Go na content

Go na a tra menu

Go na table of contents

Yehovah Kotoigi

Sranantongo

Suma e du a wani fu Yehovah na ini a ten disi?

 PISI 18

Fa wi e yepi den brada nanga sisa fu wi di de na nowtu?

Fa wi e yepi den brada nanga sisa fu wi di de na nowtu?

Dominikan Republiek

Yapan

Haiti

Te wan rampu pasa, Yehovah Kotoigi e seti sani wantewante fu yepi den brada nanga sisa fu den di de na nowtu. A muiti disi di wi e du e sori krin taki wi lobi makandra trutru (Yohanes 13:34, 35; 1 Yohanes 3:17, 18). Na sortu fasi wi e yepi den?

Wi e gi moni. Di wan bigi angriten ben de na ini Yudea, den fosi Kresten na ini Antiokia ben seni moni gi den brada nanga sisa drape (Tori fu den apostel 11:27-30). Na so a de tu taki te wi yere dati den brada nanga sisa fu wi na ini son kondre de na nowtu, dan wi e seni moni gi den. A moni dati wi e gi leki bijdrage na ini wi gemeente èn den e gebroiki a moni fu bai sani di den abi tranga fanowdu.2 Korentesma 8:13-15.

Wi e du sani fu yepi den. Den owruman di de na a presi pe a rampu pasa, e suku ibri memre fu a gemeente fu de seiker taki noti no pasa nanga den. Wan komte di e orga a wroko fu yepi sma di de na nowtu e seti sani fu gi den brada nanga sisa nyanyan, krin watra fu dringi, krosi, wan presi fu tan, nanga datrayepi. Furu Kotoigi di sabi du son spesrutu wroko e pai den eigi kostu fu go yepi na a presi pe a rampu pasa èn fu bow den oso nanga den Kownukondre zaal baka. A wánfasi di de na ini na organisâsi fu wi èn na ondrofeni di wi abi, e meki taki wi man seti sani esi-esi te wan rampu pasa. Na so wi man tyari den sani kon na wán di de fanowdu èn wi man orga den sma di o yepi. Aladi wi e yepi „den wan di abi a srefi bribi leki wi”, toku wi e yepi trawan tu te dati kan, awansi sortu bribi den abi.Galasiasma 6:10.

Wi e gebroiki Bijbel fu trowstu den. Spesrutu te wan rampu miti sma, den abi trowstu fanowdu. Na ini den situwâsi disi wi e kisi krakti fu Yehovah, „a Gado fu ala trowstu” (2 Korentesma 1:3, 4). Wi de klariklari fu fruteri den wan di de na nowtu fu den pramisi di Bijbel e gi. Wi e gi den a dyaranti taki heri esi Gado Kownukondre o tyari wan kaba kon na ala den rampu di e meki taki sma pina èn sari.Openbaring 21:4.

  • Fu san ede den Kotoigi man seti sani esi-esi te wan rampu pasa?

  • Sortu trowstu wi kan gi den sma di rampu miti?