Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL NEIGI

A du wan koni sani

A du wan koni sani

1-3. (a) Fa a du kon taki ogri ben de fu miti na osofamiri fu Abigayil? (b) Sortu sani wi wani kon sabi fu a koni uma disi?

ABIGAYIL ben e si na a yonguman en ai taki a ben bruya. A yonguman disi ben frede srefisrefi èn a ben abi leti fu firi so. Wan bigi ogri ben de fu pasa. Na a srefi momenti dati, sowan 400 fetiman ben de na pasi e kon. Den ben seti densrefi fu kiri ibri mansma na ini na oso fu Nabal, a masra fu Abigayil. Fu san ede?

2 A heri sani ben bigin nanga Nabal. A ben du wan takru sani baka èn a no ben sori lespeki srefisrefi. Ma disi leisi, sani no ben o waka bun gi en, fu di a ben kosi a lobi-ati fesiman fu wan grupu tranga fetiman. Now, wan fu den yonguman di ben e wroko gi Nabal, kande wan skapuman, ben kon na Abigayil fu di a ben howpu taki Abigayil ben o feni wan fasi fu yepi den. Ma fa wan-enkri uma nomo ben o man feti nanga wan heri legre?

Fa wan-enkri uma nomo ben o man feti nanga wan heri legre?

3 Meki wi go luku fosi suma ben de a koni uma disi. Suma ben de Abigayil? Fa a problema disi bigin? San wi kan leri fu a fasi fa a sori bribi?

„A ben koni srefisrefi èn a ben moi fu tru”

4. Sortu fasi Nabal ben abi?

4 Abigayil nanga Nabal no ben e fiti na makandra leki masra nanga wefi. Abigayil ben de wan heri bun wefi, ma  Nabal ben de wan takru masra. A tru taki a ben abi moni. Dati meki a ben denki taki a ben de wan tumusi prenspari sma. Ma fa tra sma ben e denki fu en? Wan tra sma no de di Bijbel e taki so takru fu en. A nen fu en e sori kaba fa a ben de. En nen wani taki „sondro frustan”, noso „don”. Yu denki taki na en mama nanga papa ben gi en a nen dati di a gebore? Noso na den maniri fu en ben meki taki sma kari en so bakaten? Awinsi fa a no fa, a nen dati ben fiti en. Nabal ben „grofu èn a ben e libi takru nanga sma”. A ben lobi fu pina trawan èn a ben de wan sopiman. Dati meki furu sma ben e frede en èn den no ben lobi en.​—1 Sam. 25:2, 3, 17, 21, 25.

5, 6. (a) Sortu fasi fu Abigayil yu feni moro moi? (b) San ben kan meki taki Abigayil trow nanga so wan wisiwasi man?

5 Abigayil ben de heri tra fasi leki Nabal. En nen wani taki „Mi papa kon breiti”. Furu papa breiti te den abi wan moi umapikin, ma wan koni papa breiti moro te a e si taki na umapikin fu en abi moi fasi. Nofo tron, sma di moi no feni taki a de fanowdu fu kweki fasi soleki koni, deki-ati, noso bribi. Ma a no ben de so nanga Abigayil. Bijbel e prèise en fu di a ben koni srefisrefi èn fu di a ben moi.​—Leisi 1 Samuel 25:3.

6 Son sma na ini a ten disi ben kan aksi densrefi fa so wan koni yongu uma kan trow nanga so wan wisiwasi man. Memre taki na ini Bijbel ten, furu papa nanga mama ben e suku trowpatna gi den pikin fu den. Awinsi dati no ben pasa, toku a ben prenspari taki papa nanga mama ben feni a patna bun di a pikin fu den teki. A de so taki na fu di Nabal ben gudu èn fu di a ben abi biginen, meki Abigayil en papa nanga mama teki en leki masra gi na umapikin fu den? Na fu di den ben pôti meki den teki a bosroiti dati? Awinsi fa a no fa, Nabal ben abi moni ma a no ben de wan bun masra.

