Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL TUTENTI NA WÁN

A leri fu no frede èn fu no tweifri moro

A leri fu no frede èn fu no tweifri moro

1-3. Sortu sani Petrus ben si wan dei, èn san a ondrofeni a neti dati?

PETRUS e pari a boto nanga ala en krakti èn a e piri en ai fu man si na ini a dungru. San a ben e si na a owstusei? Na a leti fu a son ben e opo kon? Petrus en baka nanga en skowru ben e hati en fu di a ben pari a boto omeni yuru langa. A winti di ben e wai en wiwiri go na ala sei, ben meki a Se fu Galilea kon krasi. Doronomo bigi skwala ben e naki na fesisei fu a fisiboto, èn a kowru watra ben nati Petrus petepete. Toku a tan pari a boto go doro.

2 Petrus nanga den mati fu en ben libi Yesus en wawan na syoro. A dei dati den ben si fa Yesus gebroiki wan tu brede nanga wan tu fisi nomo fu gi nyanyan na dusundusun sma di ben abi angri. Dati meki den sma ben wani meki Yesus tron kownu, ma a no ben wani abi notinoti fu du nanga politiek. Yesus ben wani leri den bakaman fu en tu fu no abi noti fu du nanga a sani dati. Fu di a ben wani wai pasi gi den ipi-ipi sma, meki a taigi den disipel fu en fu go na ini a boto èn fu pari go na abrasei na a tra syoro. Di den doro drape, a go en wawan na tapu wan bergi fu begi.​—Mark. 6:35-45; leisi Yohanes 6:14-17.

3 Di den disipel ben e hari gowe, dan a mun ben e skèin hei na loktu. Now a ben e saka safrisafri go na a west-sei. Ma den ben pari wan tu kilometer nomo. A ben hebi srefisrefi fu tyari a boto èn a babari fu a winti nanga den skwala ben meki en muilek gi den fu taki nanga makandra. Kande Petrus ben e prakseri ala sortu sani na a ten dati.

Na ini wan pisi ten fu tu yari, Petrus ben leri furu fu Yesus, ma a ben musu leri furu sani ete

4. Fu san ede Petrus na wan bun eksempre gi wi?

 4 A no de fu taki dati a ben abi furu sani fu prakseri. Petrus ben miti Yesus fu Nasaret moro leki tu yari na fesi, èn furu sani ben pasa na ini den yari dati. A ben leri furu sani, ma a ben musu leri moro sani ete. Petrus ben musu leri fu no tweifri èn fu no frede moro. Fu di a ben de klariklari fu du dati, meki a de wan bun eksempre gi wi. Meki wi go luku fu san ede dati de so.

„Wi feni a Mesias”!

5, 6. Fa a libi fu Petrus ben de?

5 Noiti Petrus ben o frigiti a dei di a miti Yesus. En brada Andreas ben tyari a bigi nyunsu disi gi en: „Wi feni a Mesias.” Sensi a dei dati, Petrus en libi bigin kenki. Noiti moro a ben o de a srefi.​—Yoh. 1:41.

6 Petrus ben e libi na Kaperna-um, wan foto na a syoro fu a Se fu Galilea. En nanga Andreas ben e wroko makandra nanga Yakobus nanga Yohanes, den manpikin fu Sebedeyus. Den ben abi wan fisi bisnis. Petrus nanga en wefi no ben e libi den wawan, ma a mama fu en wefi, nanga en brada Andreas ben e libi tu nanga den. Fu man sorgu so wan osofamiri nanga yepi fu fisiwroko, dan a no de fu taki dati den man ben musu wroko tranga, èn den ben musu sabi fa fu du a wroko. Prakseri fa den man disi ben e wroko tranga omeni neti langa. Den ben e trowe den nèt fu den na mindri tu boto, èn den ben e hari iniwan sani kon di den ben kan fanga. Prakseri tu fa den ben e wroko tranga na deiten fu puru den fisi na ini den boto, fu seri den, fu nai den nèt èn fu krin den.

