Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL SEIBI

A „ben e gro kon bigi na ini na oso fu Yehovah”

A „ben e gro kon bigi na ini na oso fu Yehovah”

1, 2. Fa a situwâsi ben de di Samuel ben e taki nanga a pipel? Fu san ede a ben musu yepi den fu sori berow?

SAMUEL ben e sidon luku a pipel fu en. A pipel kon makandra na ini a foto Gilgal, fu di a reti-ati man disi di ben e dini leki profeiti nanga krutuman someni tenti yari kaba, ben kari den kon drape. A ben de na a ten fu mei noso yuni èn a ben de dreiten. Na aleisi na ini den gron fu a kontren drape ben lepi kaba fu koti. Ala sma ben de pî. Fa Samuel ben o man doro den ati?

2 Den Israelsma no ben e frustan o seryusu a situwâsi fu den ben de. Den ben wani nomonomo taki wan libisma musu tiri den leki kownu. Den no ben frustan taki den no ben sori lespeki srefisrefi gi Yehovah, a Gado fu den èn gi en profeiti. Fu taki en leti, na Yehovah den no ben wani moro leki Kownu! Fa Samuel ben o man yepi den fu sori berow?

Te wi e luku a libi fu Samuel leki yongu boi, dan wi e leri fa wi kan kon abi wan tranga bribi na ini Yehovah, awinsi sma na wi lontu e du takru sani

3, 4. (a) Fu san ede Samuel ben taki fu a ten di a ben yongu? (b) Fu san ede wi kan kisi wini fu na eksempre fu Samuel?

3 Samuel taigi a pipel: „Misrefi kon owru kaba, mi ede-wiwiri kon weti.” Fu di a ben owru kaba, meki den wortu fu en ben abi moro krakti. Ne a taki: „Misrefi de nanga unu sensi mi yongu èn mi de nanga unu te now ete” (1 Sam. 11:14, 15; 12:2). Aladi Samuel ben owru, toku a no ben frigiti den yongu yari fu en. A ben man memre ala sani krin ete. Den bosroiti di a teki di a ben yongu, yepi en fu kon  abi wan tranga bribi èn fu tan dini en Gado, Yehovah, fayafaya en heri libi langa.

4 Samuel ben musu tranga a bribi fu en èn a ben musu horidoro, fu di ibri tron baka a ben de na mindri sma di no ben abi bribi èn di no ben e gi yesi na Yehovah. Na ini a ten disi, a muilek tu fu kon abi bribi, fu di sma na ini a grontapu disi no abi bribi èn den e du kruka sani. (Leisi Lukas 18:8.) Meki wi go luku san wi kan leri fu Samuel. Wi o bigin na a ten di a ben de wan pikin boi.

„Wan boi di ben e wroko leki wan dinari fu Yehovah”

5, 6. Fa den yongu yari fu Samuel ben de tra fasi leki a di fu tra pikin? Fu san ede en papa nanga mama ben de seiker taki a ben o kisi bun sorgu?

5 Den yongu yari fu Samuel ben de heri tra fasi leki a di fu tra pikin. Syatu baka di en mama puru en na bobi, kande di a ben abi sowan fo yari, dan a bigin dini na ini na oso fu Yehovah na Silo. Dati na sowan 30 kilometer fu a foto Rama pe a ben e tan. En papa Elkana nanga en mama Hana gi en na Yehovah fu du wan spesrutu diniwroko, èn a tron wan Nasireisma fu en heri libi langa. * Ma disi ben wani taki dati en mama nanga en papa no ben wani en moro èn taki den no ben lobi en?

6 Kwetikweti! Den ben sabi taki den manpikin ben o kisi bun sorgu na Silo. A no de fu taki dati Granpriester Eli ben o sorgu taki dati pasa fu di Samuel ben e wroko skinskin nanga en. Boiti dati, wan tu umasma ben e yepi nanga difrenti wroko na ini na oso fu Gado èn soleki fa a sori, dan a wroko fu den ben orga bun.​—Eks. 38:8; Krut. 11:34-40.

7, 8. (a) Fa Samuel en papa nanga mama ben e gi en deki-ati ibri yari? (b) San papa nanga mama na ini a ten disi kan leri fu Hana nanga Elkana?

