Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 38

Yohanes wani yere fu Yesus srefi efu en na a Mesias

Yohanes wani yere fu Yesus srefi efu en na a Mesias

MATEYUS 11:2-15 LUKAS 7:18-30

  • YOHANES WANI SABI EFU YESUS NA A MESIAS

  • YESUS E PRÈISE YOHANES

Yohanes a Dopuman de na strafu-oso pikinmoro wán yari kaba. Ma a e yere fu den wondru di Yesus e du. Prakseri fa Yohanes e firi te den disipel fu en e taigi en taki Yesus gi a manpikin fu wan uma fu Nain wan opobaka. Ma Yohanes wani yere fu Yesus srefi san ala den sani disi wani taki. Dati meki a e seni tu disipel fu en go na Yesus. Fu du san? Den musu aksi Yesus: „Na yu na a sma di musu kon, noso wi musu fruwakti wan tra sma?”​—Lukas 7:19.

Kande yu no ben o denki taki Yohanes ben o aksi so wan sani. Yohanes na wan man di e dini Gado fayafaya. Di a dopu Yesus sowan tu yari pasa, a si a yeye fu Gado saka kon na tapu Yesus èn a yere di Gado taki dati a feni Yesus bun. Sobun, wi no abi fu denki taki a bribi fu Yohanes kon swaki. Efu dati ben de so, dan Yesus no ben o prèise Yohanes, soleki fa a e du dati na a okasi disi. Ma efu Yohanes no e tweifri, dan fu san ede a wani sabi suma na Yesus trutru?

A kan taki Yohanes wani yere fu Yesus srefi taki en na a Mesias. Disi ben o tranga a bribi fu Yohanes di e pina na ini strafu-oso. A kan tu taki na aksi fu Yohanes wani taki moro srefi. Yohanes sabi den profeititori na ini Bijbel di e sori taki a Salfuwan fu Gado ben o tron wan kownu nanga wan frulusuman. Baka di Yesus dopu, sma poti Yohanes na strafu-oso èn a de drape omeni mun kaba. Dati meki a e aksi efu wan tra sma o kon baka Yesus fu meki ala den profeititori fu a Mesias kon tru.

Yesus no e taigi den disipel fu Yohanes langalanga: ’Iya, mi na a Sma di musu kon.’ Na presi fu dati Yesus e taigi den taki a dresi di a e dresi ala sortu siki sma, e sori taki Gado e horibaka gi en. Dan a e taigi den disipel: „Go fruteri Yohanes san unu yere èn san unu si: Den breni sma e si baka, den malengri sma e waka, den gwasiman e kon krin, den dofu sma e yere, den dede sma e kisi wan opobaka, èn den pôti sma e yere a bun nyunsu.”​—Mateyus 11:4, 5.

Kande Yohanes poti na aksi tu fu di a e fruwakti taki Yesus o du moro leki san a e du now èn kande a e denki taki Yesus o puru en na strafu-oso. Ma Yesus e taigi Yohanes taki a no musu fruwakti taki a o du moro sani leki den wondru di a e du now.

Te den disipel fu Yohanes e gowe, Yesus e taigi den sma di de drape taki Yohanes no de wan profeiti nomo. En na „a boskopuman” di Yehovah ben taki fu en na ini Maleaki 3:1. En na a profeiti Elia tu di kari na ini Maleaki 4:5, 6. Yesus e taki: „Fu tru, mi e taigi unu: Fu ala den sma di ben de na libi, nowan bigi moro Yohanes a Dopuman. Ma toku a moro pikinwan na ini a Kownukondre fu hemel, bigi moro en.”​—Mateyus 11:11.

Di Yesus taki dati a moro pikinwan na ini a Kownukondre fu hemel, bigi moro Yohanes, a sori taki Yohanes no o de na ini a Kownukondre na hemel. Yohanes sreka a pasi gi Yesus, ma a o dede fosi Krestes opo a pasi gi sma fu go na hemel (Hebrewsma 10:19, 20). Toku Yohanes na wan profeiti di e dini Gado fayafaya èn a o tron wan fu den sma di o libi na grontapu ondro a tiri fu Gado Kownukondre.