Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL TINASEIBI

„Luku, mi na a umasrafu fu Yehovah!”

„Luku, mi na a umasrafu fu Yehovah!”

1, 2. (a) Fa a man di kon na Maria taki en odi? (b) Sortu bosroiti Maria ben musu teki èn fa dati ben o kenki en libi?

MARIA opo en ede luku a man di ben kon na ini en oso, èn a ben fruwondru fu si en. A man no aksi fu Maria en papa noso en mama. A ben kon na en! Maria ben de seiker taki a man disi no ben de fu Nasaret. Na ini a pikin foto pe Maria ben e tan, a ben makriki fu sabi efu wan sma ben de fu wan tra presi. Iniwan sma ben o man si taki a man disi no ben de fu drape. A taki nanga Maria na wan heri tra fasi leki fa sma ben gwenti taki nanga en. A man taigi en: „Odi, uma di kisi wan bigi grani, Yehovah de nanga yu.”​—Leisi Lukas 1:26-28.

2 Na so Bijbel e bigin taki fu Maria, na umapikin fu Eli, di ben e libi na ini a foto Nasaret, na Galilea. Fu taki en leti, a fosi leisi te Bijbel e taki fu Maria, dan Maria musu teki wan tu prenspari bosroiti. A ben meki mofo fu trow nanga a temreman Yosef. A man disi no ben gudu, ma a ben e bribi tranga na ini Gado. Sobun, a ben gersi leki a libi fu Maria ben seti kaba. A ben o horibaka gi en masra Yosef, èn a ben o seti wan osofamiri nanga en. Ma wantronso, a man disi kon na en fu taigi en taki a Gado fu en gi en wan wroko, noso wan frantwortu di ben o kenki en libi.

3, 4. Sortu sani wi no musu luku efu wi wani kon sabi Maria moro bun, ma na sortu sani wi musu poti prakseri?

3 Furu sma e fruwondru te den e si taki Bijbel no e fruteri furu fu Maria. Bijbel no e taki furu fu a fasi fa a kweki, a no e taki krin sortu fasi a ben abi, èn a no e taki srefisrefi fa a ben tan. Ma toku den sani di Gado Wortu e fruteri wi fu Maria, e yepi wi fu kon sabi en moro bun.

4 Efu wi wani kon sabi Maria moro bun, dan wi no musu  luku den someni sani di den kerki e leri sma fu en. Sobun, wi no o luku den someni prenki nanga popki di sma meki fu en. Wi no o poti prakseri tu na den frekti kerkileri di e gi a sakafasi uma disi wan lo kefalek nen soleki „Mama fu Gado” nanga „Kownu-uma fu Hemel”. Na presi fu dati, wi o luku san Bijbel e leri wi fu Maria. Disi sa yepi wi fu kon frustan moro bun o tranga a bribi fu en ben de, èn fa wi kan sori bribi neleki en. Den sani disi prenspari srefisrefi.

Wan engel e kon na Maria

5. (a) Te wi e luku fa Maria ben e firi di Gabrièl gi en odi, dan san wi e leri fu en? (b) Sortu prenspari sani wi e leri fu Maria?

5 A man di kon na Maria no ben de wan libisma. A ben de na engel Gabrièl. Di a kari Maria „uma di kisi wan bigi grani”, dan Maria „skreki srefisrefi”, èn a aksi ensrefi fu san ede a man ben taki en odi na a fasi dati (Luk. 1:29). Suma ben gi en bigi grani? Maria no ben e fruwakti taki libisma ben o gi en grani. Na engel ben taki fu a grani di Yehovah Gado ben gi en. Na dati ben prenspari gi Maria. Ma a no ben e prefuru fu denki taki Gado ben feni en bun. Na eksempre fu Maria e leri wi taki wi musu du muiti fu sorgu taki Gado feni wi bun, èn taki noiti wi musu prefuru fu denki taki dati de so kaba. Gado no lobi sma di abi heimemre, ma a lobi den wan di abi sakafasi èn a e yepi den tu.​—Yak. 4:6.

