Go na content

Go na table of contents

Yehovah Kotoigi

Tongo Sranantongo

 KAPITEL 43

Agersitori di abi fu du nanga a Kownukondre

Agersitori di abi fu du nanga a Kownukondre

MATEYUS 13:1-53 MARKUS 4:1-34 LUKAS 8:4-18

  • YESUS E FRUTERI AGERSITORI DI ABI FU DU NANGA A KOWNUKONDRE

Soleki fa a sori, dan Yesus de na ini Kaperna-um te a e piri-ai gi den Fariseiman. Moro lati a dei dati Yesus e gowe libi na oso, dan a e waka go krosibei fu a Se fu Galilea. Drape ipi-ipi sma e kon na en. Yesus e go na ini wan boto, a e hari gowe pikinso fu a syoro, dan a e bigin leri den sma sani fu a Kownukondre fu hemel. A e gi den leri nanga yepi fu agersitori. Den sma sabi furu fu den sani di Yesus kari na ini den agersitori. Disi e meki en makriki gi den fu frustan difrenti sani fu a Kownukondre.

Yesus e bigin fruteri den wan agersitori fu wan saiman di ben e sai siri. Wan tu siri fadon na seipasi èn den fowru kon nyan den. Tra siri fadon na tapu ston-gron pe furu doti no de. Ma fu di den rutu no man go dipi na ini a gron, meki a son e bron den pransun teleki den kon drei. Tra siri fadon na mindri den makabon. Di den pransun bigin gro, den makabon kiri den. Ma tra siri fadon na tapu bun doti. Den siri disi bigin gro èn den gi froktu. „A wan gi wán hondro tron so furu froktu, a trawan siksitenti tron so furu, èn ete wan trawan dritenti tron so furu.”​—Mateyus 13:8.

Na ini wan tra agersitori Yesus e taki dati a Kownukondre de neleki te wan man e sai siri. Te neti a man e sribi èn na deiten a e opo. Disiten a siri e gro, ma a man ’no sabi fa dati e pasa’ (Markus 4:27). Den siri e gro fu densrefi èn den e gi nyanyan. Te a nyanyan kon lepi kaba, a man e go koti en.

Yesus e fruteri a di fu dri agersitori di abi fu du nanga saiwroko. A e taki dati wan man ben sai bun siri, ma „di sma ben e sribi”, wan feanti kon sai takru wiwiri na mindri na aleisi. Den srafu fu a man aksi en efu den musu hari a takru wiwiri puru.  A taigi den: „Nôno, bika te unu e hari a takru wiwiri puru, dan unu ben sa kan hari na aleisi puru tu. Meki den ala tu gro makandra teleki a ten doro fu koti nyanyan. Te a kotiten doro, mi o taigi den sma di musu koti a nyanyan fu hari a takru wiwiri puru fosi, dan den musu tai den na ini bondru fu bron den. Baka dati den musu tyari na aleisi kon na wán fu poti en na ini mi maksin.”​—Mateyus 13:24-30.

Furu fu den sma di e arki Yesus sabi du gronwroko. Yesus e taki fu wan tra sani tu di furu fu den sma sabi. A e taki fu wan pikin mosterd-siri. A siri dati e tron so wan bigi bon, taki den fowru e feni wan tanpresi na den taki fu en. Yesus e taki fu a siri disi: „A Kownukondre fu hemel de leki wan mosterd-siri di wan man prani na ini en gron” (Mateyus 13:31). Ma Yesus no e fruteri den sma a tori disi fu leri den sani fu mosterd-bon. A e fruteri na agersitori disi fu sori fa wan sani di pikin srefisrefi kan gro kon tron wan bun bigi sani.

Baka dati, Yesus e taki fu wan tra sani di furu fu den arkiman sabi. A e taki dati a Kownukondre fu hemel de leki „srudeki di wan uma ben poti na ini wan bigi baki blon” (Mateyus 13:33). Wan sma no man si a srudeki di de na ini a blon, ma a srudeki e panya na ini a heri blon èn a e meki a blon sweri. A srudeki e kenki a blon èn a e meki a blon kon moro furu aladi wi no man si fa dati e pasa.

Te Yesus kaba fruteri den agersitori disi, a e seni den sma gowe, dan a e drai go baka na a oso pe a e tan. Syatu baka dati den disipel fu en e kon na en fu di den wani sabi san den agersitori wani taki.

SAN WI KAN LERI FU DEN AGERSITORI FU YESUS

Den disipel sabi taki Yesus ben fruteri agersitori kaba. Ma noiti ete a fruteri so furu agersitori baka makandra. Dati meki den e aksi en: „Fu san ede yu e fruteri agersitori te yu e taki nanga den sma?”​—Mateyus 13:10.

Wan sani fu san ede a e du dati, na fu meki Bijbel profeititori kon tru. Na ini a buku fu Mateyus skrifi: „A no ben taki nanga den sondro fu gi wan agersitori. Na so den sani di a profeiti taki, ben kan kon tru. A ben taki: ’Mi o opo mi mofo fu taki agersitori èn mi o meki sma kon sabi sani di ben kibri sensi a ten di grontapu seti.’”​—Mateyus 13:34, 35; Psalm 78:2.

