Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL TUTENTI

„Mi e bribi”

„Mi e bribi”

1. Fruteri fa Marta ben e firi èn fu san ede a ben e firi so.

MARTA no ben man frigiti a grebi fu en brada. En brada ben beri na ini wan bergi-olo di ben tapu nanga wan ston. Marta ben e sari srefisrefi, iya, a ben e firi neleki a hebi ston fu a grebi ben de na en tapu. A no ben man bribi taki en lobi brada Lasarus no ben de moro. Furu sani ben pasa na ini den fo dei baka di Lasarus hari en lasti bro. Furu sma di ben e sari ben e kon na den oso doronomo fu trowstu den.

2, 3. (a) Fa Marta ben e firi kande di a si Yesus? (b) San a prenspari sani di Marta taki e sori fu en?

2 Ma now, a man di ben de a moro bun mati fu Lasarus, ben e tanapu na fesi Marta. Di Marta si Yesus, dan a kan taki a bigin sari srefisrefi, fu di Yesus ben de a wan-enkri sma na heri grontapu di ben kan yepi en brada. Ma toku Marta ben kisi pikinso trowstu di a ben de nanga Yesus na dorosei fu a pikin foto Betania di de na sei wan bergi. Na ini a syatu pisi ten dati di a ben de nanga Yesus, a kisi deki-ati baka fu a switifasi di Yesus sori en, èn fu a fasi fa a sori taki a ben e firi gi en. Yesus aksi en wan tu sani di yepi en fu prakseri a bribi fu en èn na opobaka howpu di a ben abi. A takimakandra disi meki taki Marta taki a tumusi prenspari sani disi di noiti ete a ben taki: „Mi e bribi taki yu na a Krestes, a Manpikin fu Gado, a wan di ben o kon na grontapu.”​—Yoh. 11:27.

3 Soleki fa den wortu dati e sori, dan Marta ben abi wan tranga bribi. Bijbel e fruteri wi wan tu sani nomo fu en, ma toku wi kan leri prenspari sani fu en di kan yepi  wi fu tranga wi eigi bribi. Fa so? Meki wi go luku a fosi tori na ini Bijbel di e taki fu Marta.

’A ben e broko en ede nanga tumusi furu sani’

4. Fa na osofamiri fu Marta ben de tra fasi leki tra famiri, èn fa den sma disi ben de nanga Yesus?

4 Wan tu mun na fesi, Lasarus ben de na libi èn a ben de gosontu. Na ini na oso fu en na Betania, wan tumusi prenspari sma ben o kon na en, èn dati na Yesus Krestes. Lasarus, Marta, nanga Maria ben de brada nanga sisa èn soleki fa a sori, den ben e libi na ini a srefi oso. Son sabiman e taki dati kande Marta ben de a moro owruwan fu den dri, fu di na en ben e poti prakseri moro furu na fisitiman èn son leisi na en nen e kari fosi (Yoh. 11:5). Wi no sabi efu den dri sma disi ben trow oiti. Awansi fa a no fa, den ben tron bun mati fu Yesus. Na a ten di Yesus ben e du a diniwroko fu en na ini Yudea, pe furu sma ben e gens en èn ben e sori bita-ati gi en, a ben gwenti tan na den oso. A no de fu taki dati Yesus ben breiti taki a ben kan tan nanga den sma disi di ben lobi en èn di ben e horibaka gi en.

5, 6. (a) Fu san ede na Marta ben abi furu fu du di Yesus go na den oso? (b) San Maria du di Yesus kon na den oso?

5 Moro furu na Marta ben e seti sani na ini na oso èn na en ben e poti prakseri na fisitiman. Soleki fa a sori, dan Marta ben e wroko tranga èn ala ten a ben abi furu fu du. Na so a ben de tu di Yesus ben go na den oso. Fosi yu denki, a ben sreka ala sortu nyanyan gi a prenspari fisitiman disi. A kan taki Yesus ben tyari wan tu mati fu en kon tu. Na a ten dati, a ben de tumusi prenspari fu sori switifasi gi fisitiman. Te wan fisitiman ben doro, dan a sma fu na oso ben e bosi en fu gi en wan switikon, a ben e puru en susu na en futu, a ben e wasi en futu, èn a ben e lobi switismeri-oli gi en ede. (Leisi Lukas 7:44-47.) Na ososma ben musu sorgu taki a fisitiman ben e kisi bun nyanyan èn wan bun presi fu rostu.