7. (a) San papa nanga mama na ini a ten disi no musu du efu den wani taki den pikin fu den e kon abi wan yoisti denki fu a trowlibi? (b) Sortu fasti bosroiti Abigayil ben abi?

7 Koni papa nanga mama e du ala muiti fu sorgu taki  den pikin fu den e kon abi wan yoisti denki fu a trowlibi. Den no e gi den pikin deki-ati fu trow nanga wan sma soso fu di a sma dati abi moni. Den no e dwengi den pikin tu fu bigin hori nanga wan sma te den yongu tumusi ete fu tyari bigisma frantwortu (1 Kor. 7:36). Ma a ben lati tumusi gi Abigayil fu prakseri den sortu sani dati. Awansi fa a no fa, a ben trow kaba nanga Nabal, èn a ben abi a fasti bosroiti fu horidoro na ini a muilek situwâsi disi.

A „rigeri nanga den”

8. Suma Nabal ben kosi, èn fu san ede dati ben de wan bigi fowtu?

8 Nabal ben meki en moro muilek gi Abigayil now. A man di a ben kosi ben de David. A ben de a reti-ati futuboi fu Yehovah di Samuel ben salfu. Dati ben sori taki na David Gado ben teki fu tron kownu na ini a presi fu Saul (1 Sam. 16:1, 2, 11-13). Fu di David ben e lowe gi Kownu Saul di ben dyarusu èn di ben wani kiri en, meki a ben e tan na ini a sabana makandra nanga den 600 bun fetiman fu en.

9, 10. (a) Na ini sortu situwâsi David nanga den man fu en ben e feti fu tan na libi? (b) Fu san ede Nabal ben musu abi warderi gi den sani di David nanga den man fu en ben du? (Luku sosrefi den sani di skrifi na ondrosei fu bladzijde 90.)

9 Nabal ben e tan na ini Mayon, ma a ben e wroko na ini a foto Karmel di ben de krosibei fu drape, èn pe a ben abi gron kande. * Lontu den foto dati hei presi ben de pe grasi ben e gro di ben bun fu kweki skapu. Nabal ben abi 3000 skapu. Ma a heri kontren lontu den foto dati, ben de wan bigi sabana. Na a zuidsei yu ben abi a bigi sabana fu Paran. Na a owstusei, pe a Sowtu Se ben de, yu ben abi sabana di ben lai nanga lagipresi nanga bergi-olo. Na ini den kontren disi David nanga den man fu en ben e meki muiti fu tan na libi. A no de fu taki dati den ben e onti meti fu man abi nyanyan, èn a libi ben tranga gi den.  Den ben gwenti miti nanga den yonguman di ben e wroko leki skapuman gi a guduman Nabal.

10 Fa den srudati disi di ben e wroko tranga ben e libi nanga den skapuman? A ben o makriki gi den fu fufuru wan skapu wawan leisi, ma den no ben e du dati. Na presi fu dati, den ben e kibri den skapu nanga den futuboi fu Nabal. (Leisi 1 Samuel 25:15, 16.) Furu ogri ben kan miti skapu nanga den skapuman. Ogri meti ben lai, èn a kontren disi ben de so krosibei fu a lanki na a zuidsei fu a kondre, taki fufuruman fu tra kondre ben gwenti kon drape fu fufuru. *

11, 12. (a) Fa David sori lespeki di a seni wan boskopu gi Nabal? (b) Fu san ede a fasi fa Nabal tyari ensrefi no ben bun?

11 A ben musu fu hebi gi David fu feni nyanyan gi ala den man fu en na ini a sabana. Sobun, wan dei a seni tin boskopuman go na Nabal fu aksi yepi. David suku wan bun momenti. A ben de na a ten te den skapuman ben e koti den wiwiri fu den skapu. Na a ten dati, sma ben e meki prisiri èn den ben e prati sani nanga makandra. David luku bun tu san a taki. A taki nanga switifasi èn nanga lespeki. A kari ensrefi „yu boi David”, kande fu sori taki a ben abi lespeki gi Nabal di ben owru moro en. San Nabal du?​—1 Sam. 25:5-8.