7 Boiti dati, Hana nanga Elkana noiti no frigiti a fosi manpikin fu den di den ben lobi so te. Fu taki en leti, den ben kisi en fu di Yehovah piki a begi fu Hana. Hana ben aksi Gado wan manpikin èn a ben pramisi Gado taki a ben o gi en a boi fu du santa diniwroko gi en. Ibri yari te Hana ben e go luku Samuel, a ben e tyari wan nyun dyakti sondro mow di a ben meki gi en fu wroko na a oso fu Gado. A pikin boi disi ben  musu fu breiti te en papa nanga mama ben e go luku en. A no abi misi taki a ben e gi en deki-ati te en papa nanga mama ben e taigi en taki a ben de wan bigi grani fu dini Yehovah na ini a santa presi dati.

8 Papa nanga mama na ini a ten disi kan leri furu fu Hana nanga Elkana. Nofo tron papa nanga mama e du ala san den man fu gi den pikin den sani di den abi fanowdu, aladi den no e yepi den fu tron wan mati fu Gado. Ma a papa nanga mama fu Samuel ben feni en moro prenspari taki na osofamiri fu den ben abi wan bun matifasi nanga Yehovah. A sani dati meki taki a boi fu den kon tron wan man di ben abi wan tranga bribi na ini Gado.​—Leisi Odo 22:6.

9, 10. (a) Fruteri fa na oso fu Gado ben de èn fa a yongu Samuel ben denki fu a santa presi disi. (Luku sosrefi den sani di skrifi na ondrosei fu a bladzijde.) (b) Sortu wroko Samuel ben e du èn fa yu denki taki yonguwan na ini a ten disi kan teki na eksempre fu en?

9 Prakseri fa a boi ben e gro kon bigi èn fa a ben e waka na tapu den bergi na ini a birti fu Silo. Te a ben e luku go na ondrosei, dan a ben e si a foto nanga a lagipresi di ben de sei a foto. A no abi misi taki a ben breiti kefalek te a ben e si na oso fu Yehovah. Iya, na oso dati ben de wan santa presi trutru. * A ben bow sowan 400 yari na fesi, èn na Moses ben taigi a pipel fa den ben musu bow en. A ben de a wan-enkri presi na grontapu pe sma ben e anbegi a tru Gado, Yehovah.

10 A yongu Samuel ben kon lobi na oso fu Gado pe a gro kon bigi. Na ini a tori di a skrifi bakaten, wi e leisi: „Samuel ben de wan boi di ben e wroko leki wan dinari fu Yehovah. A ben e weri wan fesikoki fu linnen krosi” (1 Sam. 2:18). A dyakti dati di no ben abi mow, ben e sori taki Samuel ben e wroko makandra nanga den priester na ini na oso fu Gado. Aladi Samuel no ben de fu wan priester famiri, toku a ben e wroko drape. Wan fu den wroko fu en ben de fu opo den doro fu a dyari ibri mamanten èn a ben e yepi Eli di ben kon owru kaba. Aladi a pikin boi disi ben lobi a wroko di a ben e du, toku wan  sani ben de di ben e trobi en bakaten. Wan takru sani ben e pasa na ini na oso fu Yehovah.

A tan du san reti awinsi trawan ben e du kruka sani

11, 12. (a) Sortu bigi fowtu Hofni nanga Pinehas ben meki? (b) Sortu ogri nanga kruka sani Hofni nanga Pinehas ben e du na a tempel? (Luku sosrefi den sani di skrifi na ondrosei fu a bladzijde.)

11 Yonguyongu kaba, Samuel ben e si fa sma ben e du wan lo ogri nanga kruka sani. Eli ben abi tu manpikin, Hofni nanga Pinehas. A tori fu Samuel e taki: „Den manpikin fu Eli ben de wisiwasi man. Den no ben abi lespeki gi Yehovah” (1 Sam. 2:12). Den tu sani na ini a tekst disi abi fu du nanga makandra. Hofni nanga Pinehas ben de „wisiwasi man” fu di den no ben abi lespeki gi Yehovah. Den no ben abi nowan dropu lespeki gi den wèt fu Yehovah èn a sani dati meki taki den ben e du bigi sondu.

12 A Wèt fu Gado ben taki finifini sortu wroko den priester ben musu du èn fa den ben musu tyari den ofrandi na ini na oso fu Gado. Dati no ben de fu soso! Den ofrandi ben e prenki ala den sani di Gado seti fu gi sma pardon fu sondu, so taki Gado kan sori den bun-ati èn blesi den. Ma Hofni nanga Pinehas ben meki taki den tra priester ben e wisiwasi den ofrandi. *

13, 14. (a) Fa reti-ati sma ben e firi te den ben e si den ogri di ben e pasa na ini na oso fu Gado? (b) Fu san ede Eli no ben de wan bun papa noso wan bun granpriester?