Maria no ben e prefuru fu denki taki Gado ben feni en bun

6. Sortu grani Maria ben o kisi, soleki fa na engel ben taigi en?

6 Maria ben o abi fu sori a sakafasi dati, fu di na engel ben taigi en taki a ben o kisi wan tumusi bigi grani. A taigi en taki a ben o kisi wan pikin di ben o prenspari moro ala tra libisma. Gabrièl ben taki: „Yehovah Gado o gi en a kownusturu fu en papa David. A o tiri fu têgo leki Kownu fu a famiri fu Yakob èn en Kownukondre o tan fu ala ten” (Luk. 1:32, 33). A no de fu taki dati Maria ben sabi taki moro leki wán dusun yari na fesi, Gado ben pramisi David taki wan bakapikin fu en ben o tiri fu têgo (2 Sam. 7:12, 13). Sobun, a manpikin fu en ben o de a Mesias di a pipel fu Gado ben e fruwakti hondrohondro yari langa!

Na engel Gabrièl ben taigi Maria taki a ben o kisi wan tumusi bigi grani

7. (a) San na aksi di Maria poti gi na engel sori fu en? (b) San yongu sma na ini a ten disi kan leri fu Maria?

 7 San moro prenspari, na taki na engel taigi Maria taki sma ben o kari a pikin dati „a manpikin fu a Moro Heiwan”. Fa wan libisma ben kan tron a mama fu a Manpikin fu Gado? Fu taki en leti, fa Maria ben o man kisi wan manpikin? En nanga Yosef ben meki mofo, ma den no ben trow ete. Dati meki Maria aksi na engel krin: „Fa disi kan? Noiti mi no sribi nanga wan man?” (Luk. 1:34) Luku taki Maria no ben e syen fu taki dati a no ben sribi ete nanga wan man. Na presi fu dati, a ben e si en leki wan grani taki a ben de wan nyunwenke ete. Na ini a ten disi, furu yonguwan e hasti densrefi fu abi seks, èn den lobi fu spotu den wan di wani wakti nanga a sani dati. A no de fu taki dati a grontapu disi kenki. Ma Yehovah no kenki (Mal. 3:6). Neleki fa a ben de na ini a ten fu Maria, na so Yehovah lobi den wan di e hori densrefi na den leri fu en.​—Leisi Hebrewsma 13:4.

8. Fa Maria di ben abi sondu ben o man kisi wan pikin di no abi sondu?

8 Aladi Maria ben e dini Gado nanga en heri ati, toku a ben de wan sondu libisma. Dan fa a ben o man meki a Manpikin fu Gado, wan pikin di no ben o abi sondu? Gabrièl taigi en: „Santa yeye o kon na yu tapu èn a krakti fu a Moro Heiwan sa tapu yu. Fu dati ede sma o taki dati a pikin di o gebore santa èn den o kari en Gado Manpikin” (Luk. 1:35). A wortu santa wani taki „krin”, noso „soifri”. Ala sondu libisma e kisi sondu pikin. Ma disi leisi, Yehovah ben o du wan bigi wondru. A ben o teki a libi fu en Manpikin na hemel, èn a ben o poti en na ini a muru fu Maria. Baka dati, a ben o gebroiki a krakti fu en, noso en santa yeye fu „tapu” Maria, so taki a pikin no ben o kisi nowan sondu. Maria ben bribi a sani di na engel taigi en? San Maria taki?

Maria e piki Gabrièl

9. (a) Fu san ede sma di e tweifri na san Bijbel e taki, no abi leti fu krutu a tori fu Maria? (b) Na sortu fasi Gabrièl tranga a bribi fu Maria?

