Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 74

Yesus e gi Marta rai èn a e leri sma fa fu begi

Yesus e gi Marta rai èn a e leri sma fa fu begi

LUKAS 10:38–11:13

  • YESUS E GO NA A OSO FU MARTA NANGA MARIA

  • A PRENSPARI SREFISREFI FU TAN BEGI

A foto Betania de na a owstusei pisi fu Olèif-bergi, sowan 3 kilometer fu Yerusalem (Yohanes 11:18). Yesus e go drape èn a e go na ini na oso fu den tu sisa, Marta nanga Maria. Den nanga a brada fu den, Lasarus, na mati fu Yesus èn den e gi Yesus wan switikon.

A de wan grani fu abi a Mesias na den oso. Marta e du ala muiti fu sorgu bun gi Yesus. A e bigin sreka wan bigi nyanyan. Te Marta e wroko, en sisa Maria e sidon na Yesus en futusei èn a e arki Yesus. Baka wan pisi ten Marta e taigi Yesus: „Masra, a no e trobi yu taki mi sisa e meki mi wawan du ala sani? Taigi en dan, meki a kon yepi mi.”​—Lukas 10:40.

Na presi fu krutu Maria, Yesus e taigi Marta taki a e broko en ede tumusi. A e taigi en: „Marta, Marta, yu e broko yu ede nanga furu sani èn yu abi tumusi furu fu du. Ma wan tu sani nomo de fanowdu, iya, wán sani nomo. Maria teki a bun pisi, èn mi no o puru disi na en anu” (Lukas 10:41, 42). Yesus e sori en taki a no de fanowdu fu gebroiki so furu ten fu sreka ala sortu nyanyan. A ben kan sreka wán sani nomo.

Marta wani du wan bun sani. A wani sorgu bun gi Yesus. Ma fu di a e broko en ede so nanga a nyanyan, meki a e misi na okasi disi fu teki prenspari leri fu a Manpikin fu Gado! Yesus e sori krin taki Maria teki wan koni bosroiti di o tyari wini kon gi en fu ala ten. Wi srefi kan teki leri fu a sani di a du.

Na wan tra okasi, Yesus e leri sma wan tra sani di prenspari tu. Wan disipel fu en e aksi en: „Masra, leri wi fa fu begi, neleki fa Yohanes leri den disipel fu en fu begi” (Lukas 11:1). Pikinmoro wán nanga afu yari na fesi, Yesus ben leri sma kaba fa fu begi di a ben hori a prenspari lezing na tapu a bergi (Mateyus 6:9-13). Ma a kan taki a disipel disi no ben de drape. Dati meki Yesus e taki syatu baka san a ben fruteri den. Baka dati a e fruteri wan agersitori fu sori den o prenspari a de fu tan begi.

A e taki: „Kon meki wi taki dati wan fu unu abi wan mati èn a go na en na mindrineti, dan a taigi en: ’Mati, leni mi dri brede, bika didyonsro wan mati fu mi komoto na wan presi kon na mi èn mi no abi noti fu gi en.’ Dan a sma di de na inisei piki en: ’No trobi mi. A doro sroto kaba, èn mi nanga den yongu pikin fu mi e sribi. Mi no man opo fu gi yu wan sani.’ Mi e taigi unu: Srefi efu a sma no wani opo fu gi en wan sani fu di na en mati, toku a o gi en san a abi fanowdu fu di a e tan aksi en nomonomo.”​—Lukas 11:5-8.

Ma nanga na agersitori disi Yesus no wani sori taki Yehovah no wani arki te sma e begi en, neleki fa a mati no ben wani arki. A mati no ben wani yepi a man biginbigin. Ma fu di a man tan aksi en a sani doronomo, meki a e yepi en bakaten. We efu disi de so nanga libisma, dan a no de fu taki dati wi lobi-ati hemel Tata o yepi den futuboi fu en di e aksi en sani nanga wan krin ati! Yesus e taki moro fara: „Mi e taigi unu: Tan aksi, dan unu sa kisi. Tan suku, dan unu sa feni. Tan naki na tapu a doro, dan a doro sa opo gi unu. Bika a sma di e aksi, e kisi èn a sma di e suku, e feni èn a sma di e naki na tapu a doro, a doro sa opo gi en.”​—Lukas 11:9, 10.

Fu meki sma frustan a tori disi moro krin, Yesus e sori fa wan papa de nanga den pikin fu en. A e taki: „Suma fu unu di de wan papa o gi en manpikin wan sneki te a pikin aksi en wan fisi? Sosrefi, te a e aksi wan eksi, dan unu no o gi en wan kruktutere, a no so? Fu dati ede, efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!” (Lukas 11:11-13) A sani disi e gi wi a dyaranti taki wi hemel Papa de klariklari fu arki wi èn fu gi wi san wi abi fanowdu!