Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 14

Yesus e kari sma fu tron en disipel

Yesus e kari sma fu tron en disipel

YOHANES 1:29-51

  • DEN FOSI DISIPEL DI E WAKA NA YESUS BAKA

Baka den 40 dei na ini a sabana, Yesus e go baka na Yohanes di ben dopu en. Baka dati, a o go na Galilea. Te Yesus e waka kon, Yohanes e sori den sma drape suma na en èn a e taki: „Luku! A Pikin Skapu fu Gado di e puru a sondu fu grontapu! Na fu a sma disi mi ben taki: Wan sma e kon na mi baka di bigi moro mi, bika fosi mi ben de, a ben de kaba” (Yohanes 1:29, 30). Yohanes owru pikinso moro Yesus, ma a sabi taki fosi en Yesus ben e libi kaba leki wan yeye na hemel.

Wan tu wiki na fesi, di Yesus ben kon na Yohanes fu dopu, a sori leki Yohanes no ben de seiker taki Yesus na a Mesias. Yohanes ben taki: „Mi srefi no ben sabi en, ma mi kon fu dopu sma na ini watra, so taki den Israelsma ben kan kon sabi en.”​—Yohanes 1:31.

Yohanes e fruteri den arkiman san pasa di a dopu Yesus: „Mi si a yeye e saka kon fu hemel leki wan doifi èn a tan na en tapu. Mi srefi no ben sabi en, ma a sma di seni mi go fu dopu sma na ini watra taigi mi: ’Yu o si taki a yeye o saka kon na tapu wan sma èn a o tan na en tapu. En na a wan di e dopu sma nanga santa yeye.’ We, na dati mi si èn mi e taigi ala sma taki a sma disi na a Manpikin fu Gado.”​—Yohanes 1:32-34.

A tra dei, Yohanes de nanga tu disipel fu en te Yesus e kon baka na en. Yohanes e taki: „Luku! A Pikin Skapu fu Gado!” (Yohanes 1:36) Ne den tu disipel fu Yohanes bigin waka na Yesus baka. Wan fu den nen Andreas. Soleki fa a sori, dan a tra disipel na a sma di skrifi a tori disi. En nen na Yohanes tu. A sori leki a Yohanes disi na wan neef fu Yesus fu di a de wan manpikin fu Salome. Soleki fa wi si kaba, dan Salome na a sisa fu Maria èn en masra na Sebedeyus.

Di Yesus drai luku, dan a si taki Andreas nanga Yohanes e waka na en baka. Ne a taki: „San unu e suku?”

Den e aksi en: „Rabbi, pe yu e libi?”

Yesus taki: „Kon, dan unu o si.”​—Yohanes 1:37-39.

A de wan pisi ten fu fo yuru bakadina èn Andreas nanga Yohanes e tan nanga Yesus heri dei. Andreas breiti so te, taki a e go suku en brada Simon di sma e kari Petrus tu. Andreas e taigi en: „Wi feni a Mesias” (Yohanes 1:41). Dan Andreas e tyari Petrus go na Yesus. Te wi e luku den sani di pasa bakaten, dan a sori leki Yohanes go suku en brada Yakobus tu, dan a tyari en go na Yesus. Ma Yohanes no e fruteri fu disi na ini a pisi tori di a skrifi.

A tra dei, Yesus e feni Filipus fu Betsaida. A foto Betsaida de na a noordsei fu a Se fu Galilea èn Andreas nanga Petrus e tan drape.  Yesus e gi Filipus a kari disi: „Tron wan bakaman fu mi.”​—Yohanes 1:43.

Baka dati Filipus e miti Natanael di sma e kari Bartolomeyus tu. A e taigi en: „Wi feni a sma di Moses skrifi fu en na ini a Wèt èn den Profeiti skrifi fu en tu. En na Yesus, a manpikin fu Yosef fu Nasaret.” Ma Natanael taigi en: „Wan bun sani kan komopo fu Nasaret?”

Filipus de nomonomo taki a musu kon. A taki: „Kon luku.” Te Yesus si Natanael e kon, a e taigi en: „Luku, a man disi na trutru wan Israelsma di no e bedrigi sma.”

„Fa a du kon taki yu sabi mi?”, Natanael e aksi.

Yesus piki en: „Fosi Filipus kari yu, di yu ben de na ondro a figabon, mi ben si yu kaba.”

Natanael fruwondru, dan a taki: „Leriman, yu na a Manpikin fu Gado, yu na Kownu fu Israel.”

Yesus taigi en: „Na fu di mi taigi yu taki mi si yu na ondro a figabon, meki yu e bribi? Yu o si moro bigi sani leki disi.” Dan Yesus e taki: „Fu tru, mi e taigi unu: Unu o si fa hemel o opo èn fa den engel fu Gado o opo go na hemel èn o saka komoto fu hemel, fu kon na a Manpikin fu libisma.”​—Yohanes 1:45-51.

A no langa baka dati Yesus e gowe libi Yordan-lagipresi makandra nanga den nyun disipel fu en èn den e go na Galilea.