Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL TUTENTI NA TU

A tai hori na en Masra di tesi miti en

A tai hori na en Masra di tesi miti en

1, 2. San Petrus ben e howpu kande di Yesus ben e taki na ini Kaperna-um, ma san pasa na presi fu dati?

PETRUS ben e luku den sma bun di ben e arki Yesus. Den ben de na ini a snoga na Kaperna-um. Petrus en oso ben de na ini a foto disi, sosrefi a fisi bisnis fu en na a noordsei syoro fu a Se fu Galilea. Boiti dati, furu fu en mati, en famiri, nanga tra bisnis mati fu en ben e libi drape. Dati meki a ben musu fu de so taki Petrus ben e howpu taki den sma fu a foto dati ben o si Yesus neleki fa en ben e si Yesus. A ben e howpu tu taki neleki en, den ben o breiti taki a moro bigi leriman ben e gi den leri fu Gado Kownukondre. Ma sani no ben o waka soleki fa Petrus ben howpu.

2 Furu sma ben tapu fu arki Yesus. Sonwan fu den ben e krutukrutu fu di den no ben e agri nanga a boskopu fu Yesus. Ma a sani di ben e gi Petrus moro broko-ede, na a fasi fa sonwan fu Yesus en eigi disipel ben e du. A ben de krin fu si taki den no ben breiti moro nanga den nyun sani di Yesus ben leri den. Now den ben e mandi, èn den ben kisi bita-ati srefi. Sonwan fu den bigin taki srefi taki den sani di Yesus ben e leri den ben e gi den groskin. Den weigri fu arki moro fara, den komoto na ini a snoga, èn den no waka moro baka Yesus.​—Leisi Yohanes 6:60, 66.

3. San Petrus ben man du difrenti leisi fu di a ben abi bribi?

3 A ben de wan muilek ten gi Petrus èn gi den tra apostel. Petrus no ben e frustan krin san den sani ben wani taki di Yesus ben leri den a dei dati. A ben man si fu san ede wan sma ben o mandi nanga den sani di Yesus ben taki, efu wan sma no ben e fruklari den sani dati gi den. San Petrus ben o du? A no ben de a fosi leisi taki a ben musu sori efu a ben o tai hori na en Masra, èn a no ben o de a lasti leisi tu. Meki  wi go luku now fa a bribi fu Petrus yepi en fu no drai baka gi en Masra di tesi miti en.

Petrus tai hori na en Masra, aladi trawan no du dati

4, 5. Sortu sani di Yesus du ben fruwondru sma?

4 Nofo tron, Petrus ben e fruwondru fu den sani di Yesus ben e taki èn ben e du. Ibri tron baka, a Masra fu en ben e du èn ben e taki sani di ben e fruwondru sma. Wán dei na fesi, Yesus ben gi dusundusun sma nyanyan na wan wondru fasi. Dati meki den sma dati ben pruberi fu poti en leki kownu. Ma furu sma ben fruwondru di a lon gowe èn di a taigi den disipel fu en fu go na ini wan boto èn fu hari go na Kaperna-um. Di den disipel ben de na se a neti dati, dan Yesus du ete wan sani di meki den fruwondru. A waka na tapu a watra fu a krasi Se fu Galilea, èn na so a leri Petrus fu abi bribi.

5 Na mamanten, den kon si taki den ipi-ipi sma ben teki boto fu kon na den baka. Ma a ben de krin fu si taki na wani den sma ben wani nomo taki Yesus du ete wan wondru fu gi den nyanyan. A no de so taki den ben e angri fu kon sabi den tru tori fu Gado. Yesus piri-ai gi den fu a sani dati (Yoh. 6:25-27). Na fu a tori dati Yesus ben e taki moro fara na ini a snoga na Kaperna-um. Drape a du ete wan sani di fruwondru den sma. A pruberi fu leri den wan prenspari tru tori di no ben makriki fu frustan.