6 Marta nanga Maria ben e sreka furu sani fu di Yesus  ben o kon na den. Aladi furu sma e denki taki Maria ben de a wan di ben lobi leri sani, toku a ben e yepi en sisa tu na oso. Ma baka di Yesus doro, Maria ben abi tra sani na prakseri fu di Yesus ben o gebroiki na okasi disi fu gi sma leri! Tra fasi leki den kerki fesiman fu a ten dati, Yesus ben abi lespeki gi umasma èn a ben de klariklari fu gi den leri fu Gado Kownukondre, a moro prenspari sani di a ben e leri sma na ini a diniwroko fu en. Maria di ben breiti taki a ben kan leri den sani disi, go sidon na Yesus futusei èn a arki bun san Yesus ben abi fu taki.

7, 8. Fu san ede Marta bigin mandi nanga en sisa, èn fa a sori fa a ben e firi?

7 Wi kan frustan taki Marta no ben lobi a sani disi kwetikweti. Fu di sma ben kon na en oso, meki a ben wani sreka someni nyanyan èn a ben wani du someni sani. A sani dati meki taki a ben e broko en ede moro nanga moro èn a kon bruya. Di a ben e waka go-kon fu du ala den sani disi, a si en sisa e sidon nomo sondro fu a yepi en. Yu denki taki a swa en fesi, taki a soktu, noso taki a masi en fesi? A no ben o fruwondru wi efu a du dati. A no ben man du ala a wroko en wawan!

8 Te fu kaba, Marta no ben man hori ensrefi moro. A koti Yesus mofo, èn a taki: „Masra, a no e trobi yu taki mi sisa e meki mi wawan du ala sani? Taigi en dan, meki a kon yepi mi” (Luk. 10:40). A ben taki krin fa a ben e firi. Son Bijbelvertaling e taki dati a ben aksi: „Masra, Yu no abi bisi taki . . . ?” Baka dati, a e aksi Yesus fu taigi Maria meki a kon yepi en nanga a wroko.

9, 10. (a) San Yesus piki Marta? (b) Fa wi du sabi taki a no krutu Yesus ben e krutu Marta fu a tranga wroko di a ben du fu sreka wan switi nyanyan?

9 A kan taki Marta fruwondru fu a sani di Yesus piki  en, èn na dati pasa tu nanga furu sma di leisi Bijbel bakaten. Na wan switi fasi Yesus taki: „Marta, Marta, yu e broko yu ede nanga furu sani èn yu abi tumusi furu fu du. Ma wan tu sani nomo de fanowdu, iya, wán sani nomo. Maria teki a bun pisi, èn mi no o puru disi na en anu” (Luk. 10:41, 42). San Yesus ben wani taki nanga den wortu dati? A ben taki dati Marta ben lobi grontapu sani moro Gado? Na krutu a ben e krutu en fu di a ben e sreka wan switi nyanyan?

Aladi Marta ben e ’broko en ede nanga tumusi furu sani’, toku a ben de klariklari fu teki piri-ai

10 Nôno. Yesus ben si krin taki Marta ben du den sani dati nanga wan krin ati èn fu di a ben abi lobi. Boiti dati,  Yesus no ben feni taki a fowtu te sma e du furu muiti fu sori switifasi gi fisitiman. A ben de klariklari fu go na „wan bigi fesa” di Mateyus ben hori gi en wan pisi ten na fesi (Luk. 5:29). A no a nyanyan di Marta ben sreka ben de a problema, ma na den sani di a ben e si leki prenspari sani. A ben poti so furu prakseri na a bigi nyanyan di a ben e sreka, taki a ben frigiti san ben de a moro prenspari sani. San ben de dati?

Yesus ben abi warderi gi a switifasi di Marta sori gi en, èn a ben sabi taki a ben e du den sani dati nanga wan krin ati èn fu di a ben abi lobi

11, 12. Fa Yesus piri-ai gi Marta na wan switi fasi?