12 A kisi bigi atibron! „A rigeri nanga den.” Na dati a yonguman di ben kari na a bigin fruteri Abigayil. Nabal di ben gridi, bigin kragi nanga tranga sten fu di a no ben wani gi David en diridiri brede, en watra, èn den meti di a ben srakti. A spotu David taki a ben de wan soso sma èn a agersi en nanga wan futuboi di ben lowe. A kan taki Nabal ben abi a srefi denki leki Saul, di ben e teige David. Nowan fu den tu man dati ben e denki leki Yehovah. Gado ben lobi David èn a no ben e si en leki wan trangayesi srafu, ma leki a man di ben o tron kownu fu Israel.​—1 Sam. 25:10, 11, 14.

13. (a) San David taki di Nabal kosi en? (b) San Yakobus 1:20 e taki fu a sani di David ben wani du?

 13 Di den boskopuman fruteri David san Nabal ben taki, dan a kisi atibron. A taki: „Un alamala, tai un feti-owru na un seibere!” A sreka ensrefi fu feti èn makandra nanga 400 fu den man fu en a teki pasi fu go kiri ibri mansma na ini na oso fu Nabal (1 Sam. 25:12, 13, 21, 22). Wi kan frustan taki David ben atibron, ma a no ben bun taki a ben wani kiri sma. Bijbel e taki: „Na atibron fu libisma, e meki den du sani di Gado no feni bun” (Yak. 1:20). Ma fa Abigayil ben o man kibri a famiri fu en?

„Blesi fu yu, fu di yu na wan uma di de nanga krin frustan”

14. (a) Di Nabal du wan bigi ogri, dan san Abigayil du fu meki sani bun baka? (b) Sortu bun sani wi e leri te wi e luku fa Abigayil ben de heri tra fasi leki Nabal?

14 Fu taki en leti, wi si kaba taki na Abigayil fosi du wan sani fu meki sani bun baka. Tra fasi leki en masra Nabal, a ben de klariklari fu arki. A yonguman di ben tyari a boskopu gi Abigayil ben taki disi fu Nabal: „Nabal na wan wisiwasi man èn nowan sma man taki nanga en” (1 Sam. 25:17). A sari fu si taki na fu di Nabal ben e denki tumusi furu fu ensrefi, meki a no ben wani arki. Srefi na ini a ten disi furu sma de so. Ma a yonguman ben sabi taki Abigayil ben de tra fasi, èn seiker na fu dati ede a go na en nanga a problema disi.

Tra fasi leki Nabal, Abigayil ben de klariklari fu arki

15, 16. (a) Fa Abigayil sori taki a ben de leki a bun wefi na ini a buku Odo? (b) Fu san ede a sani di Abigayil du no ben wani taki dati a ben opo ensrefi teige en masra?

15 Abigayil no draidrai. Bijbel e taki: „Wantewante Abigayil bigin hasti ensrefi.” A tori disi e sori fo leisi taki Abigayil no draidrai. A sreka wan bigi presenti gi David nanga den man fu en. A poti brede, win, skapu, losi siri, korentikuku, nanga figakuku. A de krin taki Abigayil ben  sabi heri bun san a ben abi na oso èn taki neleki na uma na ini a buku Odo, a ben e drai na oso fu en bun (Odo 31:10-31). A seni den nyanyan-sani go na fesi nanga wan tu fu den futuboi fu en, ne a hari go na den baka en wawan. Bijbel e taki: „Ma a no taigi en masra Nabal noti.”​—1 Sam. 25:18, 19.

16 A sani disi wani taki dati Abigayil ben e opo ensrefi teige en masra di ben abi a reti fu de edeman fu na osofamiri? Nôno. Hori na prakseri taki Nabal ben du wan ogri nanga wan salfu futuboi fu Yehovah, èn a sani dati ben kan meki taki furu sma fu Nabal en osofamiri lasi den libi fu soso. Efu Abigayil no ben o du wan sani, dan kande a ben o tyari frantwortu tu gi a sondu fu en masra. Na ini a tori disi, a ben musu gi yesi na Gado na presi fu en masra.

