Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 80

A Moro Bun Skapuman nanga den skapupen

A Moro Bun Skapuman nanga den skapupen

YOHANES 10:1-21

  • YESUS E TAKI FU A MORO BUN SKAPUMAN ÈN FU DEN SKAPUPEN

Yesus e go doro fu gi leri na ini Yudea. Now a e fruteri den sma fu wan sani di den alamala sabi. A e gi den wan agersitori fu skapu nanga skapupen. Te a e taki fu a tori disi, dan kande den Dyu e memre san David taki: „Yehovah na mi Skapuman. Mi no sa mankeri noti. A e meki mi didon na ini wei pe furu grasi e gro” (Psalm 23:1, 2). Na ini wan tra psalm, David ben gi a pipel a kari disi: „Meki wi saka kindi na fesi Yehovah wi Mekiman. En na wi Gado èn wi na en pipel. Wi na skapu na a weigron fu en” (Psalm 95:6, 7). Iya, langa ten kaba Gado Wortu agersi den Israelsma nanga skapu.

Den Israelsma de leki skapu na ini wan skapupen fu di den alamala de na ini a Wetfrubontu sensi den gebore. A Wet ben de leki wan skotu di ben e hori den aparti fu den tra pipel di ben abi takru gwenti èn di no ben de na ini a frubontu disi. Ma son Israelsma ben e du ogri nanga den skapu fu Gado. Yesus e taki: „Fu tru, mi e taigi unu: Efu wan sma no e waka na a doro fu go na ini a skapupen, ma a e kren kon na inisei na wan tra presi, dan a sma dati na wan fufuruman nanga wan abani. Ma a sma di e waka na a doro go na inisei, na a skapuman fu den skapu.”​—Yohanes 10:1, 2.

Kande a pipel e denki taki Yesus e taki fu den man di ben kari densrefi Mesias noso Krestes na ini a ten di pasa. Den man disi de leki fufuruman nanga abani. A pipel no musu waka baka den hoigriman disi. Na presi fu dati, den musu waka baka „a skapuman fu den skapu”. Yesus e taki fu a skapuman disi:

„A man di e hori wakti na a doro e opo a doro gi en èn den skapu e arki en sten. A e kari en eigi skapu na den nen èn a e tyari den go na dorosei. Te a tyari ala den skapu fu en go na dorosei, a e waka na den fesi èn den skapu e waka na en baka, fu di den sabi en sten. Noiti den o waka na baka wan sma di den no sabi. Na presi fu dati den o lowe gi en fu di den no sabi en sten.”​—Yohanes 10:3-5.

Wan tu yari pasa Yohanes a Dopuman di ben de leki a man di e hori wakti na a doro, ben sori den sma di e hori densrefi na a Wet taki Yesus na a sma di den musu waka na baka. Na ini Galilea èn dyaso na ini Yudea sonwan fu den skapu disi kon sabi Yesus sten. Pe Yesus ben o ’tyari’ den go? San ben o pasa te den ben o waka na en baka? Kande sonwan fu den sma di e arki Yesus e aksi densrefi den sani disi, fu di ’den no sabi san den sani disi wani taki’.​—Yohanes 10:6.

Yesus e taigi den: „Fu tru, mi e taigi unu: Mi na a doro pe den skapu musu pasa. Ala sma di kon fu teki mi presi, na fufuruman nanga abani. Ma den skapu no arki den. Mi na a doro. Efu wan sma waka pasa mi fu go na inisei, a o feni frulusu. A sa man go na inisei èn na dorosei, èn a o feni weigron.”​—Yohanes 10:7-9.

A de krin taki Yesus e taki dyaso fu wan nyun sani. Den arkiman sabi taki Yesus no de a doro fu a Wetfrubontu di de hondrohondro yari kaba. Sobun, a musu fu de so taki den skapu di a e ’tyari go na dorosei’ o go na ini wan tra skapupen. San na a bakapisi?

Yesus e tyari kon na krin sortu tra sani a o du. A e taki: „Mi kon fu meki sma kisi libi, iya, den o kisi têgo libi. Mi na a moro bun skapuman. A moro bun skapuman e gi en libi gi den skapu fu en” (Yohanes 10:10, 11). Wan pisi ten na fesi, Yesus ben trowstu den disipel fu en nanga den wortu disi: „No frede, un pikin ipi, bika un Tata feni en bun fu gi unu a Kownukondre” (Lukas 12:32). Sobun, den sma di de fu a „pikin ipi” na den wan di Yesus o tyari go na ini wan nyun skapupen,  so taki den kan „kisi libi, iya, den o kisi têgo libi”. Dati na wan bigi blesi!

Ma Yesus no kaba nanga a tori. A e taki: „Mi abi tra skapu tu, di no de fu a skapupen disi. Mi musu tyari den kon tu, èn den o arki mi sten èn den o tron wán ipi di abi wán skapuman” (Yohanes 10:16). Yesus taki dati a abi „tra skapu” di „no de fu a skapupen disi”. Sobun, a musu de so taki den tra skapu disi no de na ini a skapupen fu a „pikin ipi” di o kisi a Kownukondre. Den skapu na ini den tu difrenti skapupen abi difrenti howpu. Ma toku den skapu na ini ala tu pen o kisi wini fu a sani di Yesus o du. Yesus taki: „A Tata lobi mi fu di mi gi mi libi gi den.”​—Yohanes 10:17.

Furu fu den sma drape e taki: „A abi wan ogri yeye na en tapu èn a law.” Ma tra sma e poti prakseri na san Yesus taki èn den wani waka baka a Moro Bun Skapuman. Den e taki: „Wan sma di abi wan ogri yeye na en tapu no man taki den sani disi. Wan ogri yeye no man meki breni sma si, a no so?” (Yohanes 10:20, 21) A sori leki den e taki fu a man di ben breni sensi a gebore èn di Yesus ben dresi.