Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 31

Yosua nanga den Gibeonsma

Yosua nanga den Gibeonsma

Den tra foto na ini a kontren fu Kanan kon yere san pasa nanga Yerikow. Den kownu fu den kon makandra fu go feti nanga den Israelsma. Ma den Gibeonsma du wan tra sani. Den weri pritipriti krosi èn den go na Yosua. Den taigi en: ’Wi komoto na wan farawe kondre. Wi yere fu Yehovah èn wi yere ala sani di a du gi unu na ini Egepte nanga Moab. Wi e begi unu, pramisi unu taki un no o feti nanga wi, dan wi o tron un futuboi.’

Yosua bribi den èn a pramisi taki a no o feti nanga den. Dri dei baka dati, a kon yere taki den no komoto na wan farawe kondre. Den ben de fu Kanan. Yosua aksi den Gibeonsma: ’Fu san ede unu kori wi?’ Den piki en: ’Wi ben kon frede! Wi sabi taki Yehovah un Gado e feti gi unu. Grantangi, no kiri wi.’ Yosua du san a pramisi den èn a no kiri den.

Syatu baka dati, feifi kownu fu Kanan tyari a legre fu den kon na wán fu go feti nanga den Gibeonsma. Yosua nanga a legre fu  en waka a heri neti fu go yepi den Gibeonsma. A tra mamanten, den bigin feti frukufruku. Den Kanansma bruya èn den lon go na ala sei. Awinsi sortu sei den ben lon go, Yehovah ben meki bigi pisi ijs fadon na den tapu. Ne Yosua aksi Yehovah fu no meki a son saka. Ma noiti ete so wan sani ben pasa. Fu san ede Yosua aksi Yehovah fu du disi? Na fu di Yosua ben e frutrow tapu Yehovah. A dei dati a son tan skèin teleki den Israelsma wini den kownu fu Kanan nanga a legre fu den.

„Te unu taki ’iya’, dan meki a tan iya. Te unu taki ’nôno’, dan meki a tan nôno. Bika ala tra sani di yu o taki e kon fu na ogriwan.”​—Mateyus 5:37