7. San Petrus kon yere fu Yesus, èn fu san ede disi ben de heri moi nyunsu?

7 Bijbel e fruteri wi taki Andreas ben de wan disipel fu Yohanes a Dopuman. Wi kan de seiker taki Petrus ben e arki bun te en brada ben e fruteri en fu a boskopu fu Yohanes. Wan dei, Yohanes sori Andreas suma na Yesus fu Nasaret, èn a taigi en: „Luku! A Pikin Skapu fu Gado!” Wantewante Andreas tron wan bakaman fu Yesus, èn a fruteri Petrus a bigi nyunsu fayafaya. A Mesias ben doro! (Yoh. 1:35-40) Sowan 4000 yari na fesi, baka di sma opo densrefi teige Gado na ini Eden, Yehovah Gado ben pramisi taki wan prenspari sma ben o kon èn a ben o gi libisma trutru howpu (Gen. 3:15). Andreas ben miti  a Frulusuman disi, iya, a ben miti a Mesias! Petrus hasti ensrefi tu fu go miti Yesus.

8. San a nen di Yesus gi Petrus ben wani taki, èn fu san ede son sma e tweifri ete na a nen dati?

8 Sma ben sabi Petrus leki Simon noso Simeon. Ma Yesus luku en èn a taki: „’Yu na Simon, a manpikin fu Yohanes. Yu o nen Seifas.’ (Na ini Grikitongo a nen na Petrus.)” (Yoh. 1:42) „Seifas” na wan wortu di wani taki „bigi ston”. Soleki fa a sori, dan den wortu fu Yesus ben de wan profeititori. A ben si na fesi taki Petrus ben o kon de leki wan bigi ston, iya, a ben o tanapu kánkan, a no ben o degedege, èn a ben o abi furu krakti tapu den bakaman fu Krestes. Ma na so Petrus ben e si ensrefi? A no sori so. Srefi sma na ini a ten disi di e leisi den Evangelietori, no e si Petrus leki wan bigi ston. Son sma e taki dati te yu e luku san Bijbel e taki fu en, dan a gersi leki a ben e degedege èn a ben e tweifri na ensrefi.

9. Sortu sani Yehovah nanga en Manpikin e luku? Fu san ede yu denki taki wi no musu tweifri na a sani dati?

9 A tru taki Petrus ben abi swakifasi èn Yesus ben sabi dati. Ma Yesus ben de leki en Papa, Yehovah, fu di ala ten a ben e luku den bun fasi fu sma. Yesus ben si taki Petrus ben abi bun fasi èn a ben wani yepi en fu sori den fasi dati moro bun. Na ini a ten disi, Yehovah nanga en Manpikin e luku den bun fasi fu wi tu. Kande wi feni en muilek fu bribi taki den e si den bun fasi fu wi. Ma wi no musu tweifri na a sani dati, èn neleki Petrus wi musu sori taki wi de klariklari fu teki leri èn fu tyari kenki kon.​—Leisi 1 Yohanes 3:19, 20.

„No frede moro”

10. Sortu sani Petrus ben si kande, ma san a go du baka?

10 Di Yesus go du a preikiwroko fu en, dan a kan taki Petrus ben go nanga en wan fu den leisi. Kande na so a kon si fa Yesus du a fosi wondru fu en, pe a kenki watra kon tron win na wan trowfesa na ini Kana. Ma wan moro prenspari sani, na taki a yere fa Yesus ben e taki fu a tumusi moi boskopu fu a Kownukondre fu Gado, di e gi sma howpu. Toku a gowe libi Yesus èn a go du en fisiwroko baka. Ma wan tu mun baka dati, Petrus miti Yesus baka. Disi leisi Yesus aksi en fu gebroiki moro furu fu en ten fu preiki a bun nyunsu makandra nanga en.

11, 12. (a) Fa a wroko fu Petrus ben waka wan neti? (b) Sortu sani Petrus ben aksi ensrefi kande di a ben arki Yesus?

