Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 37

Yesus e gi wan yongu man wan opobaka

Yesus e gi wan yongu man wan opobaka

LUKAS 7:11-17

  • WAN SMA FU NAIN E KISI WAN OPOBAKA

A no langa baka di Yesus dresi a srafu fu a legre-ofsiri, a e komoto na Kaperna-um èn a e go na Nain, wan foto di de moro leki 32 kilometer na zuidsei. A no de en wawan. Den disipel fu en nanga wan bigi ipi sma e waka nanga en. Soleki fa a sori, dan den e doro na den boitipresi fu Nain na mofoneti. Den e si wan grupu Dyu di e tyari a dedeskin fu wan yongu man go beri dorosei fu a foto.

A sma di e sari moro ala tra sma, na a mama fu a yongu man disi. En masra ben dede kaba èn now en wan-enkri pikin dede tu. Di en masra dede a ben abi en manpikin ete. Na a boi disi ben o sorgu en bakaten. A no de fu taki dati a ben lobi en srefisrefi. Ma now a boi fu en kon dede tu. Suma o tan nanga en? Suma o sorgu en?

Te Yesus e si fa na uma disi e sari so te èn a e frustan taki a no abi nowan sma moro, dan a e firi sari gi en. Fu gi en deki-ati, a e taki na wan switi fasi: „No krei moro.” Ma a no e du dati nomo. A e waka go na a dragi pe a dedeskin de na tapu èn a e fasi en (Lukas 7:13, 14). A fasi fa Yesus e taki èn den sani di a e du e meki taki a grupu sma di e tyari a yongu man go beri, e tan tanapu. Kande den e aksi densrefi: ’Fu san ede a taigi na uma fu no krei moro? San a o du now?’

Fa a de nanga den sma di e waka nanga Yesus? Den ben si fa a e du wondru èn fa a e dresi sma. Ma kande den no si noiti taki a gi wan dede sma libi baka. Bun langa pasa son sma ben gi dedewan wan opobaka. Ma Yesus man du so wan sani? (1 Kownu 17:17-23; 2 Kownu 4:32-37) Yesus e taki: „Yonkuman, mi e taigi yu: Opo!” (Lukas 7:14) Èn na dati e pasa tu. A yongu man e opo èn a e bigin taki! Dan Yesus e gi en na en mama di no man bribi san pasa. A mama breiti srefisrefi taki a abi en boi baka.

Te den sma e si taki a yongu man de na libi trutru, den e prèise Yehovah di e gi sma libi.  Sonwan fu den e taki: „Wan bigi profeiti opo na wi mindri.” Trawan e frustan san a wondru di Yesus du wani taki. Den e taki: „Gado poti prakseri na en pipel” (Lukas 7:16). A nyunsu fu a wondru disi e panya esi-esi na ini a kontren drape. Kande a nyunsu doro srefi na Nasaret, a foto pe Yesus ben e tan, di de sowan 10 kilometer moro fara. Srefi na Yudea di de na zuidsei sma yere fu a tori disi.

Te now ete Yohanes a Dopuman de na strafu-oso, ma a wani sabi ala sani di Yesus e du. Den disipel fu Yohanes e kon fruteri en sortu wondru Yesus e du. Fa a feni den sani di a e yere?