11 Yesus, a wan-enkri Manpikin fu Yehovah Gado, ben de na Marta oso fu leri sma den tru tori fu Gado. Nowan tra sani, no ben prenspari so leki dati, iya, srefi a switi nyanyan nanga den sani di a ben e sreka no ben prenspari so. A no de fu taki dati Yesus ben sari taki Marta ben misi wan moi okasi fu tranga a bribi fu en, ma a libi en meki a teki en eigi bosroiti. * Ma Marta no ben abi a reti fu aksi Yesus fu dwengi Maria fu kon yepi en nanga a wroko, fu di dati ben o meki taki Maria lasi na okasi fu teki leri fu Yesus.

12 Dati meki Yesus piri-ai gi Marta na wan switi fasi. A kari en nen wan tu leisi fu gi en wan korostu firi èn a gi en a dyaranti taki a no ben abi fu ’broko en ede nanga tumusi furu sani’. Efu a ben meki wán noso tu sani fu nyan, dan dati ben o sari, spesrutu fu di okasi ben de fu leri furu sani fu Gado. Awansi fa a no fa, Yesus no ben o tapu pasi gi Maria fu teki „a bun pisi”. Nôno, a no ben o tapu pasi gi en fu teki leri fu Gado!

13. San wi kan leri fu a fasi fa Yesus piri-ai gi Marta?

13 Na ini a ten disi, bakaman fu Krestes kan leri furu fu a sani disi di pasa na ini na oso fu Marta. Noiti wi musu gi pasi taki tra sani e kon moro prenspari gi wi leki den sani fu Gado (Mat. 5:3). A bun fu sori switifasi neleki Marta èn fu wroko tranga, ma noiti wi musu broko wi ede so te nanga ala sortu sani, taki wi e misi den moro prenspari  sani. Te wi abi demakandra nanga wi Kresten brada nanga sisa, dan wi no e si dati leki okasi fu go nyan bigi nyanyan. Moro furu den okasi disi na fu gi makandra deki-ati èn fu tranga a bribi fu makandra. (Leisi Romesma 1:11, 12.) Awansi na wan pikin sani nomo de fu nyan, toku wi kan gi makandra deki-ati na so wan okasi.

En lobi brada dede èn a kisi wan opobaka

14. Fu san ede wi kan de seiker taki Marta na wan bun eksempre gi wi?

14 Marta ben teki a piri-ai di Yesus ben gi en èn a ben leri wan sani fu en? Iya, a du dati. Te na apostel Yohanes e bigin nanga a moi tori fu a brada fu Marta, dan a e memre wi na a sani disi: „Yesus ben lobi Marta, en sisa, nanga Lasarus” (Yoh. 11:5). Soleki fa wi e si na ini a kapitel dati, dan wan tu mun ben pasa baka di Yesus ben go na Betania. A de krin taki Marta no ben hori Yesus na ati fu di a ben gi en rai na wan lobi-ati fasi. A teki a rai dati. A sani disi e sori tu taki Marta ben abi wan tranga bribi. Na so a de wan moi eksempre gi wi, fu di ten na ten wi alamala abi rai fanowdu, a no so?

15, 16. (a) San Marta du kande di a brada fu en kon siki? (b) Fu san ede a howpu fu Marta nanga Maria ben de fu soso?

15 Di Marta en brada kon siki, dan a no de fu taki dati Marta sorgu bun gi en. A du ala san a man fu meki en brada firi moro bun èn fu yepi en fu kon betre. Ma toku, Lasarus ben kon moro siki. Ibri yuru, ibri dei, den sisa fu en ben de na en sei fu sorgu gi en. A ben musu fu de so taki te Marta ben e luku a mangri fesi fu en brada, dan a ben e memre den bun ten nanga den takru ten di den ben pasa makandra.

16 Di a ben gersi leki den no ben man yepi Lasarus moro, dan Marta nanga Maria seni wan boskopu gi Yesus. A ben e preiki na ini wan foto di ben de sowan tu dei waka moro fara. Den ben seni a krin boskopu disi: „Masra, yu mati di yu lobi so te, siki” (Yoh. 11:1, 3). Den ben sabi taki Yesus ben lobi a brada fu den, èn den ben bribi taki a ben o du ala san a man fu yepi en mati. Den ben  e howpu taki Yesus ben o doro drape fosi a ben lati kaba? Efu na dati den ben e howpu, dan a ben o de fu soso, bika Lasarus kon dede.