6. Sortu agersitori Yesus fruteri den arkiman, èn san den du?

6 Yesus no ben wani taki den sma ben e si en leki wan man di ben e prati nyanyan gi trawan. Ma a ben wani taki den si en leki a sma di ben o meki taki den kisi têgo libi efu den ben o poti bribi na ini a srakti-ofrandi fu en èn efu den ben o teki na eksempre fu en. Dati meki a gi den wan agersitori pe a ben e teki ensrefi gersi nanga mana, a brede di ben fadon komoto na hemel na ini a ten fu Moses. Di son sma no ben wani bribi na agersitori, dan a gebroiki wan agersitori di ben e sori krin taki den ben musu nyan en skin èn dringi en brudu fu man kisi têgo libi. Na a sani disi meki taki den sma na ini a snoga bigin atibron. Sonwan fu den taki: „A sani di a taki e gi groskin. Suma kan tan arki den sani  disi?” Furu fu Yesus en eigi apostel bosroiti fu no waka moro na en baka. *​—Yoh. 6:48-60, 66.

7, 8. (a) San Petrus no ben e frustan ete? (b) Fa Petrus piki na aksi di Yesus ben poti gi den apostel?

7 San Petrus ben o du? A ben musu fu de so taki en srefi ben fruwondru fu den sani di Yesus ben taki. A no ben e frustan ete taki Yesus ben musu dede fu man du a wani fu Gado. Yu denki taki Petrus ben o teki na eksempre fu den disipel di ben drai baka gi Yesus a dei dati? Nôno. Petrus ben abi wan prenspari sani di den man dati no ben abi. San na dati?

8 Yesus drai luku den apostel fu en èn a taki: „Unu no wani gowe tu?” (Yoh. 6:67) A ben taki nanga ala den twarfu apostel, ma na Petrus wawan piki en. Na so a ben de nofo tron. Kande Petrus ben de a moro owruwan fu den. Awansi fa a no fa, fu a heri grupu, na en ben lobi fu taki krin fa a ben denki. A gersi leki noiti Petrus ben e tweifri fu taki san a ben e denki. Ma disi leisi, a taki a moi sani disi di wi no man frigiti: „Masra, na suma wi musu go? Yu abi wortu di e gi sma têgo libi.”​—Yoh. 6:68.

9. Fa Petrus sori taki a ben e tai hori na Yesus?

9 Den wortu disi no e naki yu ati? A bribi di Petrus ben abi na ini Yesus, yepi en fu kweki wan tumusi prenspari fasi. Iya, a yepi en fu tai hori na Yesus. Petrus ben si krin taki Yesus na a wan-enkri Frulusuman di Yehovah seni kon, èn taki den sani di Yesus ben e leri sma fu Gado Kownukondre, ben e kibri sma libi. Petrus ben sabi taki awansi a no ben man frustan wan tu sani, toku a no ben man go nowan tra presi efu a ben wani taki Gado feni en bun èn efu a ben wani kisi têgo libi.

Wi musu tan gi yesi na den leri fu Yesus, awansi den e fruwondru wi, noso awansi wi abi wan tra denki

10. Fa wi na ini a ten disi kan tai hori na Yesus neleki fa Petrus ben du dati?

10 Na so yu e firi tu? A de wan sari sani taki furu sma na ini a ten disi e taki dati den lobi Yesus, ma den no e tai hori na en. Efu wi wani tai hori na Krestes nanga wi heri ati, dan wi musu abi a srefi denki di Petrus ben abi fu den leri fu Yesus. Wi musu kon sabi den leri dati, wi musu kon frustan san  den wani taki, èn wi musu hori wisrefi na den, awansi den e fruwondru wi noso awansi wi abi wan tra denki. Na te wi e tai hori na Gado, dan fosi wi o man abi a howpu fu kisi a têgo libi di Yesus wani gi wi.​Leisi  Psalm 97:10.

