Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 16

Yesus e sori taki a de fayafaya gi a tru anbegi

Yesus e sori taki a de fayafaya gi a tru anbegi

YOHANES 2:12-22

  • YESUS E KRIN A TEMPEL

Baka a trowfesa na Kana, Yesus e go na Kaperna-um. En mama, nanga den brada fu en Yakobus, Yosef, Simon nanga Yudas de nanga en.

Ma fu san ede Yesus e go na Kaperna-um? A foto disi prenspari moro Nasaret noso Kana èn a sori leki a moro bigi tu. Furu fu den nyun disipel fu Yesus e tan na ini a foto dati noso na ini a birti fu a foto. Sobun, Yesus kan gi den leri na a presi pe den e tan.

Yesus e du wondru tu te a de na ini Kaperna-um. Na a fasi disi furu sma na ini a foto noso na ini a birti fu a foto kan yere fu den sani di a e du drape. Ma Yesus nanga den mati fu en no man tan langa. Fu di den de fayafaya na ini a Dyu bribi, meki heri esi den o bigin waka go na Yerusalem fu hori a Paskafesa fu a yari 30.

Na a tempel na ini Yerusalem, den disipel e si wan tra sei fu Yesus di den no o frigiti so esi.

Gado Wet ben taki dati den Israelsma ben musu tyari meti leki ofrandi na a tempel èn den sma di ben kon drape ben musu abi sani tu fu nyan. Ma efu wan sma ben e tan fara fu Yerusalem, a Wet ben sori taki a ben kan tyari moni fu bai „kaw, skapu, krabita” nanga iniwan tra sani di a ben o abi fanowdu na ini a pisi ten te a ben de na Yerusalem (Deuteronomium 14:24-26). Fu dati ede den bisnisman ben e seri fowru nanga tra meti leti na ini a bigi fesidyari fu a tempel. Sonwan fu den ben e bedrigi den sma tu èn den ben e aksi den tumusi furu moni.

Nanga bigi atibron Yesus e trowe a moni fu den sma di e kenki moni, a e drai den tafra tapu èn a e yagi den komoto fu drape. Dan a e taki: „Puru den sani fu dya! No meki na oso fu mi Tata de wan presi pe sma e kon du bisnis!”​—Yohanes 2:16.

Te Yesus disipel e si disi, den e memre wan profeititori di e taki fu Gado Manpikin: „A lobi di mi abi gi yu oso, o de leki wan faya di e bron na ini mi.” Ma den Dyu e taki: „Yu e du den sani disi, ma sortu wondru yu kan du fu buweisi wi taki yu abi a reti fu du disi?” Yesus e piki den: „Broko a tempel disi puru, dan mi o bow en baka na ini dri dei.”​—Yohanes 2:17-19; Psalm 69:9.

Den Dyu e denki taki Yesus e taki fu a trutru tempel na ini Yerusalem. Dati meki den e taki: „A tempel disi bow na ini fotenti na siksi yari, dan fa yu kan bow en baka na ini dri dei?” (Yohanes 2:20) Ma dyaso Yesus e agersi en skin nanga wan tempel. Baka dri yari den disipel e memre den wortu disi te a kisi wan opobaka.

Kon sabi moro

TEKI NA EKSEMPRE FU SMA DI BEN ABI BRIBI

Elia opo taki gi a tru anbegi

Fa wi kan teki na eksempre fu Elia te wi e taki nanga sma di no e agri nanga den leri fu Bijbel?