Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 68

A Manpikin fu Gado na „a leti fu grontapu”

A Manpikin fu Gado na „a leti fu grontapu”

YOHANES 8:12-36

  • YESUS E TYARI KON NA KRIN SUMA NA A MANPIKIN

  • NA SORTU FASI DEN DYU NA SRAFU?

A di fu seibi dei na a lasti dei fu a Kampufesa. Na a dei disi Yesus e gi leri na ini a tempel „na a presi pe den e kibri a moni fu a tempel” (Yohanes 8:20; Lukas 21:1). Soleki fa a sori, dan a presi disi de na ini a Dyari fu den umasma. Dyaso sma e tyari moni fu horibaka gi a wroko di e du na a tempel.

Te a Kampufesa e hori, den ben e poti moro leti na a pisi disi fu a tempel na neti. Fo bun bigi kandratiki de drape èn ibriwan fu den abi fo bigi beki di furu nanga oli gi den lampu. A leti fu den lampu disi e skèin na a heri presi drape. Kande den arkiman e prakseri a leti fu den kandratiki disi te Yesus e taki: „Mi na a leti fu grontapu. A sma di e waka na mi baka, no o waka na ini a dungru kwetikweti, ma a o abi a leti di e gi libi.”​—Yohanes 8:12.

Den Fariseiman no lobi san Yesus taki. Dati meki den e taki: „Yu e plèi kotoigi gi yusrefi, ma den sani di yu taki no tru.” Ma Yesus e piki den: „Awansi mi na mi eigi kotoigi, toku den sani di mi e taki de tru, fu di mi sabi fu pe mi komoto èn pe mi e go. Ma unu no sabi fu pe mi komoto èn pe mi e go.” A taki tu: „Na ini un eigi Wèt skrifi: ’Efu tu kotoigi e taki a srefi sani, dan a sani dati tru.’ Mi na mi eigi kotoigi, èn a Tata di seni mi kon na wan kotoigi gi mi tu.”​—Yohanes 8:13-18.

Fu di den Fariseiman no wani teki san Yesus taki, meki den e aksi en: „Pe yu Tata de?” Yesus e taigi den krin: „Unu no sabi mi èn unu no sabi mi Tata. Efu unu ben sabi mi, dan unu ben o sabi mi Tata tu” (Yohanes 8:19). Aladi den Fariseiman wani taki den skowtu grabu Yesus, toku nowan sma e fasi en.

Now Yesus e taki wan sani di a ben taigi sma kaba. A e taki: „Mi o gowe èn unu o suku mi. Unu o dede nanga a sondu fu unu. Pe mi e go, unu  no man kon.” Den Dyu no e frustan srefisrefi san Yesus taki. Den e bigin aksi densrefi: „Na kiri a o kiri ensrefi? Bika a taki: ’Pe mi e go, unu no man kon.’” Den no e frustan san Yesus e taki fu di den no sabi pe a komoto. Yesus e taigi den: „Unu na fu den kontren na ondrosei, ma mi na fu den kontren na tapusei. Unu na fu a grontapu disi, ma mi a no fu a grontapu disi.”​—Yohanes 8:21-23.

Yesus e taki fu a libi di a ben abi di a ben de na hemel. A wani sori den tu taki en na a Mesias noso a Krestes di den kerki fesiman ben musu fruwakti. Toku den e wisiwasi en èn den e taki: „Suma na yu?”​—Yohanes 8:25.

Fu di Yesus sabi taki den no wani bribi na ini en èn taki den wani gens en, meki a e taki: „Fu san ede mi e du muiti fu taki nanga unu srefi?” Dan a e bigin taki fu en Papa èn a e sori fu san ede den Dyu musu arki a Manpikin. A e taki: „A sma di seni mi kon, e taki san tru, èn den srefi sani di mi yere fu en, mi kon fruteri na grontapu.”​—Yohanes 8:25, 26.

Baka dati Yesus e sori taki a abi a frutrow taki en Papa e horibaka gi en, aladi den Dyu no abi a frutrow disi. A e taigi den: „Te unu anga a Manpikin fu libisma na wan postu kaba, dan unu o sabi taki mi na a sma di ben musu kon èn taki mi no e du san misrefi wani, ma taki mi e taki den sani disi soleki fa a Tata leri mi. A sma di seni mi kon, de nanga mi. A no gowe libi mi fu mi tan mi wawan, fu di ala ten mi e du san e plisi en.”​—Yohanes 8:28, 29.

Ma son Dyu e bribi na ini Yesus. Dati meki a e taigi den: „Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri.”​—Yohanes 8:31, 32.

Son sma no e frustan fu san ede Yesus taki dati den musu kon fri. Den e taki: „Wi na Abraham pikin èn noiti wi ben de srafu fu wan sma. Dan fa yu kan taki: ’Unu o kon fri’?” Den Dyu sabi taki son leisi den ben de na ondro a tiri fu tra kondre, toku den e weigri fu kari densrefi srafu. Ma Yesus e sori taki den na srafu ete. A e piki den: „Fu tru, mi e taigi unu: Ibri sma di e du sondu, na wan srafu fu sondu.”​—Yohanes 8:33, 34.

Den Dyu e weigri fu si taki den na srafu fu sondu èn disi kan tyari takru bakapisi kon gi den. Yesus e sori den: „A srafu no e tan na ini na oso fu a masra ala ten, ma a manpikin e tan fu ala ten” (Yohanes 8:35). Wan srafu no abi nowan reti tapu wan famirigudu èn a masra fu en kan seni en gowe na iniwan momenti. Soso wan sma di gebore na ini a osofamiri fu a masra noso wan sma di a masra teki leki manpikin e tan na ini na oso „fu ala ten” noso solanga a de na libi.

Sobun, den tru tori di abi fu du nanga a Manpikin kan yepi sma fu kon fri fu sondu nanga dede. Yesus e taki: „Efu a Manpikin meki unu kon fri, dan unu fri trutru.”​—Yohanes 8:36.