Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 39

Helu fu wan pipel di no abi berow

Helu fu wan pipel di no abi berow

MATEYUS 11:16-30 LUKAS 7:31-35

  • YESUS E PIRI-AI GI DEN SMA FU WAN TU FOTO

  • A E TAIGI SMA TAKI A KAN GI DEN KRAKTI BAKA

Yesus abi bigi lespeki gi Yohanes a Dopuman, ma fa furu sma e denki fu Yohanes? Yesus taki: „Den [sma fu a ten disi] de leki den yongu pikin di e sidon na wowoyo, e kari den mati di e prei nanga den. Den e taki: ’Wi bro froiti gi unu, ma unu no dansi. Wi singi sari singi, ma unu no sari.’”​—Mateyus 11:16, 17.

San Yesus ben wani taki nanga a sani dati? A e fruteri fu san ede a taki a sani dati: „Yohanes kon tu èn a no ben nyan noso dringi. Toku sma e taki: ’A abi wan ogri yeye na en tapu.’ A Manpikin fu libisma kon èn a ben nyan èn dringi. Toku sma e taki ete: ’Luku! A sma dati na wan gridi man èn a lobi dringi furu win. A de wan mati fu den sma di e teki belasting-moni gi lanti èn wan mati fu den sondari’” (Mateyus 11:18, 19). Yohanes ben e libi leki wan Nasireisma, a no ben abi furu sani èn a no ben e dringi win srefi. Toku den sma ben e taki dati a abi wan ogri yeye na en tapu (Numeri 6:2, 3; Lukas 1:15). Ma Yesus e libi leki den tra sma. Toku den sma feni taki a e nyan èn dringi tumusi furu aladi dati no de so. Sobun, awinsi san Yohanes nanga Yesus e du, a sori leki den no man plisi den sma.

Yesus e agersi den sma fu a ten dati nanga yongu pikin di e sidon na wowoyo, di no wani dansi te tra pikin e bro froiti gi den, èn di no e sari te trawan e singi sari singi. A taki tu: „Iya, na den bun sani di wan sma e du, e sori taki a koni” (Mateyus 11:16, 19). Sobun, den ’bun sani di Yohanes nanga Yesus e du’ e sori taki den sma no ben abi leti fu krutu den.

Baka di Yesus taki dati den sma disi no abi berow, a e piri-ai gi den foto Korasen, Betsaida nanga Kaperna-um pe a du furu wondru. Yesus taki dati efu a ben du den wondru disi na ini den foto Tirus nanga Sidon pe den Fenisiasma e libi, dan den sma dati ben o abi berow. Srefi na ini Kaperna-um pe Yesus ben e tan wan pisi ten, furu sma no e bribi na ini en. Yesus e taki fu a foto dati: „Na a Krutudei a o moro hebi gi unu, leki gi a kondre Sodom.”​—Mateyus 11:24.

Yesus e prèise en Papa di kibri den moi leri fu Gado Buku „gi den koniman nanga sabiman”. Na presi fu dati, en Papa tyari den leri disi kon na krin gi den sma di abi sakafasi leki yongu pikin (Mateyus 11:25). Yesus e gi den sma disi wan moi kari: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka. Bika a tyatyari fu mi switi fu tyari èn mi lai lekti.”​—Mateyus 11:28-30.

Fa Yesus e gi den krakti baka? Den kerki fesiman e dwengi a pipel fu hori densrefi na gwenti di de leki wan hebi gi den. Fu eksempre, den gi a pipel wan lo wet di abi fu du nanga Sabat-dei. Ma Yesus e gi den krakti baka fu di a e leri den san Gado Wortu e taki trutru èn a e sori den taki den leri dati no abi noti fu du nanga den gwenti fu den kerki fesiman. Den tiriman sosrefi e meki a libi kon hebi gi a pipel èn son sma e firi brokosaka fu den sondu di den du. Ma Yesus e sori den fa den kan de koloku èn disi e meki den kisi krakti baka. Iya, Yesus e sori den sma disi fa den kan kisi pardon fu den sondu fu den èn fa den kan plisi Gado.

Ala sma di wani kon na ondro a lekti tyatyari fu Yesus kan gi densrefi abra na Gado èn den kan dini wi lobi-ati hemel Tata di abi sari-ati. Te den e du disi, den no o tyari wan hebi lai moro fu di den wet fu Gado no hebi.​—1 Yohanes 5:3.

Kon sabi moro

A WAKTITOREN

„Sortuwan fu den komando na a moro prenspari wan?”

Wán wortu sari kaba fu taki san a e aksi fu wi.