17, 18. Nanga sortu denki Abigayil go na David, èn san a taki? Fu san ede David arki en?

17 A no teki langa fosi Abigayil miti David nanga den man fu en. Wantewante a saka komoto fu en buriki èn a boigi go te na gron na fesi David (1 Sam. 25:20, 23). Ne a fruteri en ala sani finifini, èn a begi en tangitangi fu sori sari-ati gi en masra èn gi na osofamiri fu en. San meki taki David arki en?

’Mi e begi yu, gi mi na okasi fu taki wan sani’

18 Abigayil teki a frantwortu fu a problema na en tapu èn a aksi David fu gi en pardon. A taigi en taki a ben sabi taki en masra ben don neleki fa a nen fu en ben e sori. Kande a ben wani taigi David taki a no ben musu lagi ensrefi fu strafu so wan man. Den sani di a taki sori taki a ben e frutrow David, a sma di ben e teki presi gi Yehovah. A ben frustan tu taki David ben e feti „den feti fu Yehovah”. Abigayil sori David tu taki a ben sabi taki Yehovah ben pramisi en taki a ben o tron kownu. A ben taki: „Yehovah . . . o poti yu leki tiriman fu Israel.” Boiti dati, a begi David fu no du nowan sani di ben kan meki a kisi brudu-paiman, noso wan sani di bakaten ben kan meki a „naki futu”. A de krin taki a no ben wani taki David kisi konsensi fonfon. (Leisi 1 Samuel 25:24-31.) Den moi wortu disi e naki wi ati trutru!

19. San David du di Abigayil taki nanga en, èn fu san ede a prèise en?

 19 San David du? A teki den sani di Abigayil ben tyari kon èn a taki: „Blesi fu Yehovah, a Gado fu Israel, di seni yu fu kon miti mi tide! Blesi fu yu, fu di yu na wan uma di de nanga krin frustan. Na yu meki taki mi no poti misrefi na brudu-paiman.” David prèise en fu di a ben teki deki-ati fu kon na en wantewante, èn a taigi en taki a ben tapu en fu du wan sani di ben o meki a kisi brudu-paiman. A taigi Abigayil: „Meki ala sani waka bun nanga yu te yu drai go baka na oso.” A taki moro fara na wan saka fasi: „Mi yere san yu taki.”​—1 Sam. 25:32-35.

„Mi na yu umasrafu”

20, 21. (a) Fu san ede yu feni en wan moi sani taki Abigayil ben de klariklari fu drai go baka na en masra? (b) Fu san ede wi kan taki dati Abigayil sori deki-ati nanga koni te wi e luku o ten a go taki nanga Nabal?

20 Baka di Abigayil gowe, a ben e tan prakseri san ben pasa. A ben musu de so tu taki a ben si fa David di ben abi bun fasi èn di ben e gi yesi na Gado, ben de heri tra fasi leki a takru-ati masra fu en. Ma a no tan prakseri den sani dati. Bijbel e taki: ’Bakaten Abigayil drai go baka na Nabal.’ Iya, a drai go baka na en masra èn a ben abi a fasti bosroiti fu du ala san a man fu tan wan bun wefi gi en. A ben musu taigi en fu a presenti di a ben gi David nanga den man fu en. Nabal ben abi a reti fu sabi dati. A ben musu taigi en tu gi sortu ogri a ben tapu pasi, bika a ben o de wan bigi syen efu a ben o yere en fu wan tra sma. Ma a no ben kan taigi en nownowde. Nabal ben e hori fesa leki wan kownu èn a ben drungu srefisrefi.​—1 Sam. 25:36.

