Go na content

Go na a tra menu

Go na table of contents

Yehovah Kotoigi

Sranantongo

Teki na eksempre fu sma di ben abi bribi

 KAPITEL ERFU

A tan luku, èn a wakti

A tan luku, èn a wakti

1, 2. Sortu muilek sani Elia ben musu du, èn fa en nanga Akab ben e difrenti fu makandra?

ELIA ben e angri fu de en wawan so taki a ben kan begi en Tata na hemel. Ma syatu na fesi, den ipi-ipi sma di ben de na en lontu, ben si fa a tru profeiti disi ben begi fu meki faya komoto fu hemel. A no de fu taki dati furu fu den sma disi ben de fayafaya fu miti en, so taki a ben kan du wan bun gi den. Elia ben o kren go na tapusei fu Karmel-bergi fu begi Yehovah Gado. Ma fosi Elia ben kan du dati, a ben musu du wan sani di no ben o switi gi en. A ben musu go taki nanga Kownu Akab.

2 Elia ben de heri tra fasi leki Akab. Akab di ben e weri kefalek diri kownu krosi, ben gridi. A ben fadon komoto na bribi èn sma ben kan abi krakti na en tapu makriki. Ma Elia ben e weri profeiti krosi di no ben diri èn di no ben abi wan lo pranpran. A kan taki a krosi disi ben meki fu metibuba noso fu wiwiri fu kameili noso krabita. Elia ben de wan deki-ati man di ben e tyari ensrefi na wan reti fasi, èn a ben abi bribi. Na a kaba fu a dei di a wondru dati pasa, a ben de krin fu si fa den tu man disi ben e difrenti fu makandra.

3, 4. (a) Fu san ede a no ben de wan bun dei gi Akab nanga den tra Bâal anbegiman? (b) Na sortu aksi wi o poti prakseri?

3 A dei dati no ben de wan bun dei kwetikweti gi Akab nanga den tra anbegiman fu Bâal. A falsi anbegi di Kownu Akab nanga en wefi, Umakownu Iseibel, ben horibaka gi na ini a tin-lo kownukondre Israel, ben kisi bigi syen. A ben kon na krin taki Bâal ben de wan falsi gado. A gado dati di no ben de wan libilibi gado, no ben man leti wan pikin faya srefi, aladi den profeiti fu en ben begi en fayafaya, den ben dansi gi en, èn den ben kotikoti den skin teleki brudu lon.  Bâal no ben man kibri den 450 profeiti fu en di ben frudini en fu dede. Ma ete wan sani de di a falsi gado disi no ben man du, èn a sani dati ben o kon na krin now. Dri yari langa den profeiti fu Bâal begi a gado fu den fu tyari wan kaba kon na a dreiten di ben e meki sma pina na ini a kondre. Ma soleki fa a sori, dan Bâal no ben man yepi den. Heri esi, Yehovah srefi ben o sori taki en na a tru Gado, fu di a ben o tyari wan kaba kon na a dreiten.​​—1 Kow. 16:30–17:1; 18:1-40.

4 Ma o ten Yehovah ben o du dati? San Elia ben o du fosi a ten dati doro? San wi kan leri fu a man disi di ben e gi yesi na Gado? Meki wi go luku a tori fu en.​—Leisi 1 Kownu 18:41-46.

A ben e begi Gado doronomo

5. San Elia taigi Akab fu du? Yu denki taki Akab ben teki leri fu den sani di ben pasa a dei dati?

5 Elia go na Akab èn a taigi en: „Kren go na tapu a bergi, dan yu nyan èn dringi wan sani, bika mi e yere wan hebi  alen e kon.” Yu denki taki na ogri-ati kownu disi ben leri wan sani fu den sani di pasa a dei dati? A tori no e sori dati, ma a no e taki dati a ben abi berow, noso taki a ben begi a profeiti fu aksi Yehovah pardon gi en. A wan-enkri sani di Akab du, na taki a „kren go na tapu a bergi èn a nyan èn dringi” (1 Kow. 18:41, 42). Ma san Elia ben du?

6, 7. Gi sortu sani Elia begi, èn fu san ede a du dati?

