Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 33

Yesus e meki a profeititori fu Yesaya kon tru

Yesus e meki a profeititori fu Yesaya kon tru

MATEYUS 12:15-21 MARKUS 3:7-12

  • IPI-IPI SMA E PUSU KON NA YESUS TAPU

  • A E MEKI A PROFEITITORI FU YESAYA KON TRU

Di Yesus yere taki den Fariseiman nanga den partèiman fu Herodes wani kiri en, en nanga den disipel fu en e go na a Se fu Galilea. Ipi-ipi sma fu ala sei e kon na en. Den sma disi komoto na Galilea, den foto Tirus nanga Sidon di de na sesyoro, Yerusalem, den foto abrasei fu Yordan-liba, nanga Idumeya di de te na zuidsei. Yesus e dresi furu siki sma. Dati meki den sma di abi hebi siki e pusu kon na en tapu. Den no e wakti fu Yesus fasi den, ma den e feti „fu fasi en”.​—Markus 3:9, 10.

So furu sma de na Yesus, taki a musu taigi den disipel fu en fu suku wan pikin boto gi en. A wani go na ini a boto èn hari gowe fu a syoro, so taki den sma no e pusu kon na en tapu moro. Boiti dati, a kan gi den sma leri aladi a de na ini a boto, noso a kan go na wan tra presi fu yepi moro sma.

A disipel Mateyus e si taki Yesus e meki ’den sani di a profeiti Yesaya taki kon tru’ (Mateyus 12:17). Sortu profeititori na dati?

„Luku mi futuboi! Na en mi teki, en na mi lobiwan èn na en mi feni bun! Mi o poti mi yeye na en tapu èn a o sori den pipel san na retidu. A no o haritaki, a no o bari tranga èn nowan sma o yere en sten na den bigi strati. A no o masi wan warimbo di broko èn a no o kiri wan faya di e suku fu dede. A o tyari ensrefi na a fasi disi teleki a poti ala sani kon reti baka. Iya, na tapu en nen den pipel o howpu.”​—Mateyus 12:18-21; Yesaya 42:1-4.

A no de fu taki dati Yesus na a futuboi di Gado lobi èn di A feni bun. Yesus e sori krin san na trutru retidu. Den falsi kerkigwenti e meki taki sma no man si krin san na trutru retidu. Fu di den Fariseiman e fruklari Gado Wet na den eigi fasi, meki den no wani yepi wan sma srefi efu a siki na Sabat-dei! Den kerkigwenti disi de leki wan hebi gi a pipel, ma Yesus e puru a hebi disi na den tapu fu di a e sori den san na a retidu fu Gado. A de krin fu si tu taki Gado yeye de na en tapu. Dati meki den kerki fesiman wani kiri en. Den man disi ati takru srefisrefi!

A profeititori e taki tu dati Yesus „no o haritaki, a no o bari tranga èn nowan sma o yere en sten na den bigi strati”. San disi wani taki? Te Yesus e meki den sma kon betre baka, a no wani taki den sma noso den ogri yeye di a e puru na den sma tapu, „meki sma kon sabi suma na en” (Markus 3:12). Son leisi te wan sma si noso yere  wan sani di naki en ati, dan a e fruteri a tori disi na wan heri tra fasi fu meki a tori kon moro span. Ma Yesus no wani taki sma yere fu en na a fasi disi èn a no wani taki sma bari na strati suma na en èn san a e du.

Yesus e tyari wan boskopu tu di e trowstu den sma di de leki warimbo di broko noso leki faya di e suku fu dede. Yesus no e masi den warimbo disi èn a no e kiri den faya di de fu dede. Na presi fu dati a e trowstu den safri-ati sma disi èn a e sori den lobi nanga switifasi. Iya, Yesus na a sma di e gi den pipel howpu!