Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 77

Yesus e leri sma fa den musu si gudu

Yesus e leri sma fa den musu si gudu

LUKAS 12:1-34

  • NA AGERSITORI FU A GUDU MAN

  • YESUS E TAKI FU FOWRU NANGA LEILIBROMKI

  • WAN „PIKIN IPI” O DE NA INI A KOWNUKONDRE

Te Yesus e nyan na a oso fu a Fariseiman, dan dusundusun sma e wakti en na dorosei. A sani disi ben pasa wan tu leisi kaba di a ben de na ini Galilea (Markus 1:33; 2:2; 3:9). Dyaso na ini Yudea, furu sma wani si Yesus èn den wani yere san a abi fu taki. Den sma disi de heri tra fasi leki den Fariseiman di ben nyan makandra nanga Yesus.

Yesus e bigin taki fu wan sani di prenspari spesrutu gi den disipel fu en. A e taki: „Luku bun nanga a srudeki fu den Fariseiman, dati na a hoigrifasi fu den.” Yesus ben warskow den gi a sani disi kaba, ma a sani di a si di a ben e nyan makandra nanga den Fariseiman e sori o prenspari a rai disi de (Lukas 12:1; Markus 8:15). A kan taki den Fariseiman e pruberi fu gi sma a denki taki den e anbegi Gado fayafaya, ma den ati takru. Dati meki sma musu kon sabi taki den musu luku bun nanga den man disi. Yesus e taki: „Nowan sani kibri so bun taki a no sa kon na krin, èn nowan kibritori de di sma no sa kon sabi.”​—Lukas 12:2.

Kande furu fu den sma di e tanapu lontu Yesus, na Yudeasma di no ben yere en di a ben e gi leri na ini Galilea. Dati meki Yesus e taki baka fu wan tu fu den prenspari sani di a ben taki kaba. A e gi ala den sma di e arki en a rai disi: „No frede den sma di kan kiri yu èn baka dati den no man du noti moro” (Lukas 12:4). A e sori den bakaman fu en krin taki den musu abi a frutrow taki Gado o sorgu gi den. A ben gi den a rai disi wan tu leisi kaba. Den sma musu bribi tu taki en na a Manpikin fu libisma èn den musu frustan taki Gado man yepi den.​—Mateyus 10:19, 20, 26-33; 12:31, 32.

Ne wan man na mindri a pipel taki fu wan sani di e gi en broko-ede: „Leriman, taigi mi brada meki a prati a gudu nanga mi di wi papa libi gi wi” (Lukas 12:13). A Wet e taki dati a fosi manpikin musu kisi tu tron moro leki san den tra manpikin e kisi. Sobun, trobi no musu de na mindri a man disi nanga en brada (Deuteronomium 21:17). Ma a gersi leki a man disi wani moro leki san a abi reti na tapu. Yesus e du wan koni sani. A no e teki sei. A e taki: „Suma poti mi leki krutuman fu unu, noso leki a sma di musu prati sani na un mindri?”​—Lukas 12:14.

Dan Yesus e gi ala den sma drape a rai disi: „Tan na ai èn luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi” (Lukas 12:15). Awansi omeni gudu wan man abi, toku a o dede te fu kaba èn a o libi ala sani na baka, a no so? Dan Yesus e fruteri den sma wan moi agersitori fu meki den frustan a tori disi krin èn fu sori den o prenspari a de fu abi wan bun nen na Gado.

A e taki: „A gron fu wan gudu man ben gi furu nyanyan. Fu dati ede a bigin prakseri: ’San mi o du, now di mi no abi wan presi fu poti a nyanyan fu a gron?’ Dati meki a taki: ’Mi o du disi: Mi o broko den maksin fu mi puru, dan mi o bow moro bigiwan èn drape mi o poti ala mi aleisi nanga ala den bun sani fu mi. Dan mi o taki na misrefi: „We, mi poti wan lo bun sani na wan sei gi furu yari. Mi o teki en safrisafri, mi o nyan, dringi èn meki prisiri.”’ Ma Gado taigi en: ’Yu don man, tideneti srefi yu o lasi yu libi. Dan suma o kisi den sani di yu tyari kon na wán?’ Na so a sa waka nanga a sma di e tyari moro nanga moro gudu kon na wán gi ensrefi, ma di no gudu na ini Gado ai.”​—Lukas 12:16-21.

Den disipel fu Yesus nanga den tra sma di e arki en musu luku bun taki den no e bigin feti baka gudu. Boiti dati, den sorgu fu a libi kan meki taki den no e dini Yehovah nanga den heri  ati moro. Dati meki Yesus e gi den a srefi koni rai di a ben gi sma wán nanga afu yari na fesi di a ben hori a prenspari lezing fu en na tapu a bergi.

A e taki: „No broko un ede moro nanga un libi, iya, nanga san unu o nyan, noso san unu o weri na un skin. . . . Luku den fowru bun. Den no e sai, den no e koti nyanyan, èn den no abi maksin noso wan presi fu kibri nyanyan. Toku Gado e gi den nyanyan. Unu no warti moro leki den fowru? . . . Luku fa den leilibromki e gro. Den no e wroko tranga èn den no e brei titei, ma mi e taigi unu: Srefi Salomo di ben abi someni glori no ben weri so moi leki wan fu den bromki disi. . . . Fu dati ede, no prakseri moro san unu o nyan nanga san unu o dringi, èn no broko un ede moro. . . . Un Tata sabi taki unu abi den sani disi fanowdu. . . . Tan suku en Kownukondre, èn unu o kisi ala den sani disi tu.”​—Lukas 12:22-31; Mateyus 6:25-33.

Suma o suku Gado Kownukondre? Yesus e sori taki wan pikin grupu, noso wan „pikin ipi” reti-ati sma o du dati. Bakaten a o kon na krin taki 144.000 sma nomo o de na ini a grupu disi. San den o kisi? Yesus e pramisi den: „Un Tata feni en bun fu gi unu a Kownukondre.” Den sma disi no o feti fu kisi gudu na grontapu pe fufuruman kan fufuru den. Na presi fu dati, den o poti ala den prakseri na ’den bun sani di den abi na hemel èn di no e kaba noiti’. Drape den o tiri makandra nanga Krestes.​—Lukas 12:32-34.