6 „Dan Elia kren go te na a ede fu Karmel-bergi. Di a doro drape, a saka sidon na tapu en futu èn a poti en ede na mindri en kindi.” Di Akab go nyan, dan Elia kisi na okasi fu go begi en hemel Tata. Luku fa Elia ben e begi. A kindi na gron èn a saka en ede go te na en kindi. Fu san ede a ben du dati? We, a no muilek fu sabi dati. Bijbel e fruteri wi na Yakobus 5:18 taki Elia begi Gado fu meki a dreiten kon na wan kaba. Kande na dati a ben e du na tapu Karmel-bergi.

Den begi fu Elia ben e sori taki a ben e angri fu si taki a wani fu Gado pasa

7 Wan pisi ten na fesi, Yehovah ben taki: „Mi o meki alen fadon baka” (1 Kow. 18:1). Dati meki Elia begi fu meki a wani fu Yehovah pasa, neleki fa Yesus ben leri den bakaman fu en fu begi pikinmoro wán dusun yari bakaten.​​—Mat. 6:9, 10.

8. San na eksempre fu Elia e leri wi te a abi fu du nanga begi?

8 Na eksempre fu Elia e leri wi furu te a abi fu du nanga begi. A moro prenspari sani di Elia ben abi na prakseri, na taki a wani fu Gado ben musu pasa. Te wi e begi, dan a bun fu prakseri a tori disi: „Awansi san wi e aksi [Gado], a e yere wi, solanga a e kruderi nanga a wani fu en” (1 Yoh. 5:14). Sobun, efu wi wani taki Gado arki den begi fu wi, dan wi musu sabi san na a wani fu en. Dati meki wi musu studeri Bijbel doronomo. A no de fu taki dati Elia ben wani taki a dreiten musu kon na wan kaba, fu di a ben e si fa a pipel fu en ben e pina. A kan taki en ati ben furu nanga tangi, baka di a si a wondru di Yehovah ben du a dei dati. Te wi e begi, dan wi musu taki Gado tangi tu èn wi musu sori tu taki wi e broko wi ede nanga trawan.​​—Leisi 2 Korentesma 1:11; Filipisma 4:6.

 A ben frutrow tapu Gado èn a ben de na ai

9. San Elia ben taigi en futuboi fu du, èn na sortu tu sani wi o poti prakseri?

9 Elia ben sabi taki Yehovah ben o tyari wan kaba kon na a dreiten, ma a no ben sabi o ten Yehovah ben o du dati. We, dan san a profeiti du fosi a ten dati doro? Luku san a tori e taki: „Elia taigi en futuboi: ’Kren go pikinso moro na tapusei. Luku go na a sei fu a se.’ Sobun, a futuboi kren go na tapusei èn a luku go na a sei fu a se. Dan a taki: ’Mi no e si noti.’ Elia taigi en: ’Go luku baka.’ Na so a futuboi kren go na tapusei seibi tron” (1 Kow. 18:43). Na eksempre fu Elia e leri wi tu prenspari sani. A fosi sani di wi kan leri, na taki a profeiti ben de seiker taki Gado ben o du wan sani. A di fu tu sani, na taki Elia ben de na ai.

Elia ben e suku buweisi di ben e sori taki heri esi Yehovah ben o meki alen fadon

10, 11. (a) Fa Elia sori taki a ben bribi den pramisi fu Yehovah? (b) Fu san ede wi kan abi a srefi bribi dati?

10 Elia ben sabi taki Yehovah ben o du san a ben pramisi, èn dati meki a ben e suku buweisi di ben e sori taki heri esi Yehovah ben o meki alen fadon. A seni en futuboi go na wan hei presi fu luku efu alen ben o fadon. Di a futuboi drai kon baka, a taigi Elia: „Mi no e si noti.” A loktu ben krin, èn soleki fa a sori, nowan wolku no ben de fu si. Ma a tori disi e sori wi wan aparti sani tu. Yu sabi san na dati? We, kande yu e memre ete taki Elia ben taigi Kownu Akab: „Mi e yere wan hebi alen e kon.” Fa a profeiti ben kan taki so wan sani, efu a no ben e si nowan wolku di ben e sori taki alen ben o kon?

11 Elia ben sabi taki Yehovah pramisi fu meki alen fadon. Leki profeiti di ben e teki presi gi Yehovah, a ben de seiker taki a Gado fu en o du san A taki. Elia ben e frutrow so furu tapu a sani di Yehovah taki, dati a ben de leki a ben e yere a hebi alen kaba. Kande dati e meki wi prakseri a sani disi di Bijbel e taki fu Moses: „A horidoro neleki a ben e si a sma di wi no man si nanga wi ai.” Yu e si Gado leki wan trutru sma tu? Wi abi furu reide fu si en na a fasi dati èn fu bribi na ini den pramisi fu en.​​—Hebr. 11:1, 27.

