Go na content

Go na table of contents

Yehovah Kotoigi

Tongo Sranantongo

 KAPITEL 73

Wan Samaria man e sori taki a lobi tra sma trutru

Wan Samaria man e sori taki a lobi tra sma trutru

LUKAS 10:25-37

  • FA SMA KAN KISI TÊGO LIBI?

  • WAN SAMARIA MAN E SORI TAKI A LOBI TRA SMA

Te Yesus de krosibei ete fu Yerusalem, dan son Dyu e kon na en. Sonwan fu den wani leri sani fu en, ma trawan wani tesi en. Wan fu den Dyu di wani tesi Yesus, na wan man di sabi a Wet heri bun. A e aksi Yesus a sani disi: „Leriman, san mi musu du fu kisi têgo libi?”​—Lukas 10:25.

Yesus e si taki a man disi no e aksi en a sani disi, soso fu di a wani sabi a piki. Kande a wani taki Yesus piki en na wan fasi di o meki den Dyu ati bron. Yesus e si taki a man disi abi en eigi denki kaba fu a sani di a aksi en. Dati meki Yesus e piki a man na wan koni fasi fu tyari kon na krin san en srefi e denki.

Yesus e aksi en: „San skrifi na ini a Wèt? San yu leisi?” Fu di a man disi studeri a Wet fu Gado, meki a e taigi Yesus san skrifi na ini a Wet disi. A e taki san skrifi na ini Deuteronomium 6:5 nanga Lefitikus 19:18: „’Yu musu lobi Yehovah yu Gado nanga yu heri ati, nanga yu heri libi, nanga ala yu krakti èn nanga yu heri frustan’. A Wèt e taki sosrefi: ’Yu musu lobi tra sma leki fa yu lobi yusrefi’” (Lukas 10:26, 27). A man piki bun?

Yesus e taigi a man: „Yu piki bun. ’Tan du disi, dan yu o kisi libi.’” Ma yu denki taki dati na a kaba fu a tori? Nôno. A no wan piki nomo a man wani tapu a aksi fu en. Na sori a wani sori taki a denki fu en bun èn taki a fasi fa a e libi nanga tra sma no fowtu. Dati meki a e aksi: „Suma na den tra sma di mi musu lobi?” (Lukas 10:28, 29) A gersi leki a man e aksi Yesus wan lawlaw sani, ma a no aksi en a sani dati fu soso. Fa so?

Den Dyu e bribi taki den „tra sma” di den musu lobi na soso den wan di e hori densrefi na den Dyu gwenti. Kande a gersi leki Lefitikus 19:18 e horibaka gi a denki disi. Fu taki en leti, wan Dyu ben kan feni taki a „no fiti srefisrefi” fu moksi nanga wan sma di no de wan Dyu (Tori 10:28). Dati meki a man disi èn kande wan tu fu den disipel fu Yesus, feni taki den e du san reti te den e sori switifasi gi tra Dyu. Ma den feni taki den no abi fu sori switifasi gi wan sma di no de wan Dyu, fu di a sma a no wan fu den.

Fa Yesus kan sori a man nanga tra Dyu taki den abi wan fowtu denki, sondro taki a e hati den firi fu den? A e fruteri den wan tori: „Wan man ben saka komoto fu Yerusalem go na Yerikow, di fufuruman ròs en. Den puru en krosi na en skin èn den fon en te fu dede, dan den gowe libi en drape.” Yesus e fruteri moro fara: „Na so a pasa now taki wan priester ben e waka a pasi dati, ma di a si a man, a waka pasa na abrasei. A srefi sani wan Leifisma du tu. Di a doro drape èn a si a man, dan a waka pasa na abrasei. Ma wan Samariasma di ben waka a pasi dati, kon si a man èn a firi sari gi en.”​—Lukas 10:30-33.

A man di Yesus e fruteri a tori musu fu sabi taki furu priester nanga Leifisma di e wroko na ini a tempel e libi na ini Yerikow. Te den e gowe libi a tempel, den abi fu teki wan pasi di langa sowan 23 kilometer. Ogri kan miti sma na a pasi disi fu di fufuruman e luru sma drape. Efu wan priester nanga wan Leifisma e si taki wan tra Dyu de na nowtu, dan den musu yepi en, a no so? Na ini a tori disi, Yesus e fruteri taki den no du dati. A sma di yepi a man na wan Samaria man, èn den Dyu no lobi Samariasma kwetikweti.​—Yohanes 8:48.

Fa a Samaria man yepi a Dyu di ben kisi mankeri? Yesus e fruteri moro fara: „A go na a man, a tai den soro fu en, dan a kanti oli nanga win na tapu den soro. Baka dati, a poti a man na tapu en eigi buriki èn a tyari en go na wan presi pe sma e yuru kamra èn a sorgu a man. A tamara fu en a teki tu solfru moni, dan a gi dati na a sma di ben abi a presi èn a taigi en: ’Sorgu gi a man èn efu yu gebroiki moro moni leki san mi gi yu, dan mi o pai yu dati te mi drai kon baka.’”​—Lukas 10:34, 35.

Baka te a Bigi Leriman Yesus kaba fruteri a tori,  a e aksi a man wan sani di e meki a denki: „Suma fu den dri sma yu denki, sori taki den lobi a man di fufuruman ben ròs?” Kande a man e syen fu taki: „A Samaria man.” Dati meki a e piki: „A sma di ben sori taki a ben abi sari-ati nanga a man.” Ne Yesus e sori a man krin san a wani leri en. A e taigi en: „We, dan go du a srefi sani tu.”​—Lukas 10:36, 37.

Disi na wan moi fasi fu gi leri! Efu Yesus ben taigi a man nomo taki a musu lobi sma tu di no de Dyu, dan yu denki taki a man nanga den tra Dyu di de drape ben o agri nanga Yesus? Nôno. Ma di a fruteri den arkiman a tori disi, a taki fu sani di den sabi heri bun. Na so den kon si krin san na a piki tapu na aksi, „Suma na den tra sma di mi musu lobi?” Te wan sma e sori lobi nanga switifasi gi trawan soleki fa Gado Wortu e taki, dan a e sori taki a lobi tra sma trutru.