 11 A neti na fesi, Petrus ben wroko tranga, ma a wroko dati no ben gi noti. Ibri tron baka den fisiman ben trowe den nèt fu den, ma den no ben e fanga noti. A no de fu taki dati Petrus du ala san a man fu feni fisi, èn a trowe en nèt na difrenti presi na ini a watra. Neleki furu fisiman, Petrus ben musu fu winsi son leisi taki a ben man si na ini a dungru watra pe den fisi ben de. Kande a ben winsi tu taki a ben man meki den go na ini a nèt. Petrus ben musu fu fuga fu di a no ben man du noti fu tyari fisi kon na ini den nèt. Petrus no ben go fisi fu en prisiri. A ben musu fanga fisi fu man sorgu gi en famiri. Te fu kaba, a doro syoro sondro wan-enkri fisi. Toku a ben musu krin den nèt. Na dati a ben e du di Yesus kon na en.

Noiti Petrus ben weri fu arki a moro prenspari boskopu di Yesus ben e preiki, èn dati ben de a Kownukondre fu Gado

12 Wan grupu sma ben de lontu Yesus, èn den ben e poti ala den prakseri na san a ben e taki. Fu di den sma ben e kon na en tapu, meki Yesus go na ini a boto fu Petrus èn a aksi en fu pari a boto gowe pikinso fu a syoro. Yesus gi den sma leri komoto fu a boto èn den ben man yere en sten krin abra a watra. Petrus ben arki nanga ala en prakseri, neleki den sma na syoro. Noiti a ben weri fu arki a moro prenspari boskopu di Yesus ben e preiki, èn dati ben de a Kownukondre fu Gado. A ben o de wan bigi grani trutru fu yepi a Krestes panya a moi boskopu disi na ini a heri kondre. Ma a ben o man du dati? Fa Petrus ben o man sorgu gi en osofamiri? Kande Petrus prakseri a tra neti baka, di a ben wroko so langa sondro fu fanga wan-enkri fisi.​—Luk. 5:1-3.

13, 14. Sortu wondru Yesus du gi Petrus, èn san Petrus du?

13 Di Yesus kaba taki, dan a taigi Petrus: „Go pe a watra dipi, dan un musu saka den fisinèt fu unu go na ini a watra, so taki unu kan kisi fisi.” Petrus ben e tweifri srefisrefi. A ben taki: „Leriman, heri neti wi wroko tranga èn wi no kisi noti, ma fu di yu e aksi dati, meki mi o saka den fisinèt go na ini a watra.” Ma na kaba a ben kaba wasi den nèt. A no de fu taki dati a no ben wani saka den nèt baka na ini a watra, spesrutu now di den fisi no ben e beti moro! Toku a du san Yesus taki  èn a kan taki a taigi den fisiman na ini a tra boto fu du dati tu.​—Luk. 5:4, 5.

14 Di Petrus ben e hari a nèt kon na ini a boto, a no ben man bribi taki a ben hebi so. A hari moro tranga, èn fosi yu denki a si taki wan heri ipi fisi ben e wunyuwunyu na ini a nèt. Esi-esi a kari den man na ini a tra boto fu kon yepi en. Di den kon fu yepi en, dan den si taki wán boto nomo no ben o man tyari ala den fisi. Den lai den tu boto nanga fisi, ma fu di den fisi ben furu tumusi, meki den boto bigin sungu. Petrus no ben man bribi san a ben e si. A ben si kaba fa Yesus ben du wondru, ma disi leisi a ben du wan wondru gi en nanga en famiri! Tra fasi leki Petrus, Yesus ben abi a makti fu  meki den fisi go na ini den nèt. Petrus bigin frede. A saka kindi na fesi Yesus èn a taki: „Mi Masra, mi no warti fu de krosibei fu yu, bika mi na wan sondu sma.” Fa wan man leki en ben kan bun nofo fu de makandra nanga a sma di ben man gebroiki a makti fu Gado na a fasi dati?​—Leisi Lukas 5:6-9.