12. Fa Elia sori taki a ben de na ai, èn san a du di a futuboi fu en taigi en taki a ben e si wán pikin wolku nomo?

12 Meki wi go luku wan tra sani. Poti prakseri na a fasi fa Elia sori taki a ben de na ai. A seni a futuboi fu en fu go  luku efu wan sani ben e pasa. A no du dati wán noso tu tron nomo, ma a seni en seibi tron! Wi kan frustan taki a futuboi ben weri fu du a srefi sani disi someni leisi, ma Elia ben e tan wakti fu si a marki èn a no ben kon weri. Te fu kaba, di a futuboi drai kon baka fu a di fu seibi tron, a taigi Elia: „Luku! Mi e si wan pikin wolku di bigi leki na anu fu wan man, e opo komoto na ini a se.” Yu man si kaba fa a futuboi e hori en anu na loktu fu sori o pikin a wolku de di a ben si e wai kon fu a sei fu a Bigi Se? Kande a futuboi ben e si a pikin wolku dati leki wan lawlaw sani. Ma gi Elia a wolku dati ben prenspari srefisrefi. Dati meki a taigi a futuboi fu en fu du a sani disi wantewante: „Go taigi Akab: ’Sreka den asiwagi! Saka komoto fu a bergi esi-esi, so taki na alen no wasi yu gowe!’”​​—1 Kow. 18:44.

13, 14. (a) Fa wi kan de na ai neleki Elia? (b) Sortu reide wi abi fu de fayafaya?

13 Disi na ete wan fasi fa Elia gi wi wan tumusi moi eksempre. Wi e libi tu na ini wan ten pe heri esi Gado o du wan sani fu meki a wani fu en kon tru. Na a ten dati Elia ben e wakti a kaba fu a dreiten. Anbegiman fu Gado na ini a ten disi e wakti a kaba fu a grontapu disi di pori (1 Yoh. 2:17). Neleki Elia, wi musu tan na ai teleki Yehovah Gado du san a pramisi. Gado en eigi Manpikin, Yesus, ben gi den bakaman fu en a rai disi: „Tan na ai, bika unu no sabi sortu dei un Masra o kon” (Mat. 24:42). Ma san Yesus ben wani taigi wi nanga dati? Yu denki taki na sori a ben wani sori wi taki den bakaman fu en no ben o sabi kwetikweti o ten a kaba ben o kon? Nôno, bika a ben e fruteri sma furu sani di ben abi fu du nanga a fasi fa a situwâsi na grontapu ben o de na ini a ten fosi a kaba kon. Wi alamala kan kon sabi ala den difrenti sani di abi fu du nanga a marki fu „a kaba fu a grontapu disi”.​—Leisi Mateyus 24:3-7.

Wán pikin wolku nomo ben nofo kaba fu meki Elia bribi taki Yehovah ben o du wan sani. A marki di abi fu du nanga den lasti dei e gi wi moro reide fu de fayafaya

14 Ibri pisi fu a marki disi na krinkrin buweisi di e overtoigi wi taki a kaba de krosibei. Den sani disi o gi wi deki-ati  fu du a wroko fu Yehovah nanga moro faya? Wán pikin wolku nomo di ben wai kon ben nofo kaba fu meki Elia bribi taki Yehovah ben o du wan sani. Yu denki taki a reti-ati profeiti ben lasi-ati?

Yehovah e frulusu sma èn a e blesi den

15, 16. Sortu sani pasa heri esi, èn san Elia ben howpu taki Akab ben o du?

15 A tori e taki: „Baka wan pisi ten dungru wolku kon de na hemel èn a loktu kon blaka. Ne winti bigin wai èn wan hebi alen fadon. Akab rèi, teleki a doro na Yisreyel” (1 Kow. 18:45). Wan lo sani bigin pasa esi-esi baka makandra. Na a ten di a futuboi fu Elia gi Akab a boskopu fu a profeiti, a pikin wolku ben tron wan bigi dungru wolku di ben meki taki a heri loktu kon blaka. Wan tranga winti ben e wai. Te fu kaba, baka dri nanga afu yari, alen ben e fadon baka na tapu a gron fu Israel. A gron ben drei so te, taki a soigi na alen watra wantewante. Di alen bigin fadon bun tranga, dan Kison-liba kon furu nanga watra, èn a no de fu taki dati na alen wasi a brudu fu den Bâal profeiti gowe. Na wan agersi fasi, den tranga-ede Israelsma ben kisi na okasi tu fu wasi a fisti Bâal anbegi puru na ini a kondre, so taki Yehovah ben kan gi den pardon.