Abigayil no ben frede fu taigi Nabal san a ben du fu kibri en libi

21 Abigayil sori ete wan leisi taki a ben abi deki-ati nanga koni. A wakti teleki a tra mamanten te Nabal no ben drungu moro. A ben o man frustan en moro bun, ma kande a ben o kisi moro bigi atibron. Toku a go na Nabal èn a fruteri en a heri tori. A no de fu taki dati a ben e fruwakti taki Nabal ben o bigin rigeri èn taki a ben o du en  wan ogri kande. Ma Nabal ben e tan sidon nomo èn a no buweigi srefi.​—1 Sam. 25:37.

22. San pasa nanga Nabal, èn san o pasa nanga ala den sma di e libi takru nanga den osofamiri?

22 San ben e du Nabal? „A kisi krampu na en ati èn a no ben man du noti moro. A ben kon de leki wan ston.” Kande na tapu en ati ben tapu. Ma Nabal dede sowan tin dei baka dati, èn a no siki a ben siki. Bijbel e fruteri: „Yehovah meki Nabal dede” (1 Sam. 25:38). Gado ben abi leti fu kiri a man dati, èn na so a takru trowlibi fu Abigayil kon na wan kaba te fu kaba. A tru taki na ini a ten disi Yehovah no e kiri sma na wan wondru fasi fu lusu problema gi wi. Toku a tori disi e memre wi krin taki Yehovah sabi te wan sma e libi takru nanga en osofamiri. A no  de fu taki dati Yehovah o du san reti na wan ten di a feni bun.​—Leisi Lukas 8:17.

23. Sortu tra blesi Abigayil kisi èn fa a sori taki a sani dati no kenki en?

23 Boiti taki Gado ben tyari wan kaba kon na a takru trowlibi fu en, Abigayil ben o kisi wan tra blesi tu. Di David kon yere taki Nabal dede, a seni den futuboi fu en fu go aksi Abigayil efu a ben wani trow nanga en. Abigayil piki: „Mi masra, mi na yu umasrafu. Na mi musu wasi den futu fu den futuboi fu yu.” A de krin taki a no ben kisi bigifasi fu di a ben sabi taki a ben o tron a wefi fu David. A taigi David taki a ben o tron srafu srefi fu den futuboi fu en! Ne wi e leisi ete wan tron taki a ben hasti ensrefi èn disi leisi a ben du dati fu go miti David.​—1 Sam. 25:39-42.

24. Sortu problema miti Abigayil na ini a nyun libi fu en, ma fa en masra nanga en Gado ben e si en?

24 Disi no wani taki dati a libi fu en ben o de sondro problema. A libi fu Abigayil nanga David no ben o makriki ala ten. David ben trow kaba nanga Ahinowam, èn aladi Gado ben gi pasi taki wan man ben abi moro leki wán wefi, toku a situwâsi dati ben muilek srefisrefi gi reti-ati uma fu a ten dati. Boiti dati, David no ben de kownu ete. Tesi nanga problema ben o miti en fosi a tron kownu. Ma Abigayil tan horibaka gi David, èn te fu kaba a kisi wan manpikin. A kon si taki a ben abi wan masra di ben e warderi en èn di ben e sorgu taki ogri no ben e miti en. Wan leisi, a frulusu Abigayil srefi fu wan tu man di ben grabu en tyari gowe! (1 Sam. 30:1-19) Na so David teki na eksempre fu Yehovah Gado di lobi umasma di koni, di abi deki-ati, èn di e gi yesi na en.

^ paragraaf 9 Disi a no a Karmel-bergi na a noordsei, pe a profeiti Elia ben hori wan strei nanga den profeiti fu Bâal bakaten. (Luku kapitel 10.) A Karmel disi ben de wan foto na a lanki fu a sabana di ben de na a zuidsei.

^ paragraaf 10 Kande David ben denki taki te a ben e kibri den gronman nanga den skapu fu den, dan a ben e du wan sani di Yehovah feni bun. Na ini a ten dati, Yehovah ben wani taki den bakapikin fu Abraham, Isak, nanga Yakob ben musu tan na ini a kondre dati. Fu taki en leti, te David ben e kibri a kontren gi fufuruman fu tra kondre, dan a ben e du wan santa wroko.