Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 63

Yesus e gi den apostel tra prenspari rai

Yesus e gi den apostel tra prenspari rai

MATEYUS 18:6-20 MARKUS 9:38-50 LUKAS 9:49, 50

  • A E WARSKOW DEN GI SANI DI KAN MEKI SMA FADON

  • SAN FU DU TE WAN BRADA SONDU TEIGE YU

Didyonsro Yesus sori den apostel fu en fa den musu si densrefi. Den musu si densrefi leki yongu pikin, fu di pikin abi sakafasi èn den no e broko den ede nanga posisi. Te den disipel o ’teki den yongu pikin disi na ini Yesus nen, dan den o teki Yesus tu’.​—Mateyus 18:5.

Wan pisi ten pasa den apostel ben haritaki nanga makandra suma na a moro bigiwan. Sobun, kande den feni taki Yesus piri-ai gi den. Now na apostel Yohanes e taki fu wan tra sani di pasa didyonsro: „Wi si wan man di ben yagi ogri yeye puru na sma tapu èn a ben gebroiki yu nen. Ma wi ben pruberi fu tapu en, bika a no e waka nanga wi.”​—Lukas 9:49.

A de so taki Yohanes e denki taki den apostel wawan abi a reti fu dresi sma èn fu puru ogri yeye na sma tapu? Efu dati de so, dan fa a kan taki a Dyu man disi man puru ogri yeye na sma tapu? A gersi leki Yohanes feni taki a man no musu du wondru fu di a no e waka nanga Yesus nanga den apostel.

Ma Yesus e taigi Yohanes wan sani di a no e fruwakti. A e taki: „Un no musu pruberi fu tapu en, bika efu wan sma e du wan bigi wondru na ini mi nen, dan a no o taki takru fu mi so esi. Bika a sma di no de teige wi, e horibaka gi wi. Efu wan sma e gi unu wan kan watra fu dringi, fu di unu na disipel fu Krestes, fu tru, mi e taigi unu taki a sma dati o kisi en pai trutru.”​—Markus 9:39-41.

A de krin taki a man disi e horibaka gi Krestes, ma nownow a no de fanowdu ete fu waka nanga Krestes. A Kresten gemeente no seti ete. Sobun, awansi a man no e waka nanga Yesus, toku dati no wani taki dati a e gens en noso taki a e panya falsi leri. A de krin taki a man e bribi na ini Yesus nen, èn den sani di Yesus e taki e sori taki a o kisi blesi.

Ma a ben o de wan seryusu sani efu den apostel ben o taki noso du sani di ben o meki a man fadon. Yesus e taki: „Efu wan sma e meki taki wan fu den pikinwan disi di abi bribi, fadon, dan a moro bun taki den e anga wan bun bigi miriston na en neki èn tyari en go trowe na se” (Markus 9:42). Wan tra sani di Yesus e sori den bakaman fu en, na taki den musu puru iniwan sani di kan meki den fadon, awansi a sani dati prenspari leki wan anu, wan futu, noso wan ai. A moro bun fu go na ini a Kownukondre sondro so wan sani, leki fu go nanga a sani dati na ini Gehenna (disi wani taki Lagipresi fu Hinom). A musu fu de so taki den apostel si a lagipresi disi pe sma e bron doti krosibei fu Yerusalem. Sobun, den kan frustan taki Gehena e prenki têgo pori.

Yesus e warskow tu: „Luku bun taki unu no e wisiwasi wan fu den pikinwan disi, bika mi e taigi unu taki ala ten den engel fu den na ini hemel, e si mi Tata.” O prenspari „den pikinwan” dati de gi Yesus en Tata? Yesus e fruteri fu wan man di abi 100 skapu, ma di e lasi wán fu den. A man e libi den 99 trawan na baka fu go suku a wan di lasi. Te a feni  en a e prisiri moro nanga a wán skapu dati, leki nanga den 99 trawan. Yesus e taki tu: „Mi Tata na hemel no wani kwetikweti taki wan fu den pikinwan disi musu lasi libi.”​—Mateyus 18:10, 14.

Kande Yesus e prakseri fa den apostel fu en ben e haritaki nanga makandra suma o de a moro bigiwan. Dati meki a e gi den a rai disi: „Un musu abi sowtu na ini un libi èn tan libi bun nanga makandra” (Markus 9:50). Wan sma kan poti sowtu gi nyanyan fu meki a kon moro switi. Na so a de tu te wi e taki nanga sma. Te wi e taki na wan switi fasi, dan dati o meki en moro makriki gi trawan fu arki wi, èn na so freide o de. Sani no o waka so, te wi e haritaki nanga makandra.​—Kolosesma 4:6.

Son leisi, seryusu problema o opo kon, ma Yesus e taigi wi san fu du te dati pasa. A e taki: „Efu yu brada du wan sondu teige yu, go sori en san na a sondu te yu nanga en wawan de. Efu a e arki yu, dan yu wini yu brada.” Ma fa a de efu a no wani arki? Yesus e gi a rai disi: „Efu a no e arki yu, dan tyari ete wán noso tu sma nanga yu, so taki tu noso dri kotoigi kan taki efu wan tori tru noso efu a no tru.” Efu dati no e lusu a problema, dan den musu taki nanga „a gemeente”. Disi wani taki dati wi musu taki nanga den owruman fu a gemeente di kan yepi wi fu lusu a problema. Ma fa a de efu toku a sma di sondu no e arki ete? Yesus e taki: „Meki a de gi yu leki wan grontapusma èn leki wan sma di e teki belasting-moni gi lanti.” Den Dyu no ben e bemui nanga den sortu sma disi.​—Mateyus 18:15-17.

Gemeente owruman musu hori densrefi na Gado Wortu. Efu den owruman bosroiti taki wan sma musu kisi piri-ai fu wan sondu di a du, dan a bosroiti fu den musu kruderi nanga a fasi fa Yehovah e denki. Sobun, a bosroiti fu den „tai kaba na hemel”. Ma te den bosroiti taki wan sma no fowtu, dan a bosroiti fu den „lusu kaba na hemel”. Te a Kresten gemeente o seti bakaten, den rai disi o de wan bigi yepi gi den. Yesus sori fa sani de te den owruman e taki fu den seryusu tori disi. A taki: „Te tu noso dri sma kon makandra na ini mi nen, dan mi de drape na den mindri.”​—Mateyus 18:18-20.