13 Prakseri fa a yongu Samuel ben e firi. A no ben man bribi den ogri sani di a ben e si, èn nowan sma ben e du wan sani na a tori. A ben e si fa furu sma, pôtisma, mofinasma nanga sma di brokosaka, ben e kon na a santa presi fu suku trowstu èn fu tranga a bribi fu den. Ma ala den sma disi ben e drai gowe baka nanga bigi sari, fu di sma ben wisiwasi den. Samuel  kon sabi tu taki Hofni nanga Pinehas no ben e lespeki den wèt fu Yehovah fu di den ben e sribi nanga wan tu fu den uma di ben e wroko na ini na oso fu Gado (1 Sam. 2:22). Fa yu denki taki a ben e firi? Kande a ben howpu taki Eli ben o du wan sani na a tori dati.

Samuel ben musu fu sari di a si sortu ogri den manpikin fu Eli ben e du

14 Eli ben de a moro bun sma di ben kan du wan sani na a problema disi di ben e kon moro bigi dei fu dei. Leki granpriester, a ben de frantwortu gi den sani di ben e pasa na ini na oso fu Gado. Leki papa, a ben abi a frantwortu fu piri-ai gi den boi fu en. Fu taki en leti, den sani di den ben e du ben o tyari takru bakapisi kon gi densrefi èn gi tra sma na ini a kondre. Ma Eli no tyari en frantwortu leki papa èn leki granpriester. Na warskow nomo a warskow den. (Leisi 1 Samuel 2:23-25.) Ma a ben musu piri-ai gi den manpikin fu en na wan moro krakti fasi. A sondu di den ben e du, ben kan meki taki den kisi dedestrafu!

15. Sortu krakti boskopu Yehovah seni gi Eli èn san na osofamiri fu Eli du di den kisi a boskopu dati?

15 A situwâsi kon ogri so te taki Yehovah seni „wan man fu Gado”, wan profeiti di nen no kari, go na Eli fu tyari wan krakti krutuboskopu gi en. Yehovah taigi Eli: „Yu e gi den manpikin fu yu moro grani leki mi.” Ne Gado taki dati den ogri manpikin fu Eli ben o dede a srefi dei èn taki bigi sari ben o miti a famiri fu Eli. Den ben o lasi a grani srefi fu dini leki priester. A seryusu warskow disi tyari wan kenki kon na ini na osofamiri dati? Bijbel e sori taki dati no pasa.​—1 Sam. 2:27–3:1.

16. (a) San wi e leisi fu a yongu Samuel di ben e gro kon bigi? (b) Yu lobi den tori disi? Fruteri fu san ede.

16 Sortu krakti den ogri disi ben abi tapu a yongu Samuel? Wanwan leisi, wi e leisi wan tu bun sani tu na ini a sari tori disi. A tori e fruteri tu fa Samuel ben e gro kon bigi èn fa a ben e go na fesi. Memre taki na 1 Samuel 2:18, wi e leisi taki leki pikin boi Samuel ben e tan „wroko leki wan dinari fu Yehovah”. Srefi na a ten dati kaba, a diniwroko fu Gado ben de a moro prenspari sani gi Samuel. Na ini vers 21 fu a srefi kapitel, wi e leisi wan sani di e gi wi moro prisiri srefi: „A boi Samuel ben e gro kon bigi na ini na oso fu Yehovah.” Di a ben e gro kon bigi, a matifasi fu en nanga en Papa na Hemel ben kon moro tranga. Te wi abi so wan matifasi nanga Yehovah, dan dati na a moro bun fasi fa wi kan kibri wisrefi gi kruka fasi.

17, 18. (a) Fa yongu Kresten kan teki na eksempre fu Samuel te den e kisi fu du nanga kruka fasi? (b) San e sori taki Samuel ben e tyari ensrefi na wan bun fasi?

 17 Samuel ben kan denki taki efu a granpriester nanga den manpikin fu en ben e du sondu, dan ensrefi ben kan du tu san a wani. Ma awinsi trawan e du kruka sani, srefi efu na sma di abi wan hei posisi, toku dati no wani taki dati wi musu du sondu. Na ini a ten disi, furu Kresten yonguwan e teki na eksempre fu Samuel. Den yonguwan disi e „gro kon bigi na ini na oso fu Yehovah”, awinsi son sma na den lontu no de wan bun eksempre.