9 Sma di e tweifri na a tori disi èn sosrefi son kerki leriman, no man bribi taki wan nyunwenke ben kan meki wan pikin. Aladi den kisi so furu leri, toku den no e frustan wan tru tori di no muilek srefisrefi fu frustan. Gabrièl ben taki dati „Gado man du ala san a taki” (Luk. 1:37). A yongu uma  Maria ben bribi den sani di Gabrièl ben taigi en, fu di a ben abi wan tranga bribi. Ma dati no ben wani taki dati a ben e bribi iniwan sani di sma ben e taigi en. Fu di Maria ben abi bunbun frustan, meki a ben abi buweisi fanowdu fu man bribi den sani di a ben yere. Gabrièl ben de klariklari fu gi en moro buweisi. A fruteri en fu Elisabet, a famiriman fu en di ben owru kaba èn di no ben man meki pikin. Gado ben du wan wondru di meki taki a kon de nanga bere.

10. Fu san ede wi no musu denki taki a grani di Maria kisi no ben o gi en nowan broko-ede?

10 San Maria ben o du now? A ben abi wan wroko fu du, èn a ben de seiker taki Gado ben o du ala san Gabrièl ben taki. Wi no musu denki taki a grani disi no ben o gi Maria nowan enkri broko-ede. Wán sani, na taki a ben meki mofo fu trow nanga Yosef. A man disi ben o wani trow ete nanga en te a ben o kon sabi taki a ben de nanga bere? Wan tra sani, na taki kande a ben e si a wroko di a ben kisi leki wan kefalek hebi frantwortu. A beibi na ini en bere ben o de Gado en eigi lobi Manpikin, iya, a moro prenspari sma di Gado meki! A ben o abi fu sorgu a beibi disi, èn a ben o abi fu kibri en gi den ogri fu a grontapu disi. Dati ben de wan hebi frantwortu fu tru!

11, 12. (a) San srefi tranga man di ben e dini Gado nanga den heri ati ben e du son leisi te den ben kisi hebi frantwortu fu Gado? (b) San wi e leri fu Maria te wi e luku san a piki Gabrièl?

11 Bijbel e sori taki srefi tranga man di ben e dini Gado nanga den heri ati, ben e frede son leisi fu teki den hebi frantwortu di Gado ben gi den. Moses ben feni taki a no ben o man taki gi Gado, fu di a no ben e taki grati (Eks. 4:10). Yeremia ben feni taki a ben de „wan boi ete”, èn taki a ben yongu tumusi fu teki a wroko di Gado ben gi en (Yer. 1:6). Yona ben lon gi a wroko di a kisi! (Yona 1:3) Fa a ben de nanga Maria?

12 A sani di Maria ben taki e sori taki a ben abi sakafasi èn taki a ben e gi yesi na Gado. Te nanga now ala sma di abi bribi sabi den wortu dati ete. A ben piki Gabrièl: „Luku, mi na a umasrafu fu Yehovah! Meki sani pasa nanga mi soleki fa  yu taki” (Luk. 1:38). Wan umasrafu ben de a moro lagi srafu, fu di a libi fu en ben de na ini en masra anu. Na so Maria ben e si en Masra, Yehovah. A ben sabi taki Yehovah ben o meki sani waka bun nanga en, èn taki Yehovah e tan yepi den wan di e tai hori na en. A ben sabi tu taki Yehovah ben o blesi en efu a ben o du ala san a man fu tyari a frantwortu di a ben kisi.​—Ps. 18:25.

Maria ben sabi taki en lobi-ati Gado, Yehovah, ben o meki sani waka bun nanga en

13. Te wi feni taki wan sani di Gado aksi wi fu du muilek tumusi, noso taki wi no o man du en kwetikweti, dan fa na eksempre fu Maria kan yepi wi?

13 Kande Gado e aksi wi fu du wan sani, ma wi feni taki a sani dati muilek tumusi, noso taki wi no o man du en kwetikweti. Ma na ini a Wortu fu en, a e gi wi furu reide fu frutrow na en tapu, neleki fa Maria ben du dati (Odo 3:5, 6). Wi o du dati? Efu wi e frutrow na en tapu, dan a o blesi wi, èn dati o tranga a bribi fu wi.