17. San Marta bigin aksi ensrefi, èn san a du di a yere taki Yesus ben de na pasi e kon?

17 Marta nanga Maria ben e row gi a brada fu den. Den sreka sani gi a beri fu en èn furu sma fu Betania nanga a kontren drape kon trowstu den. Ma den no ben yere noti fu Yesus. Kande Marta bigin aksi ensrefi moro nanga moro fu san ede Yesus no ben doro ete. Te fu kaba, fo dei baka di Lasarus dede, Marta yere taki Yesus ben de na pasi e kon. Marta no ben de wan sma di ben e draidrai. Dati meki aladi a ben e sari, a hasti ensrefi go miti Yesus, sondro fu taigi Maria.​—Leisi Yohanes 11:18-20.

18, 19. Sortu howpu Marta ben abi èn fu san ede a ben moi taki a ben abi a howpu dati?

18 Di a si en Masra, a taki a sani di en nanga Maria ben e prakseri omeni dei kaba. A taki: „Masra, efu yu ben de dya, mi brada no ben o dede.” Ma toku, Marta no ben lasi howpu èn a no lasi bribi. A taki moro fara: „Ma mi e bribi taki Gado o gi yu ala san yu e aksi en.” Wantewante Yesus taki wan sani fu tranga a bribi fu en. Yesus taigi en: „Yu brada o kon na libi baka.”​—Yoh. 11:21-23.

19 Marta ben e prakseri taki Yesus ben taki fu na opobaka na ini a ten di e kon, èn fu dati ede a taki: „Mi sabi taki a o kon na libi baka te na opobaka o de na a lasti dei” (Yoh. 11:24). A ben de wan heri moi sani taki a ben poti bribi na ini a leri dati. Son Dyu kerki fesiman di sma ben e kari Saduseiman, no ben e bribi taki wan opobaka de, aladi dati skrifi krin na ini Gado Buku di skrifi nanga yepi fu santa yeye (Dan. 12:13; Mark. 12:18). Ma Marta ben sabi taki Yesus ben leri sma fu na opobaka howpu èn taki a ben gi sma wan opobaka tu, aladi nowan fu den sma dati ben dede so langa leki Lasarus. Marta no ben sabi san ben o pasa.

20. Luku Yohanes 11:25-27 èn fruklari san den wortu fu Yesus èn a piki fu Marta wani taki?

20 Ne Yesus taki wan sani di sma no man frigiti: „Mi  na a opobaka nanga a libi.” Iya, Yehovah Gado gi en Manpikin a makti fu gi sma na heri grontapu wan opobaka na ini a ten di e kon. Yesus aksi Marta: „Yu e bribi disi?” Dan Marta taigi en a sani di skrifi na a bigin fu a kapitel disi. Marta ben bribi taki Yesus ben de a Krestes, noso a Mesias. A ben bribi taki a ben de a Manpikin fu Yehovah Gado, èn taki den profeiti ben taki na fesi dati a ben o kon na grontapu.​—Yoh. 5:28, 29; leisi Yohanes 11:25-27.

21, 22. (a) Fa Yesus sori taki a ben e firi gi den wan di ben e sari? (b) Fruteri fa sani waka di Lasarus kisi wan opobaka.

21 Yehovah Gado nanga en Manpikin, Yesus Krestes, abi warderi gi sma di abi bribi neleki Marta? Wi e kisi krin  piki tapu na aksi dati te wi e luku den sani di pasa baka dati èn di Marta si nanga en eigi ai. Marta lon go kari en sisa. Baka dati, a si taki Yesus ben e sari srefisrefi di a ben e taki nanga Maria èn nanga den someni sma di ben e sari. Marta si fa Yesus en ai furu nanga watra fu di a ben e sari taki en mati dede. A yere fa Yesus taigi sma fu lolo a ston puru di ben de na fesi a grebi fu en brada.​—Yoh. 11:28-39.

