Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 39

A fosi kownu fu Israel

A fosi kownu fu Israel

Yehovah ben gi den Israelsma krutuman fu tiri den, ma now den ben wani wan kownu. Den taigi Samuel: ’Ala den tra kondre abi den eigi kownu. Wi wani wan kownu tu.’ Samuel no ben lobi a sani di den aksi èn dati meki a begi Yehovah fu a tori. Yehovah taigi en: ’A no yu a pipel no wani moro, ma na mi den no wani leki kownu. Taigi den taki den kan abi wan kownu, ma a kownu o aksi furu fu den.’ Ma toku a pipel taki: ’Wi no e span nanga dati. Wi wani wan kownu!’

Yehovah taigi Samuel taki wan man di nen Saul o tron a fosi kownu. Di Saul go luku Samuel na Rama, Samuel kanti oli na tapu Saul ede. Na so a salfu en leki kownu.

Bakaten Samuel kari den Israelsma kon na wán fu sori den a nyun kownu fu den. Ma den no ben man feni Saul nowan sei. Yu sabi fu san ede? Fu di Saul ben kibri na mindri den bagasi. Di den feni Saul, den tyari en kon tanapu na mindri a pipel. Saul ben langa moro ala sma èn a ben de wan moi man. Samuel taki: ’Disi na a sma di Yehovah poti leki kownu.’ A pipel bari: ’Meki Kownu libi langa!’

Na a bigin, Kownu Saul ben e arki Samuel èn a ben e gi yesi na Yehovah. Ma bakaten a kenki. Fu eksempre, Saul no ben mag tyari ofrandi. Ma wan leisi di Samuel taigi Saul fu wakti en, Saul no ben man wakti moro fu di Samuel ben tan langa. Dati meki Saul bosroiti fu tyari na ofrandi. San Samuel du? A taigi en: ’Yu no ben musu trangayesi Yehovah.’ Yu denki taki Saul leri wan sani fu a fowtu di a meki?

Bakaten di Saul go feti nanga den Amalèksma, Samuel taigi en taki a musu kiri ala sma. Ma Saul no kiri Kownu Agak. Yehovah taigi Samuel: ’Saul drai baka gi mi. A no du san mi taigi en.’ Samuel ben sari srefisrefi èn a taigi Saul: ’Fu di yu no e arki Yehovah, meki a o teki wan tra kownu.’ Di Samuel drai fu waka gowe, Saul grabu a dyakti fu  Samuel èn a dyakti priti. Ne Samuel taigi Saul: ’Neleki fa a dyakti disi priti, na so Yehovah o priti a kownukondre puru na yu anu.’ Yehovah ben o gi a kownukondre na wan sma di lobi en èn di e gi yesi na en.

„A moro bun fu gi yesi leki fu tyari ofrandi.”​—1 Samuel 15:22