni yari kaba mi dini yu leki srafu èn noiti mi trangayesi yu, ma noiti ete yu gi mi wan pikin krabita so taki mi nanga den mati fu mi ben kan meki prisiri. Ma di a manpikin fu yu disi doro, baka di a nyan den gudu  fu yu kaba nanga huru-uma, dan yu lon go srakti a fatu yongu mankaw gi en.’”​—Lukas 15:25-30.

Suma de leki a moro owru manpikin? Suma e krutu Yesus fu di a e sori sari-ati nanga switifasi gi den mofinawan nanga den sondari? Dati na den leriman fu Wet nanga den Fariseiman. Fu di den e krutu Yesus taki a e sori switifasi gi sondari, meki Yesus fruteri na agersitori disi. A no de fu taki dati iniwan sma di e krutu Gado fu di a e sori sari-ati gi sondari, musu leri wan sani fu a tori disi.

Na a kaba fu na agersitori Yesus e fruteri san a papa taigi a moro owru manpikin. A taki: „Mi pikin, yu ben de nanga mi ala ten èn ala sani fu mi na fu yu. Ma wi musu breiti èn prisiri, bika yu brada ben dede, ma a kon na libi baka. A ben lasi, ma wi feni en baka.”​—Lukas 15:31, 32.

Yesus no e fruteri san na owru manpikin du te fu kaba. Ma Bijbel e sori taki „bun furu priester tron bribiman” baka di Yesus dede èn kisi wan opobaka (Tori 6:7). Kande wan tu fu den man dati ben de Fariseiman di ben yere a moi agersitori di Yesus fruteri fu a lasi manpikin. Iya, srefi den sortu man disi ben kan sori berow èn drai kon baka na Gado.

Sensi a dei dati den disipel fu Yesus ben musu hori na prakseri sortu prenspari sani den leri fu na agersitori disi èn den ben musu du tu san den leri. A fosi sani di wi kan leri fu na agersitori, na taki a de wan koni sani fu tan na ini na organisâsi fu Gado pe wi lobi-ati Papa e kibri wi èn e sorgu gi wi. Wi no musu meki sani di wi lobi hari wi go na „wan farawe kondre”.

Wi kan leri wan tra sani fu na agersitori disi. Efu wan fu wi ben o komoto na a pasi fu Gado, wi musu sori sakafasi èn wi musu drai kon baka na en. Te wi e du dati, dan wi Papa o prisiri nanga wi baka.

Wan tra sani di wi kan leri fu na agersitori disi, na taki a papa de heri tra fasi leki a moro owru manpikin. A papa ben de klariklari fu gi a yongu manpikin pardon èn fu teki en baka na ini oso. Ma a bigi brada ati bron èn a no ben wani sori switifasi gi en brada. A de krin taki te wan sma di ben gowe libi Gado, sori trutru berow èn a drai kon baka na ’a oso fu a Papa’, dan den futuboi fu Gado musu gi en pardon èn den musu sori switifasi gi en. Meki wi prisiri taki wi brada di ’ben dede, kon na libi baka. A ben lasi, ma wi feni en baka.’