Ma tra sani de fu san ede Yesus e fruteri agersitori. A e du disi fu tyari kon na krin san de na ini den sma ati. Furu fu den sma e go na Yesus fu di den e si en leki wan man di sabi fruteri tori bun èn di e du wondru. Ma den no e si en leki a Masra fu den. Efu den ben e si en na a fasi dati, den ben o gi yesi na en èn den ben o waka na en baka sondro fu denki densrefi nomo (Lukas 6:46, 47). Den no wani taki Yesus sori den taki den musu kenki a fasi fa den e denki èn a fasi fa den e libi. Fu taki en krin, den no wani taki a boskopu fu Yesus doro den ati.

Yesus e piki na aksi fu den disipel nanga den wortu disi: „Dati meki mi e fruteri agersitori te mi e taki nanga den, bika den e luku, ma den e luku fu soso, den e yere, ma den e yere fu soso, èn den no e frustan san a wani taki. Na fu den a profeiti Yesaya ben taki: ’. . . A pipel disi kon tranga-ede.’”​—Mateyus 13:13-15; Yesaya 6:9, 10.

Ma a no ala sma di yere Yesus de so. Yesus taki: „Koloku fu unu fu di un ai e si èn fu di un yesi e yere. Bika fu tru mi e taigi unu: Furu profeiti èn furu bun man ben angri fu si den sani di unu e si, ma den no ben si den. Den ben angri fu yere den sani di unu e yere, ma den no ben yere den.”​—Mateyus 13:16, 17.

 Iya, den 12 apostel nanga den tra reti-ati disipel wani frustan den leri fu Yesus. Dati meki Yesus e taigi den: „Na unu kisi a grani fu kon frustan den santa kibritori fu a Kownukondre fu hemel, ma den sma disi no kisi a grani dati” (Mateyus 13:11). Fu di den disipel wani frustan den agersitori trutru, meki Yesus e fruklari na agersitori fu a saiman gi den.

Yesus e taki: „A siri na a wortu fu Gado” (Lukas 8:11). A gron na a ati fu den sma. Disi na wan prenspari sani di kan yepi wan sma fu frustan na agersitori disi.

Yesus taki dati son siri ben fadon na seipasi èn sma waka na den tapu. A e tyari kon na krin san disi wani taki: „Didibri e kon èn a e puru a wortu na ini den ati. Dati meki den no e bribi èn den no o kisi frulusu” (Lukas 8:12). Yesus taki tu fu a siri di sai na tapu ston-gron. Disi na a ati fu sma di teki a wortu nanga prisiri, ma a wortu no e teki rutu dipi na ini den ati. „Te banawtu noso frufolgu kon fu a wortu ede”, den e lasi bribi. Kande den famiriman noso tra sma e gens den. Iya, te „tesi” kon, den e „fadon komoto”.​—Mateyus 13:21; Lukas 8:13.

Fa a de nanga a siri di fadon na mindri den makabon? Yesus e taigi den disipel taki disi abi fu du nanga sma di yere a wortu. Ma den e kisi fu du nanga „den broko-ede fu a grontapu disi nanga a bedrigifasi fu gudu” (Mateyus 13:22). A wortu ben de na ini den ati, ma now a dede gowe èn a no e meki froktu.

A lasti sortu gron di Yesus e taki fu en, na a bun gron. Disi abi fu du nanga sma di e yere a wortu èn di e teki en nanga den heri ati fu di den e frustan en krinkrin. San na a bakapisi? Den e „meki froktu”. Ma fu di sonwan fu den sma disi kon owru, den siki, noso den de na ini tra situwâsi, meki a no alamala man du a srefi. Dati meki  sonwan fu den e gi froktu 100 tron so furu, trawan 60 tron so furu èn trawan 30 tron so furu. Iya, Gado e blesi den wan di e ’yere a wortu, di e meki a wortu teki rutu na ini den ati èn di e meki froktu fu di den e horidoro’.​—Lukas 8:15.

A no de fu taki dati te den disipel yere ala den sani disi, den breiti taki den aksi en fu fruklari den agersitori gi den! Now den no e frustan den agersitori frafra moro, ma den e frustan den krin. Yesus wani den fu frustan den agersitori disi, so taki den srefi kan leri trawan san den wani taki. Yesus e taigi den: „Wan sma no e poti wan lampu na ondro wan baskita noso na ondro wan bedi, a no so? Ma a e poti a lampu na tapu wan hei presi, a no so?” Dati meki Yesus e gi den a rai disi: „A sma di abi yesi fu arki, meki a arki.”​—Markus 4:21-23.

A E LERI DEN MORO SANI

Baka di Yesus fruklari na agersitori fu a man di sai siri, den disipel wani sabi moro. Den e taki: „Fruteri wi san na agersitori fu a takru wiwiri na ini a gron wani taki.”​—Mateyus 13:36.