„Wan hebi alen fadon”

16 A no de fu taki dati na dati Elia ben e howpu! San Akab ben o du? A ben o abi berow èn drai baka gi a falsi Bâal anbegi? Den sani di pasa na a dei dati ben e sori krin fu san ede a ben o bun gi en fu kenki a fasi fa a ben e tyari ensrefi. A no de fu taki dati wi no kan sabi fa Akab ben e prakseri na a momenti dati. A tori e sori wi nomo taki a kownu „rèi, teleki a doro na Yisreyel”. Ma san a ben leri fu den sani disi? A ben o abi a fasti bosroiti fu kenki en libi? Den sani di pasa bakaten e sori taki dati no ben pasa. Na a dei dati, ete wan tu sani ben o pasa nanga Akab èn nanga Elia.

17, 18. (a) San pasa nanga Elia di a ben de na pasi fu go na Yisreyel? (b) Fu san ede a ben de wan aparti sani taki Elia lon fu Karmel go na Yisreyel? (Luku sosrefi den sani di skrifi na ondrosei fu bladzijde 113.)

17 A profeiti fu Yehovah teki a srefi pasi di Akab ben teki. A pasi ben langa, alen ben e fadon, èn a ben dungru. Ne wan tumusi aparti sani pasa.

18 „Elia tai en krosi na en mindribere èn a bigin lon go  na Yisreyel. Fu di Yehovah ben de nanga en, meki a ben kan lon so tranga, taki a doro drape fosi Akab” (1 Kow. 18:46). A de krin taki „Yehovah ben de nanga” Elia èn A ben meki wan wondru pasa. Fu doro Yisreyel, Elia ben musu waka sowan 30 kilometer, èn a no ben yongu moro. * Prakseri fa a profeiti tai den langa krosi fu en na en mindribere so taki a ben man lon moro bun. Ne a bigin lon a tokotoko pasi. Elia lon so tranga, taki a go miti na asiwagi fu a kownu, teleki a pasa en srefi!

19. (a) Te wi e luku a krakti di Gado ben gi Elia, dan sortu profeititori wi e prakseri? (b) Di Elia ben e lon go na Yisreyel, dan san a ben sabi seiker?

19 A no de fu taki dati disi ben de wan bigi blesi gi Elia! A ben kisi bun furu krakti èn a ben man du wan sani di kande noiti a ben man du di a ben yongu. A sani disi ben musu fu de wan kefalek sani gi Elia. A kan taki a ben firi moro tranga srefi leki di a ben yongu. Kande a tori disi e meki wi prakseri den profeititori di e gi wi a dyaranti taki ala reti-ati sma o abi wan bun gosontu èn taki den o firi krakti baka te den de na ini Paradijs na grontapu (Leisi Yesaya 35:6; Luk. 23:43). Di Elia ben e lon na tapu a nati pasi, a ben sabi seiker taki en Tata, a wan-enkri tru Gado, Yehovah, ben breiti nanga en trutru!

20. San wi musu du fu man kisi den blesi fu Yehovah?

20 Yehovah e angri fu blesi wi. Meki wi du muiti fu kisi blesi fu en. A muiti di wi e meki no sa de fu soso. Neleki Elia, wi musu tan na ai, èn wi musu poti bun prakseri na ala den krin buweisi di e sori taki heri esi Yehovah o tyari wan kenki kon na a takru situwâsi fu den lasti dei disi. Neleki Elia, wi abi bun reide fu poti ala wi frutrow na ini den pramisi fu Yehovah, „a Gado di no e fruteri lei”.​—Ps. 31:5.

^ paragraaf 18 Syatu baka dati, Yehovah taigi Elia fu leri Elisa fa fu du a wroko fu wan profeiti. Bakaten, sma ben kon sabi Elisa leki a sma di „ben e kanti watra gi Elia fu wasi en anu” (2 Kow. 3:11). Soleki fa a sori, Elisa ben de leki wan futuboi gi Elia, fu di a ben e du ala san a man fu yepi Elia di ben owru kaba.