Den sma fu Ninefei, wan foto fu Asiria, ben ogri. Yehovah taigi en profeiti Yona fu go warskow den sma fu Ninefei taki den musu kenki den libi. Ma Yona lowe go na a tra sei. A teki wan boto di ben e go na Tarsis.

Di a boto ben de na se, wan tranga winti bigin wai èn bigi skwala ben naki a boto. Den botoman kon frede. Den begi den gado fu den èn den aksi: ’Fu san ede a sani disi e pasa?’ Te fu kaba Yona taigi den: ’Na mi meki a sani disi pasa. Mi lowe gowe fu di mi no ben wani du san Yehovah taigi mi fu du. Trowe mi go na ini a se, dan a se o kon tiri baka.’ Den botoman no ben wani trowe Yona go na ini a se, ma a ben de nomonomo taki den du dati. Di den trowe en go na ini a se, a se kon tiri.

Yona ben denki taki a ben o dede. Di a ben e sungu go moro dipi a begi Yehovah. Dan Yehovah seni wan bigi fisi fu swari Yona, ma Yona no dede. Di a ben de na ini a bere fu a fisi, a begi Yehovah: ’Mi e pramisi taki mi o du yu wani ala ten.’ Yehovah hori Yona na libi dri dei langa na ini a bere fu a fisi. Baka dati a fisi spiti en puru na tapu drei gron.

 Yehovah frulusu Yona, ma disi wani taki dati a no ben abi fu go moro na Ninefei? Nôno. Yehovah taigi Yona baka fu go drape. Disi leisi Yona arki Yehovah. A go na Ninefei èn a taigi den ogrisma: ’Ete fotenti dei, dan Ninefei o kisi pori.’ Ne wan sani pasa di Yona no ben fruwakti. Den sma fu Ninefei arki en èn den kenki den libi. A kownu fu Ninefei taigi en pipel: ’Begi Gado èn sori berow. Kande a no o kiri wi moro.’ Di Yehovah si taki a pipel ben abi berow, a no pori Ninefei moro.

Yona ati bron di a si taki a foto no kisi pori. Prakseri a tori: Yehovah ben abi pasensi nanga Yona èn a sori sari-ati gi en. Ma Yona no ben wani sori sari-ati gi a pipel fu Ninefei. A komoto na ini a foto, dan a go sidon langa en mofo na ondro wan krabasibon. Di a bon dede, Yona ati bron. Dati meki Yehovah taigi en: ’Yu e firi moro gi a krabasibon, leki gi den sma fu Ninefei. Mi sori sari-ati gi den èn den tan na libi.’ San Yehovah ben wani leri Yona? A ben wani leri en taki den sma fu Ninefei ben prenspari moro iniwan bon.

„Yehovah . . . abi pasensi nanga unu, bika a no wani taki wan sma lasi libi. A wani taki ala sma musu kisi na okasi fu sori berow.”​—2 Petrus 3:9