18 Fa sani waka gi Samuel fu di a tan tyari ensrefi na wan bun fasi? A tori e taki: „Disiten a boi Samuel ben e gro kon bigi. Yehovah nanga tra sma ben kon lobi en moro nanga moro” (1 Sam. 2:26). Sobun, sma ben lobi Samuel, awinsi na soso den sma di ben prenspari gi en. Yehovah srefi ben lobi a boi disi fu di a ben e gi yesi na En. Samuel ben sabi seiker taki en Gado ben o tyari wan kaba kon na den takru sani di ben e pasa na ini Silo, ma kande a ben e aksi ensrefi o ten dati ben o pasa. Wan neti, na aksi dati kisi piki.

„Taki, mi masra. Yu futuboi e arki”

19, 20. (a) Fruteri san pasa nanga Samuel wan lati neti na a oso fu Gado. (b) Fa Samuel ben e libi nanga Eli? (c) Fa Samuel kon sabi suma ben e kari en?

19 Mamanten ben e doro kaba, ma a ben dungru ete. A faya fu a bigi lampu na ini a tenti ben e bron ete. A presi ben pî di Samuel yere wan sten e kari en. A ben denki taki na Eli di ben kon owru  now èn di pikinmoro no ben man si. Samuel opo èn a „lon” go na a owru man. Yu man si fa a boi disi e lon nanga soso futu fu go luku san Eli ben wani? A e naki wi ati fu sabi taki Samuel ben e sori lespeki nanga switifasi gi Eli. Awinsi sortu sondu Eli ben du, a ben de Yehovah granpriester ete.​—1 Sam. 3:2-5.

20 Samuel wiki Eli èn a taki: „Iya, mi masra. Yu ben kari mi?” Ma Eli taigi a boi taki a no kari en èn a seni en go didon baka. Ma a srefi sani dati pasa ete wan tu leisi! Te fu kaba, Eli kon frustan san e pasa. A no ben e pasa so furu moro taki Yehovah ben e gi en pipel fisyun, noso taki a ben e seni profeiti boskopu gi den. Wi kan frustan fu san ede. Ma Eli ben sabi taki Yehovah ben taki baka. A ben taki nanga a boi disi! Eli taigi Samuel fu go sribi baka èn a taigi en san a ben musu piki te Yehovah ben kari en. Samuel du san a taki. Syatu baka dati a yere a sten e kari en: „Samuel, Samuel!” Ne Samuel piki: „Taki, mi masra. Yu futuboi e arki.”​—1 Sam. 3:1, 5-10.

21. Fa wi kan arki Yehovah na ini a ten disi, èn fu san ede a bun fu du dati?

21 Baka wan heri pisi ten, Yehovah ben abi wan futuboi baka na ini Silo di ben arki en. Samuel tan arki Yehovah en heri libi langa. Yu e du dati tu? Wi no abi fu wakti teleki wan sten e taki nanga wi te neti. Fu taki en leti, Gado e taki nanga wi doronomo na ini a ten disi. A e du dati nanga yepi fu en Wortu, Bijbel. O moro wi e arki Gado èn e gi yesi na en, o moro a bribi fu wi o kon tranga. Na so a ben de nanga Samuel.

Aladi Samuel ben e frede, toku a fruteri Eli a krutuboskopu fu Yehovah

22, 23. (a) Fa a boskopu di Samuel ben e frede fu tyari, kon tru? (b) San e sori taki sani ben e go moro bun nanga Samuel?

22 A neti dati ben de wan prenspariwan na ini a libi fu Samuel, fu di a bigin leri sabi Yehovah na wan prenspari fasi. Iya, a tron Gado en profeiti èn sosrefi en takiman. Na a bigin, a boi ben frede fu fruteri Eli san Yehovah taki. A ben musu taigi Eli fu a lasti leisi taki Yehovah ben o strafu a famiri fu en, èn taki a sani dati ben o pasa heri esi. Ma Samuel teki deki-ati, èn na wan saka fasi Eli teki a boskopu di ben komoto fu Gado. A no teki langa, fosi ala den sani di Yehovah taki kon tru: Israel go feti nanga den Filisteasma, èn den kiri Hofni nanga Pinehas a srefi dei dati. Eli srefi dede di a yere taki den teki a santa kisi fu Yehovah tyari gowe.​—1 Sam. 3:10-18; 4:1-18.

23 Ma sani ben e go moro bun nanga a reti-ati profeiti  Samuel. Bijbel e taki: „A ben de krin taki Yehovah ben de nanga en.” A tori e taki moro fara taki Yehovah meki ibriwan fu den profeititori fu Samuel kon tru.​—Leisi 1 Samuel 3:19.