Petrus no drai baka gi Yesus di a gi en piri-ai

11. Sortu waka Yesus nanga den bakaman fu en go teki? (Luku sosrefi den sani di skrifi na ondrosei.)

11 Wan pisi ten baka dati, Yesus nanga den apostel fu en, sosrefi wan tu fu en disipel go teki wan langa waka go na a noordsei. Komoto fu a blaw watra fu a Se fu Galilea, yu ben man si na ede fu Hermon-bergi di ben abi snew na tapusei. A bergi disi ben de te na a noordsei fu a Pramisi Kondre. Di a grupu ben e kren go moro hei na den dorpu di ben de krosibei fu Sesareya na ini Filipi, dan safrisafri den ben man si moro fu a bergi. * Komoto fu a moi presi disi, yu ben man si wan bigi pisi fu a Pramisi Kondre di ben de na zuidsei. Na drape Yesus poti wan prenspari aksi gi den bakaman fu en.

12, 13. (a) Fu san ede Yesus aksi fa den sma ben e si en? (b) Fa a sani di Petrus piki Yesus, sori taki a ben abi trutru bribi?

12 „Suma den [sma] e prakseri taki mi de?”, na dati Yesus ben wani sabi. Wi kan si kaba fa Petrus luku Yesus na ini en ai, fu si ete wan tron taki en Masra ben abi switifasi èn taki a ben abi bun furu koni. Yesus ben wani sabi fa den arkiman fu en ben e denki fu den sani di den ben e si èn ben e yere. Den disipel fu Yesus piki na aksi, èn den fruteri Yesus sortu fowtu denki sma ben abi fu en. Ma Yesus ben wani sabi moro. Den apostel fu en ben abi den srefi fowtu denki dati? A aksi den: „Ma san unu e taki?”​—Luk. 9:18-20.

13 Agen, na Petrus ben gaw fu piki. Sondro fu frede, a taki krin san furu fu den drape ben denki. A taki: „Yu na a Krestes, a Manpikin fu a libilibi Gado.” A no de fu taki dati Yesus ben breiti nanga a piki di Petrus gi en, èn a prèise en gi dati. Yesus memre Petrus taki na Yehovah Gado, èn nowan enkri libisma ben tyari a tru tori disi kon na krin gi den sma  di ben abi trutru bribi. Petrus ben kisi na okasi fu frustan wan fu den moro moi tru tori di Yehovah ben tyari kon na krin oiti. Iya, a ben tyari kon na krin suma na a Mesias, noso a Krestes di a ben pramisi langa ten kaba!​—Leisi Mateyus 16:16, 17.

14. Sortu prenspari frantwortu Yesus ben gi Petrus?

14 A Krestes disi na a sma di owruten profeititori ben e kari a ston di den bowman no ben o wani (Ps. 118:22; Luk. 20:17). Na den profeititori disi Yesus ben abi na prakseri di a taki dati Yehovah ben o seti wan gemeente na tapu a srefi bigi ston disi. No so langa na fesi Petrus ben kon frustan taki na a Mesias ben de a bigi ston dati. Ne a gi Petrus tumusi prenspari frantwortu na ini a gemeente dati. A no taki dati Petrus ben o hei moro den tra apostel soleki fa son sma e taki, ma na frantwortu nomo a gi en. A gi Petrus „den sroto fu a Kownukondre” (Mat. 16:18, 19). Petrus ben o abi a grani fu gi dri difrenti grupu na okasi fu go na ini a Kownukondre fu Gado. A fosi grupu na den Dyu, baka dati den Samariasma, èn leki lasti den trakondre sma.

15. Fu san ede Petrus piri-ai gi Yesus èn san a taigi en?

15 Ma bakaten Yesus taki dati efu wan sma kisi furu sani, dan den o aksi furu fu en, èn na a sani disi Petrus ondrofeni (Luk. 12:48). Yesus tan fruteri den bakaman fu en prenspari tru tori di abi fu du nanga a Mesias. A fruteri den tu taki a ten ben e doro taki sma ben o pina en èn den ben o kiri en na ini Yerusalem. Petrus no ben lobi a sani disi di Yesus ben taki. A hari Yesus go na wan sei èn a piri-ai gi en. A taki: „Masra, du yusrefi wan bun. A sani disi no o miti yu kwetikweti.”​—Mat. 16:21, 22.

