Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 50

Yesus e sreka den apostel fu preiki awinsi den o kisi frufolgu

Yesus e sreka den apostel fu preiki awinsi den o kisi frufolgu

MATEYUS 10:16–11:1 MARKUS 6:12, 13 LUKAS 9:6

  • YESUS E LERI DEN APOSTEL FU PREIKI ÈN A E SENI DEN GO PREIKI

Yesus e gi den apostel bun rai fa fu du a preikiwroko te den e go preiki tu na tu. Ma a no dati wawan a e du. Fu di a e broko en ede nanga den, meki a e warskow den tu gi gensman. A e taki: „Luku, mi e seni unu go leki skapu na mindri busidagu . . . Luku bun nanga sma, bika den o tyari unu go na krutu èn den o wipi unu na ini den snoga fu den. Iya, fu mi ede, den o tyari unu go na fesi granman nanga kownu.”​—Mateyus 10:16-18.

Iya, den bakaman fu Yesus kan kisi hebi frufolgu, ma a e gi den a dyaranti disi: „Te den e tyari unu go drape, un no musu broko un ede fa unu o taki noso san unu o taki. Na a ten dati unu o sabi san un musu taki, bika a no unu srefi o taki, ma a Tata o gi unu krakti so taki unu o sabi san fu taki.” Yesus e taki moro fara: „Wan brada o tyari en eigi brada go kiri èn wan papa o du a srefi nanga en pikin. Pikin o opo densrefi teige den papa nanga mama èn den o meki sma kiri den. Fu mi nen ede, sma o teige unu. Ma a sma di horidoro te na a kaba, o kisi frulusu.”​—Mateyus 10:19-22.

Fu di a preikiwroko prenspari srefisrefi, meki Yesus e taigi den bakaman fu en taki den musu du sani nanga koni. Na so den kan tan preiki a bun nyunsu sondro taki sma tapu den fu du dati. A e taki: „Te den e frufolgu unu na ini a wan foto, dan lowe go na wan tra foto. Bika mi e taigi unu, unu no o kaba preiki na ala den foto fu Israel, fosi a Manpikin fu libisma doro.”​—Mateyus 10:23.

Dati na wan tu moi rai, warskow nanga deki-ati di Yesus e gi den 12 apostel fu en! Ma wi kan frustan taki den sani di Yesus taki abi fu du tu nanga den sma di ben o du a preikiwroko baka te Yesus dede èn opo baka. Yesus taki: „No wan sma no o man si un na ai” (Mateyus 10:22, Nyun Testamenti). Sobun, a no soso den sma di den apostel ben o miti na ini a preikiwroko ben o teige den. Tra sma ben o teige den tu. Boiti dati, wi no e leisi taki sma ben tyari den apostel na fesi granman nanga kownu na ini a syatu pisi ten di den ben e preiki na ini Galilea. Wi no e leisi tu taki famiri fu den meki sma kiri den.

A de krin taki den sani di Yesus taigi den apostel abi fu du nanga a ten di e kon. A ben taki dati den disipel fu en no ben o kaba du a preikiwroko „fosi a Manpikin fu libisma doro”. Yesus ben wani sori taki den disipel no ben o kaba preiki fu Gado Kownukondre, fosi Kownu Yesus Krestes di kisi glori ben o kon leki a krutuman di Gado poti.

Den apostel musu fruwakti taki sma o frufolgu  den te den e du a preikiwroko, bika Yesus taki: „Wan disipel no bigi moro en leriman èn wan srafu no bigi moro en masra.” A de krin san Yesus wani sori den. Sma e du ogri nanga en èn den e frufolgu en fu di a e preiki fu Gado Kownukondre. Na a srefi sani o pasa nanga den disipel. Ma toku Yesus e taki: „No frede den sma di kan meki a skin kisi pori, ma di no kan tapu yu fu kisi libi baka. Na presi fu dati yu musu frede a sma di kan kiri yu na ini Gehena.”​—Mateyus 10:24, 28.

Yesus ben de wan eksempre gi wi na ini a tori disi. Sondro fu frede a horidoro te na dede èn noiti a drai baka gi Yehovah, a sma di abi ala makti. Na a Almakti Gado wawan man meki wan sma go na ini Gehena. (So wan sma no o kisi libi noiti moro.) Boiti dati, na en wawan man gi sma wan opobaka so taki den kan libi fu têgo. Disi musu fu gi den apostel deki-ati trutru!

Yesus e gi wan agersitori fu sori fa Gado e sorgu den disipel na wan lobi-ati fasi. A e taki: „Sma e seri tu pikin fowru gi wan sensi di no warti furu, a no so? Ma toku nowan fu den fowru o fadon na gron sondro fu un Tata sabi. . . . Fu dati ede no frede, bika unu warti moro leki wan heri ipi pikin fowru.”​—Mateyus 10:29, 31.

A boskopu di den disipel fu Yesus e preiki o tyari pratifasi kon na ini osofamiri fu di son sma o bribi den èn trawan no o bribi den. „No prakseri taki mi kon fu tyari freide na grontapu”, na so Yesus e taki. Efu wan sma na ini wan osofamiri wani du san Bijbel e leri, a musu abi deki-ati. Yesus taki: „A sma di lobi en papa, noso en mama moro mi, no warti fu de mi disipel. A sma di lobi en manpikin, noso en umapikin moro mi, no warti fu de mi disipel.”​—Mateyus 10:34, 37.

Toku son sma o de di e du bun gi den disipel. Yesus taki: „Efu wan sma e gi wan fu den pikinwan disi soso wan kan kowru watra fu dringi fu di en na wan disipel, mi e taigi unu fu tru, a o kisi en pai.”​—Mateyus 10:42.

Baka te Yesus gi den apostel den bun rai, warskow nanga deki-ati disi, den e go na „ala den dorpu na ini a heri kontren fu fruteri a bun nyunsu na ala presi èn fu meki sma kon betre.”​—Lukas 9:6.

Kon sabi moro

SAN NA A BOSKOPU FU BIJBEL?

Den apostel e preiki sondro fu frede

San pasa na a Pinksterfesa? San den feanti du di den disipel fu Yesus bigin preiki?