Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 66

Yesus de na ini Yerusalem gi a Kampufesa

Yesus de na ini Yerusalem gi a Kampufesa

YOHANES 7:11-32

  • YESUS E GI LERI NA INI A TEMPEL

Furu sma kon sabi Yesus na ini den yari baka di a teki dopu. Dusundusun Dyu si den wondru di a du, èn sma na ini a heri kondre kon yere fu den sani di a du. Now furu sma di de na a Kampufesa na ini Yerusalem, e suku en.

Sma e taki difrenti sortu sani fu Yesus. Sonwan fu den e taki: „Na wan bun sma.” Trawan e taki: „A no tru, a e kori a pipel” (Yohanes 7:12). Na den sortu sani disi sma e taki den fosi dei fu a fesa, ma den no e taki tranga. Nowan sma abi a deki-ati fu opo taki gi Yesus fu di furu sma e frede den Dyu kerki fesiman.

Te a fesa e hori wan tu dei kaba, Yesus e kon na a tempel. Furu fu den sma lobi a moi fasi fa a e gi leri, aladi a no go na den skoro fu den Dyu leriman. Dati meki den Dyu e aksi densrefi: „Fa a du kon taki a man disi koni so èn taki a sabi so furu, aladi a no kisi spesrutu leri?”​—Yohanes 7:15.

Yesus e piki den: „Den sani di mi e leri sma, a no fu misrefi, ma den de fu a sma di seni mi kon. Efu wan sma wani du a wani fu en, dan a o sabi efu den leri e kon fu Gado, noso efu den e kon fu misrefi” (Yohanes 7:16, 17). Den sani di Yesus e leri sma e kruderi nanga a Wet fu Gado. Dati meki sma musu man si taki a no e suku en eigi glori, ma a e suku a glori fu Gado.

Dan Yesus e taki: „Moses gi unu a Wèt, a no so? Ma nowan fu unu e hori a Wèt. Fu san ede unu e suku fu kiri mi?” Sonwan fu den sma drape no sabi fu a tori disi, kande na fu di den no e tan na ini a foto. Den no man frustan fu san ede sma ben o wani kiri so wan bun leriman. Dati meki den e denki taki wan sani no bun nanga Yesus. Den e taki: „Yu abi wan ogri yeye na yu tapu. Suma e suku fu kiri yu?”​—Yohanes 7:19, 20.

Fu taki en leti, wán nanga afu yari na fesi, den Dyu fesiman ben wani kiri Yesus, baka di a dresi wan man na Sabat-dei. Now Yesus e sori den taki a Wet e taki dati wan beibi musu besnèi na tapu a di fu aiti dei, awinsi a dei dati e fadon tapu Sabat-dei. Baka dati a e aksi: „Efu wan sma e besnèi na Sabat-dei fu no trangayesi a komando fu Moses, dan fu san ede un ati e bron nanga mi fu di mi meki wan man kon betre na Sabat-dei? Un no musu krutu sani soleki fa unu e si en nanga ai, ma un musu krutu sma na wan reti fasi.”​—Yohanes 7:23, 24.

Den sma fu Yerusalem di sabi a tori disi e taki: „A no a man disi den [tiriman] e suku fu kiri? Ma toku a e tanapu e taki dya na fesi ala sma, èn den no e taigi en noti. A kan taki den tiriman kon sabi taki en na a Krestes?” Ma fu san ede den sma no e bribi taki Yesus na a Krestes? Den e taki: „Wi sabi fu pe a man disi komoto. Ma te a Krestes kon, dan nowan sma o sabi fu pe a komoto.”​—Yohanes 7:25-27.

Leti drape na ini a tempel, Yesus e piki den: „Unu sabi mi èn unu sabi fu pe mi komoto. Boiti dati, mi no kon dya fu misrefi. A sma di seni mi kon, de trutru, èn unu no sabi en. Mi sabi en, fu di na en gi mi a reti fu taki gi en, èn na en seni mi kon” (Yohanes 7:28, 29). Fu di Yesus taki so krin, meki den wani grabu en fu kiri en noso fu poti en na strafu-oso. Ma disi no pasa, fu di a ten no doro ete gi Yesus fu dede.

Toku furu sma e poti bribi na ini Yesus. Fu taki en leti, den musu fu bribi en te yu e luku ala den sani di a du. A waka na tapu watra, a meki a winti kon tiri, èn a du wan wondru fu gi dusundusun sma nyanyan nanga wan tu brede èn nanga wan tu fisi nomo. Boiti dati, a dresi siki sma, a meki lan sma waka, a meki breni sma man si, a dresi gwasiman, èn a wiki dede  sma. Dati meki den e taki: „Te a Krestes doro, a no o du moro wondru leki a man disi, a no so?”​—Yohanes 7:31.

Te den Fariseiman e yere den sma e taki den sani disi, dan den nanga den edeman fu den priester e seni skowtu fu go grabu Yesus.