Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 12

Yesus e dopu

Yesus e dopu

MATEYUS 3:13-17 MARKUS 1:9-11 LUKAS 3:21, 22 YOHANES 1:32-34

  • YESUS E DOPU ÈN GADO E SALFU EN NANGA SANTA YEYE

  • YEHOVAH E TAKI DATI YESUS NA EN MANPIKIN

Sowan siksi mun baka di Yohanes a Dopuman bigin preiki, Yesus e kon na en na Yordan-liba. Yesus abi sowan 30 yari now. Fu san ede a e go na Yohanes? A no fu taki tori nanga en. A no kon tu fu luku fa a wroko fu Yohanes e go. Yesus e kon na Yohanes fu aksi en efu a wani dopu en.

Wi kan frustan taki Yohanes no wani du dati. A e taki: „Yu na a sma di musu dopu mi. Ma now yu e kon na mi fu dopu yu?” (Mateyus 3:14) Yohanes sabi taki Yesus na a spesrutu Manpikin fu Gado. Soleki fa wi sabi, dan Maria di ben de nanga bere fu Yesus, ben go luku Elisabet di ben de nanga bere fu Yohanes. Di Maria doro, dan Yohanes dyompo fu prisiri na ini en mama bere. A no de fu taki dati Yohanes mama fruteri en a tori disi bakaten. Yohanes ben sa yere tu fu na engel di ben taigi Maria taki a ben o de nanga bere fu Yesus. A ben sabi tu taki den engel ben taigi den skapuman taki Yesus gebore.

Yohanes sabi taki a e dopu sma fu di den abi berow fu den sondu fu den. Ma Yesus no abi sondu, sobun a no abi fu dopu en. Toku Yesus e taigi Yohanes: „Meki wi du en so disi leisi, bika na a fasi disi wi e du ala sani soleki fa Gado wani en.”​—Mateyus 3:15.

Fu san ede a fiti taki Yesus dopu? Yesus no dopu fu sori taki a abi berow fu den sondu fu en. A dopu fu en e sori taki a de klariklari fu du a wani fu en Papa (Hebrewsma 10:5-7). Teleki now Yesus ben de wan temreman. Ma now a ten doro taki a musu bigin nanga a wroko di en hemel Papa seni en fu du na grontapu. Yu denki taki Yohanes e fruwakti taki wan spesrutu sani o pasa te a o dopu Yesus?

Yohanes taki bakaten: „A sma di seni mi go fu dopu sma na ini watra taigi mi: ’Yu o si taki a yeye o saka kon na tapu wan sma èn a o tan na en tapu. En na a wan di e dopu sma nanga santa yeye’” (Yohanes 1:33). Sobun, a ben fruwakti taki a yeye fu Gado ben o kon na tapu wan sma di a ben o dopu. Di Yesus opo komoto na ini a watra, Yohanes si „Gado en yeye saka kon na Yesus tapu leki wan doifi”.​—Mateyus 3:16.

Ma a no dati wawan pasa di Yesus dopu. Bijbel e taki dati „hemel opo” gi en. San disi wani taki? Soleki fa a sori, dan di Yesus dopu a bigin memre  a libi fu en na hemel, fosi a tron wan libisma. Sobun, Yesus e memre now fa a ben e libi na hemel leki wan yeye manpikin fu Yehovah èn a e memre den sani di Yehovah ben leri en na hemel, fosi a kon na grontapu.

Wan tra sani pasa tu di Yesus dopu. Wan sten komoto fu hemel di ben taki: „Disi na mi Manpikin, a lobiwan di mi feni bun” (Mateyus 3:17). Suma sten taki a sani disi? A no kan de a sten fu Yesus, fu di Yesus de leti drape nanga Yohanes. A sten na fu Gado. A de krin taki Yesus na Gado Manpikin. Sobun, Yesus a no Gado srefi.

Luku taki Yesus na wan libisma manpikin fu Gado now neleki a fosi man Adam. Baka di a disipel Lukas skrifi fu a dopu fu Yesus, a skrifi: „Di Yesus bigin nanga a wroko fu en, a ben abi sowan dritenti yari, èn sma ben sabi taki a ben de a manpikin fu Yosef, a manpikin fu Eli, . . . a manpikin fu David, . . . a manpikin fu Abraham, . . . a manpikin fu Noa, . . . a manpikin fu Adam, a manpikin fu Gado.”​—Lukas 3:23-38.

Sobun, neleki fa Adam ben de wan libisma „manpikin fu Gado”, na so Yesus ben de wan libisma „manpikin fu Gado” tu. Di a dopu, a kon frustan taki a de a manpikin fu Gado di ben o tron wan yeye na ini hemel te fu kaba. Now Yesus kan tyari a frantwortu fu gi sma leri fu Gado èn fu sori den fa den kan kisi têgo libi. A e bigin nanga a wroko di Gado gi en fu du èn te fu kaba a o gi en libisma libi leki ofrandi fu pai gi den sondu fu libisma.