Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 62

Yesus e leri den taki a prenspari fu abi sakafasi

Yesus e leri den taki a prenspari fu abi sakafasi

MATEYUS 17:22–18:5 MARKUS 9:30-37 LUKAS 9:43-48

  • YESUS E TAKI BAKA DATI A O DEDE

  • A E PAI BELASTING-MONI NANGA WAN SENSI DI BEN DE NA INI WAN FISI MOFO

  • SUMA O DE A MORO BIGIWAN NA INI A KOWNUKONDRE?

Den disipel ben si fa Yesus kenki kon de heri tra fasi èn fa a ben dresi wan boi di ben abi wan ogri yeye na en tapu. Now Yesus e komoto fu Sesareya Filipi go na Kaperna-um. A e gowe soso nanga den disipel fu en, sondro taki den sma sabi (Markus 9:30). A e kisi na okasi baka fu sreka den disipel gi a dede fu en èn gi a wroko di den o du baka dati. A e taigi den: „Wan sma o tori a Manpikin fu libisma fu gi en abra na den feanti fu en. Den o kiri en èn a o kisi wan opobaka na a di fu dri dei.”​—Mateyus 17:22, 23.

Disi a no a fosi leisi di den disipel yere a sani disi. Yesus ben taki kaba taki sma ben o kiri en, ma Petrus no ben wani bribi taki disi ben o pasa (Mateyus 16:21, 22). Di den dri apostel si a fisyun pe Yesus kenki kon de heri tra fasi, den yere fa Moses nanga Elia taki dati Yesus ben o „gowe” (Lukas 9:31). Den bakaman fu en e „sari trutru” fu a sani di Yesus e taki, aladi den no e frustan san den wortu fu en wani taki trutru (Mateyus 17:23). Ma den frede fu aksi en moro fu a tori disi.

Bakaten den e kon na Kaperna-um, a foto pe Yesus gwenti tan èn pe wan tu fu den apostel ben e libi fosi. Drape wan tu man di e teki belasting-moni gi lanti e kon na Petrus. Den e aksi en: „A leriman fu unu no e pai a belasting-moni [fu a tempel]?” (Mateyus 17:24) Kande den e aksi disi fu di den wani krutu Yesus taki a no e pai belasting-moni.

Petrus e piki: „Iya.” Ma Yesus di de na a oso sabi kaba san pasa. Na presi fu wakti te Petrus taki wan sani, Yesus e aksi: „San yu denki, Simon? Fu suma den kownu fu grontapu e kisi edemoni noso belasting-moni? Fu den manpikin fu den, noso fu tra sma?” Petrus e piki: „Fu den tra sma.” Dan Yesus e taki: „Sobun, den manpikin no abi fu pai belasting-moni.”​—Mateyus 17:25, 26.

Yesus en Papa na a Kownu fu hemel nanga grontapu èn En na a sma di den e anbegi na a tempel. Sobun, Gado Manpikin no abi fu pai a belasting-moni fu a tempel. Yesus e taki: „Ma fu di wi no wani meki sma mandi, dan yu musu go uku na se èn teki a fosi fisi di yu kisi. Te yu opo en mofo, dan yu o feni wan solfru sensi [wan stater-moni, noso tetradrakmo]. Teki dati èn gi den a moni dati gi yu nanga mi.”​—Mateyus 17:27.

Syatu baka dati, te den disipel de makandra, den e aksi Yesus suma o de a moro bigiwan na ini a Kownukondre. No so langa pasa den srefi man disi ben frede fu aksi Yesus fu a dede fu en, ma now den no e frede fu aksi en suma o de a moro bigiwan na ini a Kownukondre. Yesus sabi san den e prakseri. Den ben e haritaki fu a sani disi kaba di den ben e waka na en baka kon na Kaperna-um. Dati meki a e aksi: „Fu san unu ben e haritaki di wi ben de na pasi?” (Markus 9:33) Den disipel e tan pî fu di den e syen taki den ben e haritaki suma na a moro bigiwan. Te fu kaba den apostel e aksi Yesus a sani di den wani sabi: „Suma o de a moro bigiwan na ini a Kownukondre fu hemel?”​—Mateyus 18:1.

Pikinmoro dri yari den disipel disi e arki Yesus èn den e teki leri fu en. Sobun, yu no ben o denki kande taki den ben o haritaki te now ete suma na a moro bigiwan. Ma den man disi na sondu sma. Den gro kon bigi na wan presi pe biginen nanga posisi prenspari srefisrefi. No so langa pasa Yesus ben pramisi Petrus tu taki a  ben o kisi „sroto” fu a Kownukondre. A kan taki a sani disi meki Petrus denki taki a bigi moro den trawan? Kande Yakobus nanga Yohanes abi a srefi denki tu fu di den si a fisyun pe Yesus kenki kon de heri tra fasi.

Awinsi san den e denki, Yesus e sori den fa den musu si densrefi. A e kari wan pikin kon na den mindri, dan a e taigi den disipel: „Efu unu no kenki a fasi fa unu e denki èn unu no tron leki yongu pikin, dan unu no sa go na ini a Kownukondre fu hemel kwetikweti. Fu dati ede, efu wan sma abi sakafasi neleki a yongu pikin disi, dan a sma dati na a moro bigiwan na ini a Kownukondre fu hemel. Efu wan sma e teki so wan yongu pikin na ini mi nen, dan a sma dati e teki mi tu.”​—Mateyus 18:3-5.

Dati na wan moi fasi fu gi leri! Yesus ati no bron nanga den disipel èn a no taigi den taki den abi bigi-ai noso taki den e feti fu kisi wan hei posisi. Na presi fu dati a gebroiki wan pikin fu leri den wan sani. Nofo tron yongu pikin no abi bigifasi, fu di den no abi wan hei posisi noso biginen. Yesus e sori den disipel taki na so den musu si densrefi. Te fu kaba, Yesus e taigi den bakaman fu en: „A sma di e tyari ensrefi leki a moro lagiwan fu un alamala, na a sma dati bigi.”​—Lukas 9:48.