„Mi Masra, . . . mi na wan sondu sma”

15. Fa Yesus sori Petrus taki a no ben abi fu frede noso tweifri?

15 Na wan switi fasi Yesus piki en: „No frede moro. Now yu o bigin kisi sma libilibi” (Luk. 5:10, 11). Disi no ben de a ten fu tweifri noso fu frede. Petrus no ben abi reide fu tweifri na aladei sani soleki a fisiwroko. A no ben abi reide fu frede tu taki a ben o meki fowtu èn taki a no bun nofo fu wroko makandra nanga Yesus. Yesus ben abi wan bigi wroko fu du, wan diniwroko di ben o abi krakti tapu libisma na ini a ten di e kon. A ben e dini wan Gado di ’de klariklari fu gi pardon’ (Yes. 55:7). Yehovah ben o sorgu gi den sani di den abi fanowdu na ini den libi èn na ini na anbegi fu den.​—Mat. 6:33.

16. San Petrus, Yakobus, nanga Yohanes du di Yesus kari den fu waka na en baka, èn fu san ede dati ben de a moro bun bosroiti di den ben kan teki?

16 Neleki Yakobus nanga Yohanes, Petrus no draidrai fu du san Yesus taki. Bijbel e taki: „Den tyari den boto fu den go baka na syoro, dan den libi ala sani èn den waka na en baka” (Luk. 5:11). Petrus ben poti bribi na ini Yesus èn na ini a sma di seni en kon. Dati ben de a moro bun bosroiti di a ben kan teki. Na ini a ten disi, Kresten de tu di e du tranga muiti fu no tweifri èn fu no frede moro, so taki den kan du diniwroko gi Gado. Na so fasi den Kresten disi e sori bribi neleki Petrus. Ala ten Yehovah e sorgu gi den wan di e frutrow na en tapu.​—Ps. 22:4, 5.

„Fu san ede yu bigin tweifri?”

17. Sortu sani Petrus ben man memre ete fu den tu yari baka di a ben miti Yesus?

17 Soleki fa wi si na a bigin fu a kapitel disi, dan Petrus ben e pari en boto na tapu a Se fu Galilea, a neti di a winti ben e wai bun tranga. A sani disi ben pasa sowan tu yari baka di Petrus miti Yesus. A no de fu taki dati wi no sabi sortu sani Petrus ben e prakseri na a momenti dati. Someni sani ben de di a ben kan prakseri! Yesus ben dresi a mama fu Petrus en  wefi. A ben hori a Bergitaki. Den sani di Yesus ben e leri sma, èn den wondru di a ben e du, ben e sori ibri tron baka taki a ben de a Mesias, noso a sma di Yehovah ben teki. A no de fu taki dati o moro den mun ben e pasa o moro a ben e kon makriki gi Petrus fu no frede èn fu no tweifri moro. Yesus ben teki Petrus leki wan fu den 12 apostel fu en! Toku syatu baka dati, Petrus ben o si taki a ben musu du muiti ete fu no frede èn fu no tweifri moro.

18, 19. (a) Fruteri san Petrus si na tapu a Se fu Galilea. (b) Fa Yesus du san Petrus ben aksi en?

18 Di musudei ben e doro, dan wantronso Petrus tapu fu pari a boto èn a go sidon leti-opo. A ben si wan sani e buweigi na tapu a watra! Na a leti fu a munkenki ben e skèin na tapu a watra di ben e seki? Nôno, a no ben kan de dati, fu di a sani no ben e seki, a ben de leti-opo. Na wan sma! Iya, na wan man ben e waka na tapu a watra fu a se! Di a man ben e kon moro krosibei, a ben gersi leki a ben o waka pasa den. Den disipel ben frede srefisrefi fu di den ben denki taki na wan takru sani den ben e si. Ne a man taki: „Abi deki-ati, na mi. No frede.” A man ben de Yesus!​—Mat. 14:25-28.

