Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

A bigin

A bigin

„Teki na eksempre fu den sma di kisi den sani di Gado pramisi den, fu di den ben abi bribi èn fu di den ben abi pasensi.”​—HEBREWSMA 6:12.

1, 2. Fa wan kring-opziener ben e si reti-ati sma na ini Bijbel, èn fu san ede a ben o moi fu abi den sma dati leki mati?

„A E TAKI fu den sma na ini Bijbel neleki den na owru mati fu en.” Na dati wan Kresten uma ben taki, baka di a arki wan lezing di wan owru kring-opziener ben hori. A ben abi leti fu taki dati, fu di a brada disi ben studeri Gado Wortu omeni tenti yari langa èn a ben e gi sma leri fu en. A ben e du dati na so wan fasi taki a ben gersi trutru leki den man nanga uma na ini Bijbel ben de owru mati di a ben sabi en heri libi langa.

2 A no ben o moi fu abi furu fu den sma na ini Bijbel leki wi mati? Yu ben o wani dati? Prakseri fa a ben o de fu waka nanga den èn fu taki nanga den. Prakseri fa a ben o de fu kon sabi man nanga uma soleki Noa, Abraham, Rut, Elia, nanga Ester. Prakseri fa yu ben o kisi wini fu den moi rai fu den èn fu a deki-ati di den ben o gi yu!​—Leisi Odo 13:20.

3. (a) Fa wi kan kisi wini te wi e kon sabi moro fu den man nanga uma na ini Bijbel di ben abi wan tranga bribi? (b) Na sortu aksi wi o poti prakseri?

3 A no de fu taki dati na a ten te Gado o gi „wan opobaka na den sma di du san reti”, dan wi o man abi den sma dati leki mati (Tori 24:15). Ma nownow kaba wi kan kisi wini te wi e kon sabi moro fu den man nanga uma na ini Bijbel di ben abi wan tranga bribi. Fa so? Na apostel Paulus e gi wi a moi piki disi: „Teki na eksempre fu den sma di kisi den sani di Gado pramisi den, fu di den ben abi bribi èn fu di den ben abi pasensi” (Hebr. 6:12). Den wortu fu Paulus e meki wan tu aksi opo kon te wi e studeri a libi fu man nanga uma di ben abi bribi. Meki wi poti prakseri na den aksi dati: San na bribi, èn fu san ede wi musu abi bribi? Fa wi kan teki na eksempre fu sma na ini owruten di ben abi bribi?

 San na bribi èn fu san ede wi musu abi bribi?

4. Fa sma gwenti denki fu bribi, èn fu san ede a denki dati no bun?

4 Bribi na wan moi fasi, èn a fasi disi ben prenspari srefisrefi gi ala den man nanga uma di wi o taki fu den na ini a buku disi. Furu sma na ini a ten disi no sabi san a wani taki fu abi trutru bribi. Gi den, wan sma kan bribi iniwan sani sondro taki a abi krin buweisi. Ma a denki disi no bun. Wan sma di abi trutru bribi no de gaw fu bribi iniwan sani, fu di a sani dati kan tyari problema kon gi en. Wan sma di de gaw fu bribi iniwan sani kan bribi wan sani tide, ma tamara a no e bribi a sani dati moro. Srefi te wi e bribi na ini Gado, dan dati a no ala ete, fu di srefi ’den ogri yeye e bribi na ini Gado èn den e beifi’.​—Yak. 2:19.

5, 6. (a) Na sortu tu sani a bribi fu wi e poti prakseri? (b) O tranga a bribi fu wi musu de? Gi wan eksempre.

5 Trutru bribi na wan heri tra sani. Luku san Bijbel e taki. (Leisi Hebrewsma 11:1.) Paulus ben taki dati bribi abi fu du nanga tu sani di wi no man si. A fosi sani, na taki a e poti prakseri na sani di de now èn di wi „no man si”. Wi ai no man si den sani na ini hemel. Wi no man si Yehovah Gado, en Manpikin, noso a Kownukondre di e tiri now na ini hemel. A di fu tu sani e poti prakseri na ’sani di sma e howpu’, noso sani di no pasa ete. Nownowde wi no man si a nyun grontapu di Gado Kownukondre o tyari kon heri esi. Disi wani taki dati buweisi no de gi den sani di wi no man si èn gi den sani di wi e howpu na tapu?

