Go na content

Go na a tra menu

Yehovah Kotoigi

Sranantongo

Yu wani sabi a piki tapu den aksi disi?

Yu wani sabi a piki tapu den aksi disi?

A PIKI tapu sortu aksi? Wan tu fu den moro prenspari aksi na ini a libi. Kande yu aksi yusrefi den sani disi:

  • Gado e broko en ede nanga wi trutru?

  • Wan ten o kon pe sma no o feti noso pina moro?

  • San e pasa nanga wi te wi dede?

  • Howpu de gi den dedewan?

  • Fa mi musu begi efu mi wani taki Gado arki mi?

  • Fa mi kan abi wan koloku libi?

Pe yu ben o suku piki tapu den aksi disi? Na den presi pe sma e leni buku noso na ini bukuwenkri yu kan feni ala sortu buku pe sma e taki dati den feni den piki tapu den aksi disi. Ma nofo tron den piki na ini den buku disi no de a srefi. Son leisi yu kan gebroiki den rai na ini den buku, ma soso fu wan syatu pisi ten nomo. Bakaten yu no man gebroiki den moro, fu di sma e kenki den rai noso den e gi tra rai na presi fu den wan di ben de kaba.

Ma wan buku de pe yu kan feni piki di de fu frutrow. A de wan buku di e fruteri tru tori. Di Yesus Krestes begi Gado, a taki: „Yu wortu e taki san tru” (Yohanes 17:17). Na ini a ten disi wi sabi taki a „wortu” dati, na Bijbel. Na tapu den tra bladzijde yu kan leisi sortu piki Bijbel e gi tapu den aksi di wi kari didyonsro. Den piki krin èn den tru.

 Gado e broko en ede nanga wi trutru?

FU SAN EDE SMA E AKSI A SANI DISI? Wi e libi na ini wan grontapu di lai ogridu nanga kruktudu. Furu kerki e leri sma taki na Gado wani taki wi e pina.

SAN BIJBEL E LERI? Gado no e du ogri noiti. Yob 34:10 e taki: „A no tru kwetikweti taki Gado e du ogri! Noiti na Almaktiwan e du kruktu sani!” A sani di Gado abi na prakseri gi libisma e sori taki a lobi den trutru. Dati meki Yesus leri wi fu begi: „Wi Tata na hemel, meki . . . yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:9, 10). Fu di Gado e broko en ede nanga wi trutru, meki a du furu muiti fu meki sani pasa trutru soleki fa a abi na prakseri.—Yohanes 3:16.

Luku sosrefi Genesis 1:26-28; Yakobus 1:13; nanga 1 Petrus 5:6, 7.

Wan ten o kon pe sma no o feti noso pina moro?

FU SAN EDE SMA E AKSI A SANI DISI? Te now ete someni sma dede na ini feti taki yu no man teri den srefi. Neleki ala tra libisma, wi e pina tu na wan noso tra fasi.

SAN BIJBEL E LERI? Gado taki na fesi kaba taki wan ten o kon pe a o sorgu taki vrede de na heri grontapu. Te a hemel Kownukondre fu Gado o tiri na grontapu, dan sma „no o leri fu feti moro”. Na presi fu dati, den o „naki den feti-owru kon tron plugu èn den lansri kon tron grasinefi” (Yesaya 2:4). Gado o sorgu taki nowan kruktudu noso pina de moro. Bijbel e pramisi taki ’Gado o figi ala watra puru na sma ai èn dede no o de moro. Nowan sari, noso krei, noso pen no o de moro. Den fositen sani [soleki a kruktudu nanga a pina di sma e pina na ini a ten disi] pasa kaba.’—Openbaring 21:3, 4.

Luku sosrefi Psalm 37:10, 11; 46:9; nanga Mika 4:1-4.

San e pasa nanga wi te wi dede?

FU SAN EDE SMA E AKSI A SANI DISI? Furu kerki na heri grontapu e leri taki libisma abi wan sani na ini den skin di e libi go doro, baka te den dede. Son sma e taki dati dedesma kan du ogri nanga den wan di de na libi, noso den e taki dati Gado e bron ogrisma na ini wan faya hel fu strafu den gi den ogri di den du.

SAN BIJBEL E LERI? Te wan sma dede, noti no e tan na libi. Preikiman 9:5 e taki: „Den dedewan no sabi notinoti.” We, efu den dedewan no sabi noti, den no e firi noti, èn den no man du noti, dan den no man du ogri nanga den libiwan èn den no man yepi den tu, a no so?—Psalm 146:3, 4.

Luku sosrefi Genesis 3:19 nanga Preikiman 9:6, 10.

 Howpu de gi den dedewan?

FU SAN EDE SMA E AKSI A SANI DISI? Ala sma wani libi èn wi alamala wani abi wan bun libi makandra nanga den lobiwan fu wi. Dati meki wi alamala e angri fu si den lobiwan fu wi di dede.

