Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 69

Suma na den papa​—Abraham noso Didibri?

Suma na den papa​—Abraham noso Didibri?

YOHANES 8:37-59

  • DEN DYU E TAKI DATI ABRAHAM NA DEN TATA

  • YESUS BEN DE KABA FOSI ABRAHAM

Yesus de ete na ini Yerusalem gi a Kampufesa èn a e go doro fu gi sma leri. Didyonsro son Dyu taigi en: „Wi na Abraham pikin èn noiti wi ben de srafu fu wan sma.” Yesus e piki den: „Mi sabi taki unu na Abraham pikin, ma toku unu wani kiri mi, fu di unu no wani teki den sani di mi e taigi unu. Mi e taki den sani di mi si di mi ben de na mi Tata. Ma unu e du den sani di unu yere fu un tata.”​—Yohanes 8:33, 37, 38.

A de krin san Yesus wani sori den: A no abi a srefi papa leki den. Fu di den Dyu no sabi san Yesus wan taigi den, meki den e taki baka: „Wi tata na Abraham” (Yohanes 8:39; Yesaya 41:8). Den na trutru bakapikin fu Abraham. Dati meki den feni taki den abi a srefi bribi leki Abraham, a mati fu Gado.

Ma now Yesus e taigi den wani sani di e meki den skreki: „Efu unu na Abraham pikin, dan un musu du san Abraham du.” Iya, wan trutru manpikin e teki na eksempre fu en papa. Yesus e taki moro fara: „Ma now unu wani kiri mi, wan man di taigi unu den tru sani di mi yere fu Gado. Abraham no ben du so.” Baka dati Yesus e taigi den wan sani di den no e frustan: „Unu e du den sani di un tata e du.”​—Yohanes 8:39-41.

Den Dyu no e frustan ete san Yesus wani taigi den. Den feni taki den na trutru manpikin fu Gado. Den e taki: „Wi na trutru pikin fu Gado. Wi abi wán Tata, dati na Gado.” Ma a tru taki Gado na den Tata? Yesus e taki: „Efu Gado ben de un Tata, unu ben o lobi mi, bika na fu Gado mi kon èn na fu di Gado wani, meki mi de dya. A no ben de mi prakseri fu kon dya, ma na Gado seni mi kon.” Dan Yesus e poti wan aksi di ensrefi e piki: „Fu san ede unu no sabi san mi e taki? Na fu di unu no man teki den sani di mi e taki.”​—Yohanes 8:41-43.

Yesus pruberi fu sori den Dyu sortu takru bakapisi a kan tyari kon gi den fu di den no wani bribi na ini en. Ma now a e taigi den krin: „Didibri na un tata èn unu wani du den sani di un tata wani.” Fa a tata fu den de? Yesus e taigi den krin fa a de. A e taki: „Di a bigin waka en eigi pasi, a ben de wan kiriman. A drai baka gi san tru, bika a no lobi san tru.” Yesus e taki moro fara: „A sma di de fu Gado, e arki den sani di Gado e taki. Na fu di unu no de fu Gado, meki unu no e arki.”​—Yohanes 8:44, 47.

A e hati den Dyu taki Yesus krutu den so. Den e piki en: „Wi no ben abi leti di wi taki dati yu na wan Samariasma èn dati yu abi wan ogri yeye na yu tapu?” Den e kari Yesus „wan Samariasma” fu wisiwasi en. Ma Yesus no e poti prakseri na den takru sani di den e taki. A e piki den: „Mi no abi wan ogri yeye na mi tapu. Mi e gi mi Tata grani, ma unu no e gi mi grani.” Yesus e sori den o seryusu a sani disi de. A e taki: „Efu wan sma e du den sani di mi taki, dan a no o si dede noiti.” Ma disi no wani taki dati den apostel nanga den sma di e waka na en baka no o dede noiti. Na presi fu dati Yesus e sori taki noiti den o kisi têgo pori. Sobun, den no o dede „a di fu tu dede” pe sma no abi a howpu fu kisi wan opobaka.​—Yohanes 8:48-51; Openbaring 21:8.

Ma den Dyu no e frustan taki na dati Yesus wani sori den. Den e taki: „Now wi sabi seiker taki yu abi wan ogri yeye na yu tapu. Abraham dede èn den profeiti dede tu, ma yu e taki: ’Efu wan sma e du den sani di mi taki, dan a no o si dede noiti.’ Yu wani taigi wi taki yu bigi moro wi tata Abraham di dede kaba? . . . Suma yu denki taki yu de?”​—Yohanes 8:52, 53.

A de krin taki Yesus wani sori den taki en na a Mesias. Ma na presi fu taigi den langalanga suma na en, a e taki: „Efu mi e gi misrefi glori, dan a glori fu mi no wani taki noti. Na mi Tata e gi mi glori, a sma fu suma unu e taki dati en na un Gado. Toku unu no sabi en. Ma mi sabi en. Efu mi taki dati mi no sabi en, dan mi na wan leiman neleki unu.”​—Yohanes 8:54, 55.

 Yesus e taki baka fu na afo fu den di tan gi yesi na Gado. A e taki: „Un tata Abraham ben prisiri srefisrefi fu di a ben fruwakti fu si a dei fu mi. We, a si en trutru èn a ben prisiri.” Fu di Abraham ben e bribi na ini a pramisi fu Gado, meki a ben e fruwakti a Mesias. Den Dyu no man bribi san a taki. Dati meki den e taigi en: „Yu no abi feifitenti yari srefi ete, dan yu e taki dati yu si Abraham?” Yesus e piki den: „Fu tru, mi e taigi unu: Fosi Abraham ben de, mi ben de kaba.” Yesus e taki fu a ten di a ben e libi na hemel leki wan makti engel, fosi a kon na grontapu.​—Yohanes 8:56-58.

Den Dyu ati bron srefisrefi di Yesus taki dati a ben libi fosi Abraham. Fu dati ede den wani trowe ston na en tapu fu kiri en. Ma Yesus man lowe gowe sondro taki den du en wan ogri.

Kon sabi moro

TEKI NA EKSEMPRE FU SMA DI BEN ABI BRIBI

Abraham​—A „tata fu ala sma di e bribi”

Fa Abraham sori bribi? Na sortu fasi yu ben o wani sori bribi leki Abraham?