6 Kwetikweti! Paulus fruklari taki te wan sma abi trutru bribi, dan a abi krin buweisi gi den sani di a e bribi. A ben taki dati „bribi na te wan sma e fruwakti taki” den sani di a e howpu o kon tru nomonomo. Di a taki dati, dan a gebroiki wan wortu di wi kan vertaal tu leki „papira di e sori taki wan sani na fu wan sma”. Kon meki wi taki dati wan sma bosroiti fu gi yu wan oso. Kande a e gi yu a papira fu na oso èn a e taki, „Luku na oso fu yu dya”. A no de fu taki dati yu no o libi na tapu a pisi papira. A wani taigi yu taki a papira disi prenspari so te, taki yu kan si en leki na oso srefi. Na so a de tu taki den buweisi di wi abi  gi den sani di wi e bribi, de so krin, so tranga, taki wi kan si den leki a bribi fu wi.

7. San na trutru bribi?

7 Sobun, wan sma di abi trutru bribi e frutrow dorodoro na tapu Yehovah Gado. Te wi abi bribi, dan wi e si Gado leki wi lobi Tata èn wi abi a frutrow taki ala den pramisi fu en o kon tru. Ma trutru bribi wani taki moro leki dati. Efu wi wani tan abi bribi, dan wi musu sorgu en bun. Iya, wi musu du sani fu sori a bribi dati, noso a o dede.​—Yak. 2:26.

8. Fu san ede a prenspari so fu abi bribi?

8 Fu san ede a prenspari so fu abi bribi? Paulus e gi wi wan piki di e hari wi prakseri. (Leisi Hebrewsma 11:6.) Efu wi no abi bribi, wi no kan kon krosibei na Yehovah èn wi no kan meki a prisiri nanga wi. Dati meki wi musu abi bribi fu man du a moro prenspari èn a moro bun sani di ibri libisma nanga engel musu du: wi musu kon krosibei na wi hemel Tata Yehovah, èn wi musu gi en glori.

9. Fa Yehovah sori taki a sabi o prenspari a de taki wi abi bribi?

9 Yehovah sabi o prenspari a de taki wi abi bribi, èn fu dati ede a e yepi wi fu kon sabi fa wi kan tranga a bribi fu wi èn fa wi kan sori taki wi abi bribi. A poti reti-ati man fu teki fesi na ini a Kresten gemeente, èn den man disi na wan eksempre gi wi. A Wortu fu en e taki: „Teki wan eksempre na a bribi fu den” (Hebr. 13:7). Ma a gi wi moro leki dati. Paulus ben skrifi taki wan bigi grupu „kotoigi de na wi lontu neleki wan bigi wolku” (Hebr. 12:1). A no de fu taki dati na Hebrewsma kapitel 11, Paulus no kari a nen fu ala sma di ben abi bribi. Bijbel lai nanga tru tori fu man nanga uma, yonguwan nanga owruwan di ben de na ini difrenti sortu situwâsi èn di ben abi wan tranga bribi. Na ini a ten disi pe sma no abi bribi, wi kan leri furu fu den sma dati.

Fa wi kan teki na eksempre fu sma di ben abi bribi?

10. Te wi e studeri, dan fa dati kan yepi wi fu teki na eksempre fu sma na ini Bijbel di ben abi wan tranga bribi?

10 Yu no kan teki na eksempre fu wan sma efu yu no luku finifini san a sma dati du. Te yu e leisi a buku disi, dan yu o si taki den skrifiman ondrosuku sani  finifini fu yepi yu fu kon sabi den reti-ati man nanga uma na ini a buku disi moro bun. Fu san ede yu no e ondrosuku sani tu fu kon sabi den sma disi moro bun? Te yu e studeri, dan a bun fu gebroiki den buku nanga tra sani di yu abi fu ondrosuku Bijbel finifini. Te yu e denki dipi fu den sani di yu e studeri na ini Bijbel, dan pruberi fu si na yu fesi fa sani ben de na a ten dati. Pruberi fu si den presi, fu yere den sani di ben e pasa, èn fu smeri den switi smeri. San moro prenspari, pruberi fu kon sabi fa den man nanga uma di ben abi wan tranga bribi ben e firi. Te yu e du dati, dan yu o kon sabi den moro bun, èn a o de neleki sonwan fu den na owru mati fu yu.

11, 12. (a) San kan yepi yu fu kon si Abram nanga Sarai leki bun mati fu yu? (b)  Fa yu kan kisi wini fu na eksempre fu Hana, Elia, noso Samuel?