SAN BIJBEL E LERI? Furu sma di dede o kisi wan opobaka. Yesus pramisi taki „ala den sma di de na ini den grebi . . . o komopo drape” (Yohanes 5:28, 29). Den sma di o kisi wan opobaka leki libisma, abi na okasi fu libi na ini wan paradijs na grontapu, bika na dati Gado ben abi na prakseri biginbigin (Lukas 23:43). Ma Gado pramisi tu taki den sma di e gi yesi na en, o de gosontu dorodoro èn den o libi fu têgo. Bijbel e taki: „Na den reti-ati sma o kisi grontapu èn fu têgo den o tan libi drape.”—Psalm 37:29.

Luku sosrefi Yob 14:14, 15; Lukas 7:11-17; nanga Tori fu den apostel 24:15.

Fa mi musu begi efu mi wani taki Gado arki mi?

FU SAN EDE SMA E AKSI A SANI DISI? Na ini pikinmoro ala kerki, sma e begi. Ma furu sma feni taki Gado no e piki den begi fu den.

SAN BIJBEL E LERI? Yesus leri wi taki wi no musu taki wan tu spesrutu wortu ibri tron baka te wi e begi. A taki: „Te yu e begi, no taki den srefi sani ibri leisi baka” (Mateyus 6:7). Efu wi wani taki Gado arki den begi fu wi, dan wi musu begi na a fasi di a feni bun. Ma fu man du dati, wi musu kon sabi san Gado wani. Te wi sabi san Gado wani, dan wi kan taki fu dati te wi e begi. Na ini 1 Yohanes 5:14 wi e leisi: „Awansi san wi e aksi en, a e yere wi, solanga a e akruderi nanga a wani fu [Gado].”

Luku sosrefi Psalm 65:2; Yohanes 14:6, 14; nanga 1 Yohanes 3:22.

Fa mi kan abi wan koloku libi?

FU SAN EDE SMA E AKSI A SANI DISI? Furu sma feni taki den o de koloku te den abi furu moni, te den abi biginen, noso te den moi srefisrefi. Dati meki den e du ala muiti fu abi den sani disi. Ma te den abi den sani disi, dan den e si taki toku den no de koloku.

SAN BIJBEL E LERI? Yesus ben fruteri fa wan sma kan de koloku. A ben taki: „Koloku fu den sma di sabi taki den abi Gado fanowdu” (Mateyus 5:3). Wi kan feni trutru koloku, soso te wi e du muiti fu tapu a moro prenspari nowtu fu wi, namku na angri di wi e angri fu kon sabi sani fu Gado èn fu kon sabi san a wani fu wi. Den sani dati skrifi na ini Bijbel. Te wi sabi den sani dati, dan wi o man si san prenspari trutru èn san no prenspari. Te wi e suku rai na ini Bijbel fu man teki bun bosroiti èn te wi e du san Bijbel e taki, dan wi o abi wan moro bun libi.—Lukas 11:28.

Luku sosrefi Odo 3:5, 6, 13-18 nanga 1 Timoteyus 6:9, 10.

 Disi na wan tu syatu piki di Bijbel e gi tapu siksi aksi nomo. Yu wani kon sabi moro? A no de fu taki dati yu o wani sabi moro efu yu na wan sma ’di sabi taki a de na nowtu na yeye fasi’. Kande yu abi tra aksi, soleki: ’Efu Gado e broko en ede nanga wi trutru, dan fu san ede a gi pasi taki someni ogri nanga pina miti libisma na ini ala den hondrohondro yari di pasa? Fa mi kan sorgu taki sani e waka moro bun gi mi osofamiri?’ Bijbel e gi krin piki tapu den aksi disi èn tapu furu tra aksi sosrefi. Yusrefi o si taki den rai fu Bijbel na bun rai.

Ma furu sma no wani suku rai na ini Bijbel. Den feni taki Bijbel na wan bun deki buku di sma no e frustan ala ten. Ma yu wani taki wan sma yepi yu fu feni den piki na ini Bijbel? Yehovah Kotoigi abi tu fasi fa den kan yepi yu.

Den abi wan buku di nen San Bijbel kan leri wi? A skrifi na so wan fasi taki den sma di no abi furu ten kan ondrosuku Bijbel fu feni krin piki tapu prenspari aksi. Boiti dati, yu kan kisi bijbelstudie tu sondro fu pai. Efu wan Yehovah Kotoigi e libi na ini yu birti èn a sabi fa fu studeri Bijbel nanga sma, dan yu kan aksi en fu kon na yu ibri wiki fu wan syatu pisi ten nomo, so taki unu kan taki fu sani di abi fu du nanga Bijbel. Yu no abi fu pai en èn yu srefi kan taki efu a musu kon na yu oso, noso na wan tra presi di yu wani. Milyunmilyun sma na heri grontapu kisi wini di den studeri Bijbel na so wan fasi. Te fu kaba furu fu den kon si taki den tori na ini Bijbel tru.

Wan moro bigi gudu no de. Te wi kon sabi den tru tori di de na ini Bijbel, dan kruktubribi no o abi krakti na wi tapu, wi no o bruya, èn wi no o frede doronomo taki ogri o miti wi. Wi o abi howpu, wi o abi wan moro bun denki fu a libi, èn wi o abi prisiri. Yesus taki: „Unu o sabi san tru èn dati o meki unu kon fri.”—Yohanes 8:32.