Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 50

Yehovah e yepi Yosafat

Yehovah e yepi Yosafat

Yosafat, a kownu fu Yuda, broko den altari fu Bâal nanga den falsi gado na ini a kondre. A ben wani taki a pipel sabi den wet fu Yehovah. Dati meki a seni granman nanga Leifisma go na ala sei fu Yuda fu leri a pipel den wet fu Yehovah.

Den kondre lontu Yuda ben frede fu kon feti nanga a foto disi fu di den ben sabi taki Yehovah ben de nanga en pipel. Den tyari kado srefi gi Kownu Yosafat. Ma den Moabsma, den Amonsma nanga den sma di ben e libi na ini a kontren fu Seyir kon feti nanga Yuda. Yosafat ben sabi taki a ben abi a yepi fu Yehovah fanowdu. A meki ala den man, uma nanga pikin kon makandra na ini Yerusalem. Na fesi ala sma a begi: ’Yehovah, sondro yu wi no man wini. Grantangi, taigi wi san wi musu du.’

Yehovah piki a begi. A taki: ’No frede. Mi o yepi unu. Na go un musu go drape nomo. Tanapu kánkan èn luku fa Yehovah o frulusu unu.’ Fa Yehovah yepi den?

A tra mamanten Yosafat teki wan tu singiman èn a meki den waka na fesi a legre. Den waka fu Yerusalem go na wan presi di sma ben e kari Tekowa. Drape den tu legre ben o miti.

Di den singiman ben e prèise Yehovah nanga prisiri èn nanga wan tranga sten, Yehovah feti gi en pipel. A bruya den Amonsma nanga den Moabsma so taki den bigin feti nanga makandra. Te fu kaba nowan fu den tan na libi. Ma Yehovah kibri den sma fu Yuda, den srudati nanga den priester. Ala den sma fu den kondre na ini a birti yere san Yehovah du. Den ben sabi taki Yehovah e feti ete gi en pipel. Fa Yehovah e yepi en pipel? A e du dati na difrenti fasi. A no abi a yepi fu libisma fanowdu fu man du disi.

„Disi leisi unu no abi fu feti. Na go un musu go drape nomo. Tanapu kánkan èn luku fa Yehovah o frulusu unu.”​—2 Kroniki 20:17