Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 27

Yesus e kari Mateyus

Yesus e kari Mateyus

MATEYUS 9:9-13 MARKUS 2:13-17 LUKAS 5:27-32

  • YESUS E KARI MATEYUS DI E TEKI BELASTING-MONI GI LANTI, FU TRON WAN BAKAMAN FU EN

  • KRESTES DE MAKANDRA NANGA SONDARI FU DI A WANI YEPI DEN

Baka te Yesus dresi a lan man, a e tan ete wan syatu pisi ten na ini Kaperna-um di de krosibei fu a Se fu Galilea. Ipi-ipi sma e kon na en èn a e bigin gi den leri. Te a de na pasi a e si Mateyus, di sma e kari Leifi tu. Mateyus e sidon na a kantoro pe sma e go fu pai belasting-moni. Yesus e gi en wan moi kari. A e taigi en: „Tron wan bakaman fu mi.”​—Mateyus 9:9.

Neleki Petrus, Andreas, Yakobus nanga Yohanes, a sori leki Mateyus sabi kaba san Yesus e leri sma èn sortu wondru a du na ini a kontren dati. Neleki den man dati, Mateyus e teki a kari fu Yesus wantewante. Na ini a Bijbel buku di Mateyus skrifi, en srefi e taki: „Wantewante a [Mateyus] opo go waka na Yesus baka” (Mateyus 9:9). Sobun, Mateyus e libi a wroko di a abi fu teki belasting-moni gi lanti èn a e tron wan bakaman fu Yesus.

Bakaten Mateyus e hori wan bigi fesa na en oso. Kande a e du disi fu sori taki a de nanga tangi taki Yesus kari en fu tron wan disipel fu en. Yesus nanga den disipel fu en de na a fesa disi. Ma suma moro de drape? Wan tu mati fu Mateyus di e du a srefi wroko di Mateyus ben e du. Den man disi e teki belasting-moni gi den tiriman fu Rome di a pipel no lobi srefisrefi. Den e teki belasting tapu den sipi di e kon na a lanpe, den e teki belasting tapu den grupu bisnisman di e waka na tapu den bigi pasi èn den e teki belasting tapu sani di sma e tyari kon fu tra kondre. Fa den Dyu e denki fu den man di e teki belasting-moni gi lanti? Den no lobi den srefisrefi, bika den gwenti aksi moro belasting-moni leki san den sma musu pai. Boiti den man disi, „sondari” de na a fesa tu. Disi na sma di no abi wan bun nen na ini a foto fu di den e du sani di no bun.​—Lukas 7:37-39.

Te den Fariseiman di denki taki den bun moro tra sma, e si nanga suma Yesus de na a fesa, den e aksi den disipel fu en: „Fu san ede a leriman fu unu e nyan nanga den sma di e teki belasting-moni gi lanti èn nanga den sondari?” (Mateyus 9:11) Ma Yesus e yere den, dan a e taki: „Gosontu sma no abi datra fanowdu, ma na siki sma abi datra fanowdu. Fu dati ede, go leri san disi wani taki: ’Mi wani sari-ati, mi no wani srakti-ofrandi.’ Bika mi no kon fu kari sma di e du san reti, ma mi kon fu kari sondari” (Mateyus 9:12, 13; Hosea 6:6). Den Fariseiman e hoigri fu di den e kari Yesus „leriman” aladi den no wani leri fu en. Ma a ben o bun efu den ben leri fu en fa fu du san reti.

Soleki fa a sori, dan Mateyus kari den sondari nanga den man di e teki belasting-moni gi lanti kon na en oso, fu di a wani taki den arki Yesus èn taki den tron mati fu Gado. Na so „furu fu den tron bakaman fu [Yesus]” (Markus 2:15). Yesus wani yepi den sma disi fu kon bun baka nanga Gado. Den Fariseiman e wisiwasi den sma disi fu di den denki taki den bun moro den. Ma Yesus no de so. A e firi gi den èn a e sori sari-ati gi den. A de leki wan datra di man yepi ala siki sma.

Ma disi no wani taki dati Yesus e tapu en ai gi den sondu fu den. Yesus e sori sari-ati gi den sondari nanga den man di e teki belasting-moni gi lanti, fu di a e firi gi den neleki fa a e firi gi den sma di ben abi wan trutru siki. Yu e memre fa Yesus ben dresi a gwasiman? Sari-ati ben meki taki a fasi en, dan a taki: „Mi wani. Kon krin” (Mateyus 8:3). Wi srefi musu meki muiti fu abi sari-ati gi sma èn wi musu yepi den. Wan prenspari fasi fa wi kan du dati, na fu yepi den fu tron mati fu Gado.