Maria e go na Elisabet

14, 15. (a) Fa Yehovah blesi Maria di a go na Elisabet nanga Sakaria? (b) San den sani di Maria taki na Lukas 1:46-55 e sori wi fu en?

14 Den sani di Gabrièl ben taki fu Elisabet ben prenspari srefisrefi gi Maria. Sortu tra umasma na grontapu ben o man frustan a situwâsi fu en moro bun? Maria hasti ensrefi fu go na a bergi kontren fu Yuda, èn a kan taki a teki dri noso fo dei fosi a doro na Elisabet. Di Maria go na ini na oso fu Elisabet nanga a priester Sakaria, dan Yehovah gi en moro krin buweisi fu tranga a bribi fu en. Di Maria taki Elisabet odi, dan wantewante a beibi na ini Elisabet en bere dyompo fu prisiri. A santa yeye ben de na tapu Elisabet, èn a kari Maria „a mama fu mi Masra”. Gado ben meki Elisabet kon sabi taki a manpikin fu Maria ben o tron en Masra, a Mesias. Boiti dati, Gado meki a prèise Maria fu di a ben tan gi yesi na Gado. Elisabet taigi en: „Koloku tu fu na uma di bribi den sani di a yere” (Luk. 1:39-45). Iya, ala den sani di Yehovah ben pramisi Maria, ben o kon tru!

A matifasi di Maria nanga Elisabet ben abi ben de wan blesi gi den ala tu

15 Baka dati, Maria bigin taki. Te now ete den sani di a ben taki, skrifi na ini Gado Wortu. (Leisi Lukas 1:46-55.) Disi na a wan-enkri presi na ini Bijbel pe Maria e taki so furu sani, èn den wortu disi e yepi wi fu kon sabi en moro bun. Wi e si taki a de nanga tangi, fu di a e prèise Yehovah gi a grani di a  gi en fu tron a mama fu a Mesias. Wi e si tu taki a abi wan tranga bribi, fu di a taki dati Yehovah lagi den heimemrewan nanga den maktiwan, èn taki a e yepi den mofinawan nanga den pôtiwan di wani dini en. Wan tra sani di wi kan si, na taki Maria ben sabi Gado Wortu bun. Te yu luku en bun, dan a ben taki fu moro leki 20 difrenti sani di skrifi na ini den Hebrew Buku fu Bijbel. *

16, 17. (a) Sortu denki fu Maria nanga en manpikin wi musu kon abi? (b) Na sortu blesi a tori fu Maria nanga Elisabet e memre wi?

16 A de krin taki Maria ben e denki dipi fu den sani di a ben leri fu Gado Wortu. Ma toku a ben tan abi sakafasi, fu di a no ben taki san ensrefi ben e denki, ma a ben e taki san skrifi na ini Gado Wortu. Wan dei, a manpikin di ben e gro na ini en bere ben o sori taki a ben abi a srefi denki leki en mama, fu di a ben o taki: „Den sani di mi e leri sma, a no fu misrefi, ma den de fu a sma di seni mi kon” (Yoh. 7:16). A bun te wi e aksi wisrefi: ’Mi abi a srefi lespeki disi gi a Wortu fu Gado? Noso, mi e tan hori na mi eigi denki?’ A de krin taki Maria ben abi a yoisti denki.

17 Maria tan sowan dri mun nanga Elisabet, èn a no de fu taki dati den gi makandra furu deki-ati (Luk. 1:56). A moi Bijbel tori disi e memre wi taki a de wan blesi fu abi mati. Efu wi e suku mati di lobi wi Gado Yehovah trutru, dan seiker dati o tranga a bribi fu wi èn wi o kon moro krosibei na En (Odo 13:20). Ma a ten ben doro gi Maria fu drai go baka na oso. San Yosef ben o taki te a ben o kon sabi taki Maria ben de nanga bere?

