Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 59

Suma na a Manpikin fu libisma?

Suma na a Manpikin fu libisma?

MATEYUS 16:13-27 MARKUS 8:22-38 LUKAS 9:18-26

  • YESUS E DRESI WAN BRENI MAN

  • PETRUS O KISI DEN SROTO FU A KOWNUKONDRE

  • YESUS E TAKI DATI A O DEDE ÈN DATI A O KISI WAN OPOBAKA

Yesus nanga den disipel fu en doro na Betsaida. Den sma e tyari wan breni man kon na en èn den e begi en fu fasi a man so taki a kan kon betre.

Yesus e hori a man na en anu, dan a e tyari en go na dorosei fu a dorpu. Baka te Yesus spiti na tapu den ai fu a man, a e aksi en: „Yu e si wan sani?” A man e piki: „Mi e si sma, bika mi e si sani di gersi bon, ma den e waka lontu” (Markus 8:23, 24). Te Yesus e poti en anu na tapu a man en ai, a man e bigin si krin. Dan a e seni a man disi go na oso. A e taigi a man taki a no musu go na ini a dorpu.

Baka dati Yesus nanga den disipel fu en e go na Sesareya Filipi di de na ini a bergikontren na noordsei. Den e waka bun fara, sowan 40 kilometer. A dorpu disi hei sowan 350 meter moro leki a se. Na noord-owstusei yu abi Hermon-bergi. Kande den e waka wan tu dei langa.

Te den de na pasi Yesus e go na wan presi fu de en wawan so taki a kan begi. Neigi noso tin mun nomo libi ete fosi a o dede. Sobun, a e broko en ede nanga den disipel fu en. Furu fu den no e waka na en baka moro. Soleki fa a sori, dan trawan bruya noso den feni taki sani no waka soleki fa den ben fruwakti. Kande den e aksi densrefi fu san ede Yesus no ben wani taki den sma poti en leki kownu, noso fu san ede a no ben wani gi den wan marki fu sori suma na en trutru.

Te den disipel kon pe Yesus e begi, a e aksi den: „San den sma e taki fu a Manpikin fu libisma?” Den e piki: „Son sma e taki dati en na Yohanes a Dopuman, trawan e taki Elia. Trawan baka e taki dati en na Yeremia, noso wan fu den profeiti.” Iya, den sma e denki taki Yesus na wan fu den man dati di kisi wan opobaka. Fu di Yesus wani luku fa den disipel e denki, meki a e aksi: „Ma san unu e taki?” Wantewante Petrus e piki: „Yu na a Krestes, a Manpikin fu a libilibi Gado.”​—Mateyus 16:13-16.

Yesus e taki dati Petrus musu breiti fu di Gado yepi en fu frustan disi. A e taki sosrefi: „Mi e taigi yu tu: Yu na Petrus. Na tapu a bigi ston disi mi o bow mi gemeente, èn Dede no o abi krakti na en tapu.” Yesus wani sori taki en srefi o seti a Kresten gemeente èn efu den memre fu a gemeente tan dini Gado te na dede dyaso na grontapu, dan den o kisi wan opobaka. A e pramisi Petrus: „Mi o gi yu den sroto fu a Kownukondre fu hemel.”​—Mateyus 16:18, 19.

Ma Yesus no taki dati Petrus prenspari moro den tra apostel èn a no taki dati Petrus na a fondamenti fu a gemeente. Yesus srefi na a Bigi Ston di a gemeente o bow na tapu (1 Korentesma 3:11; Efeisesma 2:20). Ma Petrus o kisi dri sroto. Disi wani taki dati a o kisi a grani fu opo  a pasi gi difrenti grupu sma fu go na ini a Kownukondre fu hemel.

Petrus ben o gebroiki a fosi sroto na a Pinksterfesa fu a yari 33. Den Dyu nanga den trakondre sma di ben teki a Dyu bribi ben o sori berow èn Petrus ben o sori den san den musu du fu kisi frulusu. A ben o gebroiki a di fu tu sroto fu opo a pasi gi den Samariasma di e bribi na ini Krestes, so taki den kan go na ini Gado Kownukondre. Baka dati na ini a yari 36, Petrus ben o gebroiki a di fu dri sroto fu gi trakondre sma di no besnèi na okasi disi. Wan fu den sma disi na Kornelius.​—Tori 2:37, 38; 8:14-17; 10:44-48.

Yesus e taigi den apostel fu en tu taki a no o teki langa moro fosi a o pina èn dede na ini Yerusalem. Te den apostel yere disi den e sari. Fu di Petrus no e frustan taki Yesus o kisi wan opobaka èn taki a o go na hemel, meki a e tyari en go na wan sei, dan a e piri-ai gi en. A e taigi en: „Masra, du yusrefi wan bun. A sani disi no o miti yu kwetikweti.” Ma Yesus e drai en baka gi Petrus èn a e taki: „Komoto na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki.”​—Mateyus 16:22, 23.

Now Yesus e kari den apostel nanga den tra sma kon na en èn a e taki dati a libi no o makriki gi den sma di wani de bakaman fu en. A e taki: „Efu wan sma wani kon na mi baka, dan a no musu teri ensrefi moro, ma a musu teki en pinapostu èn a musu tan waka na mi baka. Bika a sma di wani kibri en libi, o lasi en. Ma a sma di e lasi en libi fu mi ede èn fu a bun nyunsu ede, o kibri en.”​—Markus 8:34, 35.

Efu wan bakaman fu Yesus wani taki Yesus feni en bun, dan a musu abi deki-ati èn a no musu teri ensrefi moro. Yesus e taki: „Efu wan fu den e syen gi mi èn gi den sani di mi e taigi den, dan a Manpikin fu libisma o syen gi a sma dati tu te a doro nanga a glori fu en Tata, makandra nanga den santa engel” (Markus 8:38). Fu dati ede, te Yesus o kon „a sa pai ibriwan sma gi san den du”.​—Mateyus 16:27.