Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 25

Sari-ati meki taki Yesus dresi wan gwasiman

Sari-ati meki taki Yesus dresi wan gwasiman

MATEYUS 8:1-4 MARKUS 1:40-45 LUKAS 5:12-16

  • YESUS E DRESI WAN GWASIMAN

Fu di Yesus nanga den fo disipel fu en e preiki na ini ’den snoga na ini heri Galilea’, meki sma e taki fu en na ala sei (Markus 1:39). Na so a nyunsu doro na wan foto pe wan man de di abi gwasi. A datra Lukas skrifi taki a man disi „abi gwasi na en heri skin” (Lukas 5:12). Te wan sma abi a siki disi langa, dan safrisafri son pisi fu en skin e pori gowe.

Fu di a man disi abi so wan seryusu siki, meki a no mag tan na mindri tra sma. Te sma e kon na ini en birti, a musu bari: „Mi no krin, mi no krin!” A musu du disi, so taki den sma no kon so krosibei taki den kisi a siki tu (Lefitikus 13:45, 46). Ma san a gwasiman e du now? A e go na Yesus, a e boigi gi en, dan a e taki: „Masra, efu yu wani nomo, yu kan meki mi kon krin.”​—Mateyus 8:2.

Ai, a man e bribi trutru na ini Yesus! A sari srefisrefi fu si wan sma nanga so wan siki! San Yesus o du? San yu ben o du efu yu ben de drape? Fu di Yesus abi sari-ati gi a man, meki a e langa en anu fasi en. Yesus e taigi en: „Mi wani. Kon krin” (Mateyus 8:3). Den sma no man bribi. Wantewante a gwasi e komoto na a man skin.

Fa yu ben o feni en fu abi wan kownu di abi so furu sari-ati leki Yesus èn di man dresi ala siki? Te wi e prakseri a fasi fa Yesus dresi a man disi, dan wi de seiker taki te Yesus de Kownu fu heri grontapu, a Bijbel profeititori disi o kon tru: „A o firi sari gi den mofina sma èn gi den pôti sma èn a o frulusu den pôti sma” (Psalm 72:13). Iya, na a ten dati Yesus o du san a e angri fu du langa ten kaba. A o yepi ala sma di e pina.

Memre taki furu sma ben e taki kaba fu Yesus, fosi a dresi a gwasiman disi. Now den o yere fu a bigi wondru disi tu. Ma Yesus no wani taki sma poti bribi na ini en fu di den e yere den sortu tori disi nomo. A sabi taki wan profeititori e taki dati a no ben o du kefalek sani, soso fu meki sma „yere en sten na strati” (Yesaya 42:1, 2). Dati meki Yesus e taigi a man di ben abi gwasi: „Sorgu taki yu no fruteri nowan sma. Ma go meki a priester luku yu, dan yu musu tyari wan ofrandi soleki fa a wèt di Gado ben gi Moses taki.”​—Mateyus 8:4.

Ma wi kan frustan taki di a man disi kon betre a ben breiti so te, taki a no man tapu en mofo. A e go panya a nyunsu na ala sei. Now moro nanga moro sma wani sabi sani fu Yesus. So furu sma e yere fu Yesus, taki te fu kaba a no man go na ini wan foto sondro fu sma si en. Fu dati ede a e go fu wan pisi ten na presi pe nowan sma e libi. Toku sma e komoto na ala sei fu kon arki Yesus èn fu meki a dresi den.