Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 40

Yesus e leri sma taki den musu gi trawan pardon

Yesus e leri sma taki den musu gi trawan pardon

LUKAS 7:36-50

  • WAN UMA DI DU FURU SONDU E KANTI OLI NA TAPU YESUS FUTU

  • YESUS E GI WAN AGERSITORI FU SORI TAKI WI MUSU GI SMA PARDON

Den sani di Yesus e du e naki na ati fu furu sma, ma a no ala sma lobi en. Disi e kon na krin te a de na wan oso na ini Galilea. Wan Fariseiman di nen Simon e kari Yesus fu kon nyan nanga en. Kande a du disi fu leri sabi a sma di e du den bigi wondru. Soleki fa a sori, dan Yesus e si disi leki wan okasi fu preiki gi den sma di o kon drape. Dati meki a e teki a kari fu Simon, neleki fa a ben teki a kari fu tra sma di ben e nyan nanga sondari èn nanga sma di e teki belasting-moni gi lanti.

Ma te Yesus doro drape, den no e sori switifasi gi en, leki fa den gwenti du te wan sma kon na den oso. Den sma fu a ten dati ben gwenti weri opo susu. Sobun, te den ben e waka na ini den santipasi fu Palestina, dan den futu ben kon faya èn doti. Fu dati ede, te wan sma ben kon na den oso, den ben abi a gwenti fu wasi den futu fu en nanga watra. A no de fu taki dati so wan sma e firi switi te sma du dati gi en. Ma den no e du dati gi Yesus. Sma fu a ten dati ben abi a gwenti tu fu bosi wan sma di ben kon na den oso, fu gi en wan switikon. Ma den no e bosi Yesus. Wan tra gwenti di den ben abi, na taki den ben e kanti oli na tapu a wiwiri fu wan fisitiman fu sori en switifasi. Disi sosrefi den no e du gi Yesus. Sobun, a gersi leki den no breiti taki Yesus de drape.

Fosi den sma bigin nyan, den e go didon na a tafra. Te den e nyan, wan uma di no kisi wan kari e kon na inisei sondro fu sma si en. ’Sma fu a foto sabi na uma leki wan sondari’ (Lukas 7:37). Ala sma abi sondu, ma a sori leki na uma disi e libi wan yayolibi. Kande a de wan huru-uma. A kan taki a yere den leri fu Yesus, èn a yere di Yesus taki dati ’a o gi ala sma di musu tyari hebi lai, krakti baka’ (Mateyus 11:28, 29). Soleki fa a sori, dan den sani di Yesus taki èn den sani di a du abi so wan krakti tapu na uma disi, taki a kon na Yesus.

Na uma e waka kon na baka Yesus di e didon na a tafra, dan a e saka kindi na en futu. Te na uma e bigin krei, en watra-ai e fadon na tapu Yesus futu, èn a e figi Yesus futu nanga en ede-wiwiri. A e bosi Yesus en futu na wan safri fasi, dan a e kanti a switismeri oli di a tyari, na tapu Yesus futu. Simon e luku san na uma e du, ma a no lobi srefisrefi san e pasa. A e prakseri: „Efu a man disi ben de wan profeiti, dan a ben o sabi suma na a uma disi di e fasi en. A ben o sabi taki en na wan sondari.”​—Lukas 7:39.

Fu di Yesus sabi san Simon e denki, meki a e taki: „Simon, mi wani taigi yu wan sani.” Simon e taki: „Leriman, san yu wani taigi mi?” Yesus e taigi en: „Tu man ben abi wan paiman na wan sma di ben leni den moni. A wan ben abi wan paiman fu feifi hondro solfru moni, ma a trawan ben abi wan paiman fu feifitenti solfru moni. Di den no ben abi noti fu pai a paiman baka, dan nanga en heri ati a man di ben leni den a moni taigi den taki den no ben abi fu pai a paiman moro. We, sortuwan fu den tu man o lobi en moro?” Kande Simon e piki na wan fasi di e sori taki a no e span nanga san Yesus taki. A e piki: „Mi denki taki na a man di ben abi a moro bigi paiman.”​—Lukas 7:40-43.

Yesus e agri. Dan a e luku na uma, èn a e taigi Simon: „Yu si na uma disi? Mi kon na ini yu oso èn yu no gi mi watra fu wasi mi futu. Ma na uma disi nati mi futu nanga en watra-ai, dan a drei mi futu nanga en wiwiri. Yu no gi mi wan bosi, ma sensi a momenti di mi kon na inisei na uma disi tan bosi mi futu na wan safri fasi. Yu no ben lobi mi ede nanga oli, ma na uma disi ben lobi mi futu nanga switismeri oli.” Yesus ben kan si taki na uma ben abi berow trutru fu a sondu libi fu en. Dati meki a taki: „Mi e taigi yu taki aladi a abi furu sondu, toku a kisi pardon fu en sondu, bika a sori furu lobi. Ma a sma di no kisi furu pardon, no sori furu lobi.”​—Lukas 7:44-47.

Yesus no e sori taki a no fowtu fu du hurudu. Ma a abi sari-ati gi sma di abi berow fu den seryusu sondu di den du èn di e suku yepi na Krestes. Yu kan frustan fa na uma disi breiti te Yesus e taigi en: „Yu kisi pardon fu yu sondu. . . . A bribi fu yu frulusu yu. Meki sani waka bun gi yu.”​—Lukas 7:48, 50.

Kon sabi moro

A WAKTITOREN

Wi kan kisi pardon gi den sondu fu wi?

Gado e gi sma pardon gi seryusu sondu? Efu wi wani taki Gado feni wi bun, dan san wi musu du?

A WAKTITOREN

„Yehovah e gi unu pardon nanga en heri ati”

Gado de klariklari fu gi sondu sma pardon te den abi berow. Fa a sani dati musu meki taki wi libi nanga trawan? Fu san ede a de prenspari fu gi trawan pardon?