19 Petrus piki en: „Masra, efu na yu, dan taigi mi fu waka kon na yu na tapu a watra.” A sani disi e sori taki Petrus ben abi deki-ati. Fu di a ben breiti srefisrefi fu si na aparti wondru disi, meki a ben wani du moro fu sori taki a ben abi bribi. A ben wani waka na tapu a watra tu. Na wan switi fasi Yesus taigi Petrus fu kon na en. Petrus kren komoto na ini a boto èn a go tanapu na tapu a watra fu a se di ben e seki go-kon. Prakseri fa Petrus ben musu firi di a si taki a ben man tanapu na tapu a watra sondro fu sungu. A ben musu fu fruwondru di a ben e waka go miti Yesus. Ma heri esi a ben e firi tra fasi.​—Leisi Mateyus 14:29.

„Di Petrus si fa a bigi winti e wai, dan a kon frede”

20. (a) Sortu sani puru Petrus prakseri èn san pasa leki bakapisi fu dati? (b) San Yesus ben leri Petrus?

20 Petrus ben musu tan poti prakseri na Yesus. Na Yesus ben e gebroiki a krakti fu Yehovah fu meki Petrus waka na tapu a watra. Yesus ben e du dati fu di Petrus ben poti bribi na ini en. Ma wan tra sani puru Petrus prakseri. Bijbel e taki: „Di Petrus si fa a bigi winti e wai, dan a kon frede.” Di Petrus bigin si fa den skwala ben e naki na a boto, èn fa a winti ben e wai watra nanga skuma go na loktu, dan a bruya. Kande a  ben si kaba fa a ben o sungu na ini a watra. Di a bigin frede, dan a bigin lasi bribi. A man di Yesus ben kari a Bigi ston, fu di a ben o man tanapu kánkan sondro fu degedege, bigin sungu leki wan ston, fu di en bribi ben kon swaki. Petrus ben sabi swen, ma fu di a ben frede, meki a bari: „Masra, yepi mi!” Yesus langa en anu grabu en hori èn a hari en kon. Leti na a momenti dati, di den ben de ete na tapu a watra, Yesus leri Petrus a prenspari sani disi: „Yu no e bribi nofo. Fu san ede yu bigin tweifri?”​—Mat. 14:30, 31.

21. Fu san ede a no bun fu tweifri, èn san wi kan du fu no tweifri?

21 Luku taki Yesus ben si taki Petrus ben „bigin tweifri”. Te wan sma e tweifri, dan dati kan abi takru bakapisi gi en. Te wi e bigin tweifri, dan dati kan pori a bribi fu wi safrisafri. Wi musu tan meki tranga muiti, so taki dati no pasa nanga wi! Fa wi kan du dati? Na te wi e tan poti prakseri na den yoisti sani. Wi no musu tan poti prakseri na sani di e meki wi frede, na sani di e meki wi lasi-ati, èn na sani di e puru wi prakseri na Yehovah nanga en Manpikin, fu di dati o meki wi tweifri moro nanga moro. Ma efu wi e tan poti prakseri na Yehovah nanga en Manpikin, na den sani di den ben du, den sani di den e du now, èn den sani di den o du gi den sma di lobi den, dan wi sa tan abi wan tranga bribi.

22. Fu san ede a e tyari wini kon te wi e sori bribi neleki Petrus?

22 Di Petrus nanga Yesus go baka na ini a boto, dan Petrus si fa a bigi winti ben e saka. A Se fu Galilea ben e kon tiri. Petrus nanga den tra disipel taki: „Yu na trutru a Manpikin fu Gado” (Mat. 14:33). Di dei broko, a ben musu fu de so taki Petrus ben de nanga tangi na ati. A ben leri fu no tweifri èn fu no frede moro. A no de fu taki dati a ben musu tyari furu kenki kon ete, fosi a ben kan tron a Kresten di de leki wan bigi ston, soleki fa Yesus ben taki. Ma Petrus ben abi a fasti bosroiti fu tan meki muiti èn fu tan go na fesi. Yu abi a fasti bosroiti dati tu? Yu o si taki a o tyari wini kon te yu e sori bribi neleki Petrus.