Maria nanga Yosef

18. San Maria fruteri Yosef, èn san Yosef du?

18 A no de fu taki dati Maria no wakti teleki a bere fu en bigin sori. A ben musu fu taigi Yosef. Kande a ben aksi ensrefi san a bun man disi di ben e lespeki Gado, ben o du te a ben o taigi en. Toku a fruteri en ala san ben pasa nanga en. Yu kan frustan taki Yosef no ben sabi srefisrefi san fu du. A ben wani bribi a yongu uma disi di a ben lobi so te, ma a ben gersi leki a ben waka gi en. Bijbel no e taki san Yosef ben e denki  fu a tori. Ma a e fruteri wi taki a bosroiti fu broko trow nanga Maria, fu di na a ten dati sma ben e si wan man nanga wan uma di ben meki mofo, leki sma di ben trow. Ma a no ben wani taki Maria kisi syen na fesi ala sma. Dati meki a bosroiti fu broko trow nanga en sondro taki sma sabi (Mat. 1:18, 19). A ben musu fu hati Maria fu si fa a bun man disi ben e broko en ede nanga a sani disi di ben kon miti en. Toku Maria no ben mandi taki Yosef no ben e bribi en.

19. Fa Yehovah yepi Yosef fu du a yoisti sani?

19 Yehovah yepi Yosef fu du a yoisti sani. Na ini wan dren,  na engel fu Gado taigi Yosef taki na wan wondru fu Gado ben meki taki Maria kon de nanga bere. A sani dati ben musu fu de wan frulekti gi Yosef! Now Yosef du san Maria ben du kaba. Yosef meki Yehovah tiri en. A trow nanga Maria, èn a sreka ensrefi fu teki a tumusi aparti frantwortu na en tapu fu sorgu gi Yehovah en Manpikin.​—Mat. 1:20-24.

20, 21. San sma di trow èn sosrefi sma di e prakseri fu trow kan leri fu Maria nanga Yosef?

20 Sma di trow èn sosrefi den wan di e prakseri fu trow, kan leri wan moi sani fu a yongu trowpaar disi di ben libi sowan 2000 yari pasa. Te Yosef ben e si fa a wefi fu en ben e tyari den frantwortu di a ben abi leki mama, dan a ben musu fu breiti taki a ben meki na engel fu Yehovah tiri en. A ben musu fu de so taki Yosef ben kon si o prenspari a de fu frutrow tapu Yehovah te a ben e teki prenspari bosroiti (Ps. 37:5; Odo 18:13). A no de fu taki dati a tan sori koni nanga switifasi te a ben e teki bosroiti leki edeman fu na osofamiri.

21 Ma san wi kan taki fu Maria te wi e luku taki a ben de klariklari fu trow nanga Yosef? Kande a ben muilek gi Yosef na a bigin fu bribi a tori fu Maria. Ma fu di na Yosef ben o tron edeman fu na osofamiri, meki Maria wakti teleki a bosroiti san ben musu pasa moro fara. Dati ben de wan bun sani di a du, èn Kresten umasma na ini a ten disi kan teki leri fu en. A kan taki den sani disi leri Yosef nanga Maria o prenspari a de fu taki krin nanga makandra.​—Leisi Odo 15:22.

22. Sortu prenspari sani Maria nanga Yosef ben abi di den seti a trowlibi fu den? Sortu sani ben e wakti den?

22 A no de fu taki dati a yongu trowpaar disi ben abi den moro prenspari sani di ben o yepi den fu abi wan bun trowlibi. Den ala tu ben lobi Yehovah Gado moro ala tra sani, èn den ben e angri fu plisi en. Dati meki den ben o de bun papa nanga mama. Ma a no de fu taki dati den ben o kisi moro bigi blesi. Ma moro hebi tesi ben e wakti den tu. Den ben o abi fu kweki Yesus, di ben o gro kon tron a moro prenspari sma di oiti ben libi na grontapu.

^ paragraaf 15 A de krin taki wan tu fu den sani di Maria ben taki, na sani di Hana ben taki. Na uma disi di ben e dini Gado nanga en heri ati ben kisi blesi tu fu Yehovah fu di a ben meki a kisi pikin.​—Luku a faki di nen „Tu kefalek moi begi”, na ini kapitel 6.