„Samuel begi Yehovah”

24. Sortu bosroiti den Israelsma teki te fu kaba, èn fu san ede dati ben de wan seryusu sondu?

24 Den Israelsma bigin gi yesi na Yehovah neleki fa Samuel ben du dati? Nôno. Baka wan pisi ten, den bosroiti taki den no ben wani moro taki wan profeiti koti krutu gi den. Den ben wani de leki den tra pipel di ben abi wan kownu di ben e tiri den. Samuel du san den ben wani, fu di Yehovah ben taigi en dati. Ma a ben musu taigi den Israelsma o seryusu a sondu fu den ben de. A no wan libisma den no ben wani, ma na Yehovah srefi! Dati meki Samuel taigi a pipel fu kon makandra na Gilgal.

Samuel begi nanga bribi èn Yehovah meki dondru bari èn alen fadon

25, 26. Fa na owru Samuel yepi a pipel fu kon frustan sortu bigi sondu den du?

25 Meki wi go baka na a bigin fu a kapitel disi pe Samuel e taki nanga den Israelsma na Gilgal. Drape na owru Samuel e memre den Israelsma taki a tan dini Yehovah nanga en heri ati sensi di a ben yongu. Baka dati wi e leisi: „Samuel begi Yehovah.” A aksi Yehovah fu meki wan dondru bari èn fu meki alen fadon.​—1 Sam. 12:17, 18.

26 Dondru? Alen? Na ini dreiten? Noiti ete den ben yere so wan sani! Efu sma na mindri a pipel ben e meki spotu fu a sani disi, dan dati no ben de fu langa. Wantronso a loktu kon dungru nanga wolku. Winti bigin wai na aleisi na ini den gron. Dondru bigin bari bun tranga èn alen bigin fadon. San den sma du? „A heri pipel kon frede Yehovah nanga Samuel srefisrefi.” Now fosi den ben frustan sortu bigi sondu den du.​—1 Sam. 12:18, 19.

27. Fa Yehovah e denki fu sma di abi bribi neleki Samuel?

27 A no Samuel ben doro na ati fu den di ben kon tranga, ma na Yehovah, a Gado fu en. Sensi di Samuel ben yongu a ben e poti bribi na ini en Gado, teleki a kon owru èn Yehovah blesi en. Te nanga a dei fu tide, Yehovah no kenki. A e tan yepi den sma di abi bribi neleki Samuel.

^ paragraaf 5 Den Nasireisma ben e meki wan sweri èn wan tu fu den sani di den no ben mag du, na taki den no ben mag dringi sopi noso koti den ede-wiwiri. Furu fu den Nasireisma ben meki a sweri disi fu wan pisi ten nomo, aladi sonwan fu den, soleki Simson, Samuel, nanga Yohanes a Dopuman ben de Nasireisma den heri libi langa.

^ paragraaf 9 A santa presi disi ben langa sowan 13 meter èn a ben bradi sowan 4,5 meter. Fu taki en leti, a ben de wan bigi tenti di ben meki nanga udu. A tenti disi ben meki fu den moro bun sani, soleki sedagu-buba, moi krosi di abi prenki na tapu, èn sosrefi diri udu di ben tapu nanga solfru èn nanga gowtu. A santa presi disi ben de na ini wan dyari di ben abi wan altari pe den ben e tyari ofrandi. Soleki fa a sori, dan bakaten den bow ete wan tu kamra na sei a santa presi èn den priester ben e gebroiki den. A kan taki Samuel ben e sribi na ini wan fu den kamra disi.

^ paragraaf 12 A tori e taki fu tu fasi fa den ben e wisiwasi den ofrandi. Fu taki en leti, a Wèt ben e sori krin sortu pisi fu a meti fu na ofrandi den priester ben musu kisi fu nyan (Deut. 18:3). Ma na a oso fu Gado den ogri priester ben e du san den wani. Den ben e meki den futuboi fu den dyuku wan bigi forku go na ini a patu pe a meti ben e bori èn den ben e teki iniwan pisi meti di den ben wani. A ben de so tu taki te sma ben e tyari den ofrandi fu den fu bron na tapu na altari, dan den ogri priester disi ben e meki den futuboi fu den tapu skreki gi den sma. Den ben e dwengi den sma fu gi den a lala meti, fosi den ben bron a fatu fu na ofrandi gi Yehovah.​—Lef. 3:3-5; 1 Sam. 2:13-17.