22 Marta no ben feni a sani dati bun. A ben sabi taki a dedeskin ben musu fu smeri now, bika na fo dei ben pasa kaba. Yesus memre en: „Mi no ben taigi yu taki yu o si a glori fu Gado te yu e bribi?” Marta ben bribi, èn a ben si a glori fu Yehovah Gado. Leti drape, Gado gi en Manpikin a makti fu meki Lasarus kon na libi baka! A no de fu taki dati noiti Maria ben o man frigiti den momenti disi: A momenti di Yesus ben taki nanga wan tranga sten: „Lasarus, kon na doro!” A momenti di a yere fa Lasarus opo èn waka kon safrisafri na a mofodoro fu a grebi-olo aladi a ben domru na ini krosi di sma ben gebroiki fu sreka a dedeskin fu en. A momenti di Yesus taigi den sma fu „lusu en meki a gowe”. Sosrefi a prenspari momenti di Marta nanga Maria lon go brasa den brada fu di den ben breiti srefisrefi. (Leisi Yohanes 11:40-44.) A ben de neleki wan hebi ben komoto na Marta tapu, fu di a no ben e sari moro!

Fu di Marta ben e bribi na ini Yesus, meki en nanga Maria si fa a brada fu den kisi wan opobaka

23. San Yehovah nanga Yesus wani du gi yu, èn san yu musu du?

23 A tori disi e sori taki na opobaka fu den dedewan a no wan winsi nomo, ma na wan Bijbel leri di e trowstu wi èn a de wan sani di pasa trutru (Yob 14:14, 15). Yehovah nanga en Manpikin lobi fu blesi sma di e sori bribi, neleki fa den ben blesi Marta, Maria, nanga Lasarus. Na so Yehovah nanga en Manpikin o blesi yu tu te yu e tranga a bribi fu yu.

’Marta ben e yepi nanga a wroko’

24. San na a lasti sani di Bijbel e taki fu Marta?

24 Baka dati, Bijbel e taki ete wán leisi fu Marta. A ben  de a bigin fu a lasti wiki fu Yesus en libi na grontapu. Yesus ben sabi heri bun sortu tesi ben o miti en, èn fu dati ede a go tan baka na a tiri presi pe a ben gwenti tan na ini Betania. Fu drape, a waka dri kilometer go na Yerusalem. Yesus nanga Lasarus ben e nyan na a oso fu Simon, wan man di ben abi gwasi fosi, èn a tori dati e taki fu Marta fu a lasti leisi. A tori e taki: ’Marta ben e yepi nanga a wroko.’​—Yoh. 12:2.

25. Fu san ede a de wan grani na ini a ten disi fu abi umasma leki Marta na ini den gemeente?

25 Iya, na so Marta ben de! A fosi leisi te Bijbel e taki fu en, a ben e wroko, èn a lasti leisi te Bijbel e taki fu en, a e wroko baka. A ben e du ala san a man fu sorgu gi den sani di den sma na en lontu ben abi fanowdu. A de wan grani taki na ini a ten disi, umasma di de leki Marta, de na ini den gemeente fu den bakaman fu Krestes. Iya, den umasma disi abi deki-ati, den lobi gi trawan sani, èn a bribi di den abi e meki taki ala ten den e du bun gi trawan. Na dati Marta tan du? A gersi so. Efu na so, dan a du wan koni sani fu di tra problema ben o miti en ete.

26. Fa a bribi fu Marta yepi en?

26 Wan tu dei baka dati, Marta en lobi-ati Masra, Yesus, dede na wan ogri-ati fasi. Boiti dati, den srefi ogri-ati hoigriman di ben kiri Yesus, ben wani kiri Lasarus tu fu di na opobaka fu en ben e meki taki furu sma poti bribi na ini Yesus. (Leisi Yohanes 12:9-11.) A no de fu taki dati te fu kaba, dede ben o prati Marta tu fu en brada nanga sisa di a ben lobi so te. Wi no sabi fa dati pasa èn o ten dati pasa, ma wi kan de seiker fu a sani disi: A tranga bribi di Marta ben abi, yepi en fu horidoro te na a kaba. Fu dati ede a bun taki Kresten na ini a ten disi abi bribi neleki Marta.

^ paragraaf 11 Na ini a fosi yarihondro, Dyu uma no ben mag leri nyun sani. Den wan-enkri sani di den ben e leri, na fa fu du osowroko. Dati meki a kan taki Marta no ben feni en bun srefisrefi taki wan umasma ben e sidon na a futusei fu wan leriman fu teki leri.