11 Te yu e kon sabi den moro bun, dan yu o wani teki na eksempre fu den. Fu eksempre, kon meki wi taki dati yu e prakseri fu teki wan nyun frantwortu na yu tapu. Yehovah en organisâsi e gi yu a kari fu du moro na ini a diniwroko. Kande den brada e aksi yu fu froisi go tan na wan kontren pe moro preikiman de fanowdu. Noso kande den e aksi yu fu preiki na wan fasi di yu no sabi so bun noso di no makriki gi yu. Te yu e prakseri fu a frantwortu dati èn te yu begi fu en, dan a ben o bun fu denki dipi fu na eksempre fu Abram, a no so? En nanga Sarai ben de klariklari fu gowe libi a switi libi na ini Ur, èn den kisi furu blesi leki bakapisi fu dati.

12 Kande wan sma di yu sabi bun e du wan hati sani nanga yu èn a sani dati e meki yu lasi-ati. Kande yu e firi srefi fu no go moro na den konmakandra. Prakseri na eksempre fu Hana. A no ben gi pasi taki den hati sani di Penina du nanga en tapu en fu anbegi Yehovah. Te yu denki dipi fu a tori dati, dan dati o yepi yu fu teki a yoisti bosroiti, èn a o de neleki Hana na wan bun mati fu yu. Efu yu e firi brokosaka fu di yu e denki taki yu no warti noti, dan kande na eksempre fu Elia sa yepi yu. Te yu e poti prakseri na a muilek situwâsi fu en èn na a fasi fa Yehovah trowstu en, dan yu o kon si en leki wan bun mati fu yu. Son skoropikin no e tyari densrefi na wan fasi di fiti èn den e dwengi Kresten  yonguwan fu teki na eksempre fu den. Te den yonguwan disi e studeri fa Samuel ben kakafutu gi den manpikin fu Eli di ben e du wan lo kruktudu na ini na oso fu Gado, dan den o si Samuel leki wan mati fu den.

13. Te yu e teki na eksempre fu sma na ini Bijbel di ben abi bribi, dan dati wani taki dati yu no abi trutru bribi? Fruklari dati.

13 Te yu e teki na eksempre fu den sma dati na ini Bijbel, dan dati wani taki dati yu no abi trutru bribi? Kwetikweti! Memre taki a Wortu fu Yehovah e gi wi deki-ati fu teki na eksempre fu sma di ben abi bribi (1 Kor. 4:16; 11:1; 2 Tes. 3:7, 9). San moro prenspari, na taki sonwan fu den sma di wi o luku na ini a buku disi, ben de sma tu di ben e teki na eksempre fu reti-ati sma di ben libi fosi den. Fu eksempre, wi e si na ini kapitel 17 fu a buku disi taki Maria ben taki sani di Hana ben taki. Disi e sori taki a ben e si Hana leki wan eksempre. A sani dati wani taki dati Maria srefi no ben abi wan tranga bribi? Kwetikweti! Na presi fu dati, na eksempre fu Hana yepi Maria fu tranga a bribi fu en so taki a ben kan meki wan bun nen gi ensrefi na Yehovah Gado.

14, 15. San na wan tu moi sani na ini a buku disi?

14 A buku disi meki fu tranga a bribi fu yu. Den kapitel na ini a buku disi na den artikel di ben kon na doro na ini A Waktitoren na ini a pisi ten fu 2008 te go miti 2013. Den artikel dati ben nen „Abi bribi neleki den”. Ma wi poti wan tu nyun sani. Ibri kapitel abi aksi di kan yepi yu fu taki fu den sani di skrifi èn fu fiti den. Furu moi nyun prenki meki spesrutu gi a buku disi, èn den prenki di ben de kaba kon moro bigi èn moro moi. Tra sani de tu, soleki karta di e sori o ten sani ben pasa èn pe sani ben pasa. A buku Teki na eksempre fu sma di ben abi bribi, meki fu yepi wi te wi e studeri. Wi kan studeri en wi wawan, nanga wi osofamiri, èn na ini a gemeente. Furu osofamiri sa prisiri tu fu leisi den tori nanga makandra.

15 Meki a buku disi yepi yu fu sori bribi neleki den owruten futuboi fu Yehovah di ben e tai hori na en. Meki a yepi yu tu fu kon abi wan moro tranga bribi aladi yu e kon moro krosibei na yu hemel Tata, Yehovah!