Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 78

A futuboi di de fu frutrow musu de srekasreka!

A futuboi di de fu frutrow musu de srekasreka!

LUKAS 12:35-59

  • A FUTUBOI DI DE FU FRUTROW MUSU DE SREKASREKA

  • YESUS E KON FU TYARI PRATI KON

Yesus ben taigi den sma taki soso wan „pikin ipi” sma o kisi wan presi na ini a hemel Kownukondre (Lukas 12:32). Ma sma no musu si a grani disi leki wan lawlaw sani. Fu taki en leti, Yesus e taki tu o prenspari a de taki wan sma e tyari ensrefi na a yoisti fasi efu a wani kisi a Kownukondre.

Dati meki Yesus e gi den disipel fu en a rai fu de srekasreka teleki a drai kon baka. A e taki: „Un musu weri un krosi, de srekasreka, èn meki un lampu tan leti. Un musu de leki sma di e wakti den masra teleki a drai kon baka fu a trow-oso, so taki te a doro èn a e naki na tapu a doro, dan den kan opo a doro gi en wantewante. Koloku fu den srafu te a masra doro èn a e si taki den de na ai!”​—Lukas 12:35-37.

A no muilek gi den disipel fu frustan san Yesus e taki. Den futuboi na ini na agersitori de srekasreka aladi den e wakti teleki a masra fu den drai kon baka. Yesus e taki: „Koloku fu den te [a masra] si taki den de na ai te a doro latilati neti [9 yuru te 12 yuru] noso te mindrineti pasa kaba [12 yuru te 3 yuru]!”​—Lukas 12:38.

Yesus no e fruteri na agersitori fu sori taki den musu de futuboi di e wroko tranga na ini oso. Disi de krin fu si te Yesus, a Manpikin fu libisma, e sori taki na agersitori abi fu du nanga en. A e taigi den disipel fu en: „Unu musu de srekasreka tu, bika a Manpikin fu libisma e kon na wan yuru di unu no ben prakseri” (Lukas 12:40). Sobun, wan ten o doro pe Yesus o drai kon baka. A wani taki den bakaman fu en musu de na ai, spesrutu den wan fu a „pikin ipi”.

Fu di Petrus wani frustan krin san Yesus wani taigi den, meki a e aksi: „Masra, na wi yu e fruteri na agersitori disi, noso yu e fruteri ala sma?” Yesus no e piki Petrus langalanga, ma na presi fu dati a e fruteri en wan agersitori di abi fu du nanga a fosiwan. A e taki: „Suma na a futuboi di de fu frutrow trutru, a koniwan, di en masra sa poti fu luku ala den futuboi fu en, so taki a kan tan gi den nofo nyanyan na a reti ten? Koloku fu a srafu te en masra doro èn a si taki a srafu e du dati! Fu tru, mi e taigi unu: A sa poti a srafu fu luku ala den sani di a abi.”​—Lukas 12:41-44.

Na ini a fosi agersitori, a de krin taki „a masra” na Yesus, a Manpikin fu libisma. Wi kan frustan taki „a futuboi di de fu frutrow” na wan grupu man di de memre fu a „pikin ipi”. Den man disi o kisi a Kownukondre tu (Lukas 12:32). Dyaso Yesus e taki dati son memre fu a „pikin ipi” o gi „ala den futuboi fu en” san den abi fanowdu. Den o gi den „nofo nyanyan na a reti ten”. Sobun, Petrus nanga den tra disipel di Yesus e gi leri musu frustan taki wan ten o doro pe a Manpikin fu libisma o kon. Na a ten dati wan grupu sma o de di e gi leri na den bakaman fu Yesus, sobun na „ala den futuboi” fu a Masra.

Yesus e sori na wan tra fasi fu san ede den disipel fu en musu tan na ai èn fu san ede den musu luku fa den e tyari densrefi. A e du dati fu di a kan pasa taki den disipel bigin du den wroko moro safri èn taki den bigin gens den brada nanga sisa fu den srefi. Yesus e taki: „Ma kon meki wi taki dati a srafu prakseri: ’Mi masra no e kon ete.’ Dan a bigin fon ala den man nanga uma di de futuboi tu, a e nyan, a e dringi, èn a e kon drungu. Efu a masra fu a srafu dati kon na wan dei di a srafu no e fruwakti èn na wan yuru di a no sabi, dan a masra o gi en wan bun hebi strafu. A o gi a srafu san a musu kisi makandra nanga den sma di no e gi yesi na a masra.”​—Lukas 12:45, 46.

Yesus e taki dati a kon „fu leti wan faya na grontapu”. A sani disi tru, fu di a e taki fu tori di e tyari bigi dyugudyugu kon na ini a libimakandra  èn di e meki taki sma e drai baka gi falsi leri nanga gwenti. Den sani di a e taki e meki srefi taki pratifasi kon na mindri den sma di musu de na ini wánfasi. Iya, trobi o de na mindri „wan papa nanga en manpikin èn wan manpikin nanga en papa, wan mama nanga en umapikin èn wan umapikin nanga en mama, wan mama nanga a wefi fu en manpikin èn wan wefi nanga a mama fu en masra”.​—Lukas 12:49, 53.

Den sani disi di Yesus taki, na spesrutu gi den disipel fu en. Baka dati a e taki nanga a pipel. Furu fu den sma tranga-ede, fu di den e weigri fu bribi taki Yesus na a Mesias aladi furu buweisi de. Dati meki Yesus e taigi den: „Te unu e si wolku e komopo fu west-sei, dan wantewante unu e taki: ’Wan sibibusi o kon’ èn na so a e pasa tu. Te unu e si taki wan winti e wai komopo fu zuidsei, dan unu e taki: ’A o faya tide’, èn na dati e pasa tu. Hoigriman, unu e frustan fu san ede grontapu nanga loktu tan wan fasi, ma fa a du kon taki unu no e frustan a spesrutu ten disi?” (Lukas 12:54-56) A de krin taki den no de srekasreka.

Kon sabi moro

A WAKTITOREN

Fu san ede Krestes o kon baka?

Fu san ede Krestes o kon baka? Na sortu fasi a o drai kon baka èn san a o du?