16. Fa Yesus piri-ai gi Petrus, èn san wi alamala kan leri fu a sani di Yesus taki?

16 A no de fu taki dati Petrus ben e suku a bun fu Yesus, sobun a ben musu fu skreki di a yere san Yesus piki en. A drai en baka gi Petrus, èn a luku den tra disipel di kande ben abi a srefi denki. Ne a taki: „Komoto na mi tapu, Satan! Yu  wani taki mi musu fadon, bika yu no e denki leki fa Gado e denki, ma yu e denki leki fa libisma e denki” (Mat. 16:23; Mark. 8:32, 33). Wi alamala kan teki leri fu a sani disi di Yesus taki. A kan pasa makriki taki wi e si sani soleki fa libisma e si sani, na presi taki wi abi a denki fu Gado. Efu dati de so, dan sondro fu wi sabi wi ben kan gi trawan deki-ati fu plisi Satan na presi fu Gado, awinsi na a bun fu den wi e suku. Ma san Petrus du?

17. San Yesus ben wani taki di a taigi Petrus fu komoto na en tapu?

17 Petrus ben musu fu frustan taki Yesus no ben wani taki dati en na Satan Didibri. Yesus ben e si Petrus leki wan bun sma. Fu taki en leti, di a taigi Petrus fu komoto na en tapu, dan na piri-ai a ben piri-ai nomo gi Petrus fu di a ben abi wan fowtu denki. Petrus no ben musu tapu pasi gi en Masra, ma a ben musu horibaka gi en.

Soso te wi de klariklari fu teki piri-ai èn fu kisi wini fu en, wi o man kon moro krosibei fu Yesus Krestes nanga en Tata, Yehovah Gado

18. Fa Petrus tai hori na Yesus èn fa wi kan teki na eksempre fu en?

18 Petrus ben krutukrutu, a ben atibron, noso a ben span en fesi? Nôno, a teki a piri-ai nanga sakafasi. Agen, a sori taki a tai hori na Yesus. Ten na ten ala sma di e waka baka Krestes, sa musu kisi piri-ai. Soso te wi de klariklari fu teki piri-ai èn fu kisi wini fu en, wi o man kon moro krosibei fu Yesus Krestes nanga en Tata, Yehovah Gado.​—Leisi Odo 4:13.

Petrus tai hori na en Masra srefi di a ben kisi piri-ai

Petrus kisi blesi fu di a tai hori na Yesus

19. Sortu aparti sani Yesus ben taki èn san Petrus ben aksi ensrefi kande?

19 Syatu baka dati, Yesus taki ete wan sani di fruwondru den apostel. A taki: „Fu tru mi e taigi unu taki sonwan fu unu di e tanapu dyaso, no sa dede kwetikweti fosi den si a Manpikin fu libisma e kon leki kownu na ini en Kownukondre” (Mat. 16:28). A no de fu taki dati Petrus ben wani sabi moro fu a sani disi. San Yesus ben wani taki trutru? Kande Petrus ben e aksi ensrefi efu a piri-ai di a kisi didyonsro ben wani taki dati a no o kisi a moi grani dati.

20, 21. (a) Fruteri san Petrus si na ini wan fisyun. (b) Fa a takimakandra fu den dri sma na ini a fisyun yepi Petrus fu kon si sani na a yoisti fasi?

 20 Ma pikinmoro wán wiki baka dati, Yesus teki Yakobus, Yohanes, nanga Petrus tyari go na „wan hei bergi”. Kande dati ben de a Hermon-bergi, di no ben de tumusi fara fu drape. A kan taki a ben de netiyuru fu di sribi ben e kiri den dri man dati. Ma di Yesus begi, dan wan sani pasa di puru ala a sribi na den ai.​—Mat. 17:1; Luk. 9:28, 29, 32.