A sani di den disipel aksi Yesus e sori taki den abi wan heri tra denki leki den tra sma di ben e arki Yesus na a sesyoro. Soleki fa a sori, den sma dati yere den agersitori, ma den no wani kon sabi san den wani taki. Den breiti kaba te den e frustan den agersitori frafra. Fu sori fa den disipel fu en de heri tra fasi leki den sma disi, Yesus e taki:

„Arki bun san unu e yere. Na a fasi fa unu e libi nanga trawan, na a fasi dati den o libi nanga unu tu, iya, den o du moro leki dati srefi” (Markus 4:24). Den disipel e poti ala den prakseri na san Yesus e taki. Fu di den e arki bun èn fu di den e angri fu sabi moro, meki Yesus e leri den moro sani. Iya, a e tyari moro sani kon na krin gi den. Dati meki Yesus e fruklari na agersitori fu na aleisi nanga a takru wiwiri. A e taki:

„A man di ben sai a bun siri na a Manpikin fu libisma. A gron na grontapu. A bun siri na den manpikin fu a Kownukondre. Ma a takru wiwiri na den manpikin fu na ogriwan. A feanti di sai den siri na Didibri. A kotiwroko na a pisi ten te a kaba fu a grontapu disi de krosibei èn den sma di e koti a nyanyan na den engel.”​—Mateyus 13:37-39.

Baka di Yesus fruteri san ibriwan fu den sani na ini na agersitori wani taki, a e sori san o pasa te fu kaba. A e taki dati te a kaba fu a grontapu disi de krosibei, den sma di e koti a nyanyan (den engel) o puru den falsi Kresten (a takru wiwiri) na mindri den trutru „manpikin fu a Kownukondre”. Dan den o tyari „den sma di Gado feni bun” kon na wán. Te fu kaba den sma disi o brenki leki a son „na ini a Kownukondre fu den Tata”. San o pasa nanga „den manpikin fu na ogriwan”? Den o kisi pori. Dati meki „den o krei èn den o kaw tifi”.​—Mateyus 13:41-43.

Baka dati Yesus e fruteri den ete dri agersitori fu leri den tra moi sani. A e taki: „A Kownukondre  fu hemel de leki wan gudu di kibri na ini wan gron. Dan wan man feni en èn a go kibri en baka. A e prisiri so te, taki a e go seri ala den sani fu en èn a e bai a gron.”​—Mateyus 13:44.

A e taki tu: „A Kownukondre fu hemel de sosrefi leki wan bisnisman di ben e waka e seri sani èn di ben e suku peri di ben moi fu tru. Di a feni wán peri di ben warti furu, dan a gowe èn wantewante a seri ala den sani di a ben abi èn a bai a peri.”​—Mateyus 13:45, 46.

Nanga den tu agersitori disi Yesus e poti prakseri na den bigi kenki di wan sma e tyari kon fu kan feni wan tra sani di warti furu. Yesus taki dati wantewante a bisnisman e seri „ala den sani di a ben abi” fu kan bai a wán peri di warti furu. Den disipel fu Yesus man frustan na agersitori fu wan peri di warti furu. Na so a de tu nanga na agersitori fu a man di feni wan gudu na ini wan gron. A man e „seri ala den sani fu en” fu bai a gron. Ala tu agersitori e taki fu wan sani di warti srefisrefi. Sma kan kisi a sani disi èn den musu si leki wan prenspari sani. Den sani di den man e du fu man kisi a peri nanga a gudu, de leki den sani di wan sma e libi na baka fu leri moro fu Gado (Mateyus 5:3). Son sma di yere den agersitori disi fu Yesus sori kaba taki den de klariklari fu libi furu sani na baka fu kan leri moro fu Gado. Den sori kaba taki den wani tron trutru bakaman fu Yesus.​—Mateyus 4:19, 20; 19:27.

Yesus e gi wan lasti agersitori. A e agersi a Kownukondre fu hemel nanga wan fisinet di abi ala sortu fisi na ini (Mateyus 13:47). Den e piki den bun fisi puru èn den e poti den na ini bari. Ma den e trowe den fisi di no bun. Yesus taki dati na so a o go na a kaba fu a grontapu disi. Den engel o puru den ogri sma na mindri den reti-ati sma.

Na agersi fasi Yesus srefi du wan fisiwroko tu di a kari den fosi disipel fu en fu tron „fisiman di e fanga libisma” (Markus 1:17). Ma a e taki dati na agersitori fu a fisinet o kon tru na ini a ten di e kon, „na a kaba fu a grontapu disi” (Mateyus 13:49). Sobun, den apostel nanga den tra disipel di e arki Yesus e frustan taki prenspari sani musu pasa ete.

Den disipel di yere den agersitori di Yesus fruteri na ini a boto e kon sabi moro. Te Yesus nanga den disipel fu en ’de den wawan, a e tyari ala sani kon na krin gi den’ (Markus 4:34). A de „leki wan man, wan masra fu wan oso, di e puru owru sani nanga nyun sani na ini a maksin fu en” (Mateyus 13:52). Yesus no e fruteri agersitori fu sori sma taki a de wan bun leriman. Na presi fu dati, a e du disi fu leri den prenspari tru tori di o tyari furu wini kon gi den. Iya, a de a moro bun „leriman” di de.