Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 58

Yesus e meki brede kon moro furu èn a e warskow gi srudeki

Yesus e meki brede kon moro furu èn a e warskow gi srudeki

MATEYUS 15:32–16:12 MARKUS 8:1-21

  • YESUS E GI 4000 MAN NYANYAN

  • A E WARSKOW DEN DISPEL FU LUKU BUN NANGA A SRUDEKI FU DEN FARISEIMAN

Ipi-ipi sma kon na Yesus na a kontren fu Dekapolis na a owstusei fu a Se fu Galilea. Den kon fu yere san a abi fu taki èn fu meki a dresi den. Den sma tyari bigi baskita nanga nyanyan-sani na ini.

Ma bakaten Yesus e taigi den disipel: „Mi e sari den sma, bika na dri dei kaba den de nanga mi èn den no abi noti fu nyan. Efu mi seni den go na den oso sondro taki den nyan, den o flaw te den de na pasi. Sonwan fu den komoto fu farawe.” Ma den disipel e taigi en: „Pe wan sma o feni brede dya na so wan farawe presi fu gi den sma meki den nyan?”​—Markus 8:2-4.

Yesus e piki den: „Omeni brede unu abi?” Den disipel e taki: „Seibi nanga wan tu pikin fisi” (Mateyus 15:34). Dan Yesus e meki den sma sidon na tapu a gron. A e teki den brede nanga den fisi, a e begi Gado, dan a e gi den disipel fu prati gi den sma. Kande yu no o bribi, ma ala den sma nyan te den bere furu. Te den e piki den pisi brede di tan abra, den e furu seibi bigi baskita pe sma e poti nyanyan na ini. Toku sowan 4000 man kisi nyan. Srefi den umasma nanga pikin kisi nyanyan!

Baka te Yesus seni den sma gowe, en nanga den disipel e teki wan boto go na Magadan di de na a west-sei syoro fu a Se fu Galilea. Dyaso den Fariseiman nanga wan tu Saduseiman kon fu tesi Yesus. Den aksi en fu sori den wan marki fu Gado.

Fu di Yesus sabi fa den man disi e denki, meki a e taki: „Te a e kon dungru, unu gwenti taki: ’A o de wan moi neti, bika hemel redi.’ Na mamanten unu e taki: ’Tide a o de wan kowru dei èn alen o fadon, bika hemel redi, ma a dungrudungru.’ Unu sabi fruklari fu san ede a loktu tan wan fasi, ma unu no sabi fruklari san den marki fu a ten disi wani taki” (Mateyus 16:2, 3). Dan Yesus e taigi den Fariseiman nanga den Saduseiman taki den no o kisi nowan marki, boiti a marki fu Yona.

Baka dati Yesus nanga den disipel e teki wan boto go na Betsaida di de na a noord-owstusei syoro fu a se. Te den de na tapu a se, den e si taki den frigiti fu tyari nofo brede. Den abi wán brede nomo. Yesus e prakseri san ben pasa di a miti den Fariseiman nanga den Saduseiman di e horibaka gi Herodes. Dati meki a e warskow den disipel: „Un musu tan na ai. Luku bun nanga a srudeki fu den Fariseiman èn nanga a srudeki fu Herodes.” Den disipel e denki taki Yesus e taki fu srudeki fu di den frigiti fu tyari brede. Ma di Yesus si taki den no frustan en, a e taki: „Na fu di unu no abi brede, meki unu e haritaki?”​—Markus 8:15-17.

No so langa pasa Yesus gi dusundusun sma nyanyan. Sobun, den disipel musu sabi taki Yesus no e broko en ede taki den no abi nofo nyanyan. A e aksi den: „Unu frigiti taki mi ben prati den feifi brede gi den feifi dusun man? Omeni baskita unu ben furu nanga den pisi brede di ben  tan abra?” Den e piki en: „Twarfu.” Yesus e taki moro fara: „Di mi ben prati den seibi brede gi den fo dusun man, dan omeni bigi baskita unu ben furu nanga den pisi brede di ben tan abra?” Den e piki: „Seibi.”​—Markus 8:18-20.

Dan Yesus e aksi: „Fa a du kon taki unu no man si taki mi no ben taki fu brede?” A e taki tu: „Luku bun nanga a srudeki fu den Fariseiman nanga den Saduseiman.”​—Mateyus 16:11.

Now fosi den disipel e frustan san Yesus wani taki. Te sma e poti srudeki gi blon, dan a e panya na ini a heri blon èn a e meki a blon sweri. Dyaso Yesus wani sori taki den leri di kan pori sma denki de leki srudeki. A e warskow den disipel fu luku bun nanga „den leri fu den Fariseiman nanga den Saduseiman” fu di den leri dati e pori sma denki.​—Mateyus 16:12.