21 Yesus bigin kenki leti na den fesi. En fesi bigin brenki, teleki a ben e brenki leki a son. Den krosi fu en ben kon weti so te, taki den ben e brenki tu. Ne den si taki tu sma ben de nanga Yesus, wan fu den ben e prenki Moses èn a trawan ben e prenki Elia. Den ben e taki nanga Yesus fu „a ten te [a] ben o gowe, wan sani di ben musu fu pasa na Yerusalem”. A kan taki na fu a dede nanga na opobaka fu en den  ben e taki. Petrus ben kon si krin taki a no ben abi leti fu denki taki Yesus no ben o pina èn taki a no ben o dede.​—Luk. 9:30, 31.

22, 23. (a) Fa Petrus sori taki a ben de fayafaya èn taki a ben abi switifasi? (b) Sortu tra blesi Petrus, Yakobus, nanga Yohanes kisi a neti dati?

22 Petrus ben de nomonomo fu abi wan prati na a tumusi prenspari fisyun disi, kande fu no meki a kaba esi-esi. A ben gersi leki Moses nanga Elia ben e gowe libi Yesus. Dati meki Petrus taki: „Leriman, a bun taki wi dya. Meki wi bow dri tenti, wán gi yu, wán gi Moses, èn wán gi Elia”. Den tu sma na ini a fisyun disi no ben abi tenti fanowdu, fu di den ben dede langa ten kaba. Sobun, Petrus ben taki sondro fu denki. Ma yu no lobi a man disi di ben de fayafaya èn di ben abi switifasi?​—Luk. 9:33.

Petrus, Yakobus, nanga Yohanes kisi a grani fu si wan heri moi fisyun

23 Petrus, Yakobus, nanga Yohanes kisi wan tra blesi a neti dati. Wantronso wan wolku ben de fu si na loktu èn a ben e tan anga leti na tapusei fu den. Komoto fu a wolku, wan sten ben de fu yere. A ben de a sten fu Yehovah Gado! A ben taki: „Disi na mi Manpikin, a wan di mi teki. Un arki en.” Ne a fisyun kon na wan kaba, èn den wawan ben de na tapu a bergi nanga Yesus.​—Luk. 9:34-36.

24. (a) Fa Petrus kisi wini fu a fisyun? (b) Fa wi na ini a ten disi kan kisi wini fu a fisyun dati?

24 A no de fu taki dati a fisyun dati ben de wan bigi blesi gi Petrus, èn na so a de tu gi wi. Furu yari baka dati, a skrifi fu a grani di a ben abi a neti dati. ’Nanga en eigi ai’ a si a glori fu Krestes leki Kownu na hemel. A fisyun dati ben de wan kontru fu furu profeititori na ini Gado Wortu, èn a tranga a bribi fu Petrus so taki a ben o man horidoro te tra tesi ben o miti en. (Leisi 2 Petrus 1:16-19.) A fisyun kan du a srefi gi wi efu neleki Petrus wi e tai hori na a Masra di Yehovah poti fu tiri wi. Boiti dati, wi musu teki leri fu en, wi musu teki a piri-ai nanga a trangaleri fu en, èn wi musu tan waka na en baka ibri dei.

^ paragraaf 6 Den sma na ini a snoga ben atibron srefisrefi fu den sani di Yesus ben taki, aladi wán dei nomo na fesi den ben bari taki a ben de wan profeiti fu Gado. A sani disi e sori krin taki den ben e kenki den prakseri gaw.​—Yoh. 6:14.

^ paragraaf 11 Komoto fu den syoro fu a Se fu Galilea, a waka dati ben teki sowan 50 kilometer. Den ben komoto fu wan kontren di ben lagi sowan 210 meter moro a se, fu go na wan kontren di ben hei sowan 350 meter moro a se. Den ben waka pasa na ini presi di ben moi srefisrefi.