Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 21

Yesus de na a snoga na ini Nasaret

Yesus de na a snoga na ini Nasaret

LUKAS 4:16-31

  • YESUS E LEISI FU A BUKULOLO FU YESAYA

  • SMA FU NASARET E PRUBERI FU KIRI YESUS

Furu sma na ini Nasaret e taki fu Yesus. Moro leki wan yari pasa Yesus ben go na Yohanes meki a dopu en. Na a ten dati sma ben sabi en leki wan temreman nomo. Ma now sma sabi en leki wan man di e du bigi wondru. Den sma fu Nasaret de fayafaya fu si sortu wondru a o du drape.

Te Yesus e go na ini a snoga leki fa a gwenti, ala sma e wakti fu si san a o du. Den e begi èn den e leisi pisi fu den buku fu Moses, soleki fa den gwenti du „na ini den snoga ibri Sabat-dei” (Tori 15:21). Den e leisi pisi tu fu den buku fu den profeiti. Te Yesus e opo tanapu fu leisi wan pisi, a e si furu sma di a sabi, fu di furu yari a gwenti go na a snoga dati. Den e gi en a bukulolo fu a profeiti Yesaya. A feni a pisi di e taki dati Yehovah ben o salfu wan sma nanga santa yeye. Na ini a ten disi wi kan feni a pisi dati na ini Yesaya 61:1, 2.

Yesus e leisi fa a sma di Yehovah salfu ben o preiki taki den katiboman o de fri, taki den ai fu den breniwan o opo èn taki a ten o doro te Yehovah o sori sma bun-ati. Yesus e gi a dinari a bukulolo baka, dan a e go sidon. Ala sma e luku en. Dan a e taki nanga den fu wan pisi ten. Wan fu den sani di a e taki na disi: „Tide den wortu di unu yere didyonsro kon tru.”​—Lukas 4:21.

Den sma e fruwondru fu „den moi sani di a ben taki”, èn den e taigi makandra: „Disi a no wan manpikin fu Yosef?” Ma fu di Yesus sabi taki den wani en fu du wondru soleki fa a ben du dati na den tra presi, meki a e taki: „Mi sabi taki unu o koti na odo disi gi mi: ’Datra, dresi yusrefi.’ Dan unu o taki: ’Den sani di wi yere yu du na Kaperna-um, du den dyaso tu na ini yu eigi kontren’” (Lukas 4:22, 23). Den sma fu Nasaret feni taki Yesus ben musu bigin du wondru na en eigi tanpe. A ben musu du bun gi en eigi sma fosi. Sobun, kande den feni taki Yesus no teri den.

Fu di Yesus sabi fa den e denki, meki a e fruteri den wan tu sani di pasa na ini Israel fositen. Na ini a ten fu Elia furu uma ben de na ini Israel di den masra ben dede kaba. Ma Gado no seni Elia go na nowan fu den uma disi. Na presi fu dati, a go na wan uma fu a foto Sarfat di ben de krosibei fu Sidon. Na uma disi no ben de wan Israelsma èn en masra ben dede kaba. Elia ben du wan wondru di meki taki na uma disi tan na libi (1 Kownu 17:8-16). Èn na ini a ten fu Elisa furu gwasiman ben de na ini Israel, ma a profeiti dresi soso Naman fu a kondre Siria.​—2 Kownu 5:1, 8-14.

Den sma fu Nasaret kon frustan taki Yesus fruteri den tori disi fu sori den taki den e denki densrefi nomo èn taki den no abi bribi. San den e du fu dati ede? Den sma na ini a snoga ati e bron srefisrefi. Den e opo èn den e yagi Yesus komoto na ini a foto. Den e tyari en go na a lanki fu a bergi pe Nasaret bow na tapu, èn den e pruberi fu trowe en go na gron. Ma Yesus man komoto na den mindri èn a e lowe gowe. Now Yesus e go na Kaperna-um di de na a noordwest-sei na a syoro fu a Se fu Galilea.