Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 56

San e doti wan sma trutru?

San e doti wan sma trutru?

MATEYUS 15:1-20 MARKUS 7:1-23 YOHANES 7:1

  • YESUS E SORI KRIN TAKI LIBISMA GWENTI NO MUSU PRENSPARI MORO GADO WET

A Paskafesa fu a yari 32 e doro. Yesus e gi leri na ini Galilea. Baka wan pisi ten a e go na Yerusalem fu hori a Paskafesa soleki fa Gado Wet e taki. Ma a e luku bun fu di den Dyu wani kiri en (Yohanes 7:1). Baka dati a e drai go baka na Galilea.

A kan taki Yesus de na ini Kaperna-um te den Fariseiman fu Yerusalem e kon na en. Fu san ede den e kon na en? Den wani feni sani fu krutu Yesus taki a no e hori ensrefi na a Dyu bribi. Den e aksi: „Fu san ede den disipel fu yu no e du san den sma fu fositen ben gwenti du? Fu eksempre, den no e wasi den anu fosi den e go nyan” (Mateyus 15:2). Gado noiti no ben taigi en pipel taki den musu abi a gwenti disi fu „wasi den anu te na den baka-anu” (Markus 7:3). Toku den Fariseiman e si en leki wan seryusu sondu fu no du dati.

Na presi fu piki den langalanga, Yesus e sori den fa den e trangayesi Gado Wet fu espresi. „Fu san ede unu srefi no e du san a komando fu Gado e taki, soso fu di unu wani hori den gwenti fu unu?”, na so a e aksi. „Gado taki fu eksempre: ’Lespeki yu papa nanga yu mama.’ A ben taki tu: ’A sma di e kosi en papa, noso mama, musu dede.’ Ma unu e taki: ’Efu wan sma e taigi en papa noso mama: „Ala san mi abi fu ben kan yepi yu, mi gi spesrutu na Gado”, dan a sma dati no abi fu lespeki en papa kwetikweti.’”​—Mateyus 15:3-6; Eksodes 20:12; 21:17.

Efu wan sma ben sweri fu gi en moni, en gron noso wan tra sani na Gado, dan den ben e kari a sani dati „korban”. Den Fariseiman ben feni taki so wan sani na fu a tempel èn sma no ben kan gebroiki en gi wan tra sani. Ma a sma di meki a sweri no ben abi fu tyari en go wantewante na a tempel èn a ben kan gebroiki a sani gi ensrefi ete. Den Fariseiman ben feni taki efu wan manpikin ben taki dati den gudu fu en na „korban”, dan a no ben abi fu gebroiki den gudu dati fu sorgu en mama nanga papa. Na so a ben kan puru a frantwortu na en tapu fu sorgu en owru papa nanga mama di abi yepi fanowdu.​—Markus 7:11.

Yesus abi leti fu ati bron nanga den man disi di e drai Gado Wet. A e taigi den: „Unu meki a wortu fu Gado lasi krakti, soso fu di unu wani hori den gwenti fu unu. Un hoigriman, a profeiti Yesaya ben abi leti di a ben taki fu unu: ’A pipel disi e gi mi grani nanga den mofo nomo, ma den ati de farawe fu mi. Na fu soso den e tan anbegi mi, bika na den komando fu libisma den e leri trawan.’” Den Fariseiman no man piki Yesus te a e krutu den. Yesus e kari den sma di de drape kon moro krosibei. A e taigi den: „Un arki èn frustan san disi wani taki: ’A no san e go na ini wan sma mofo, e doti en. Ma na san e komoto na en mofo, na dati e doti en.’”​—Mateyus 15:6-11; Yesaya 29:13.

Bakaten te Yesus de na ini wan oso, den disipel e aksi en: „Yu sabi taki den Fariseiman ati bron di den yere san yu taki?” A piki den: „Ibri bon di mi hemel Tata no prani, a o hari puru. Libi den. Den sma disi e sori trawan a pasi, ma den srefi breni. Fu dati ede efu wan breniman musu sori wan tra breniman a pasi, dan den ala tu o fadon go na ini wan peti.”​—Mateyus 15:12-14.

Fu di den disipel no man frustan san e doti wan sma trutru, meki Petrus e aksi Yesus fu fruklari a tori gi den. Yesus e taigi den: „Unu no sabi taki ala san e go na ini a mofo, e go na ini a bere, dan a e doro na ini wan gotro? Ma san e komoto na a mofo e kon fu na ati èn na dati e doti wan sma. Fu eksempre, disi na den sani di e kon fu na ati: ogri prakseri, kiri, sutadu, hurudu, fufuru, leitori, a taki di wan sma e taki ogri  fu trawan. Disi na san e doti wan sma. Ma te wan sma e nyan sondro fu wasi en anu, dan dati no wani taki dati a no krin.”​—Mateyus 15:17-20.

Yesus no e taki dati wan sma no musu krin ensrefi èn a no e taki tu dati wan sma no musu wasi en anu fosi a go bori noso fosi a nyan wan nyanyan. Na presi fu dati, a e krutu den kerki fesiman di e hoigri èn di e hori densrefi na libisma gwenti fu di den no wani gi yesi na den wet fu Gado. Fu taki en leti, wan sma e du ogri fu di a abi ogri prakseri na ini en ati. Na den sani dati e doti en.