Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 34

Gideon wini den Midiansma

Gideon wini den Midiansma

Baka wan pisi ten, Israel trangayesi Yehovah baka èn den bigin anbegi falsi gado. Seibi yari langa den Midiansma fufuru den meti fu den Israelsma èn den pori den sani di den ben prani. Fu dati ede den Israelsma ben e go kibri na den bergi èn na ini den bergi-olo. Den begi Yehovah fu yepi den. Ne Yehovah seni wan engel go na wan yongu man di nen Gideon. Na engel taki: ’Yu na wan tranga man di abi deki-ati. Yehovah teki yu fu frulusu en pipel.’ Gideon taigi en: ’Fa mi o frulusu Israel? Mi no de noti.’

Fa Gideon ben o sabi taki Yehovah o meki a frulusu en pipel? Gideon poti skapu-wiwiri na tapu a gron, dan a taigi Yehovah: ’Efu dow nati soso a skapu-wiwiri, ma a gron lontu a wiwiri tan drei, dan mi o sabi taki yu o meki mi frulusu Israel.’ A tra mamanten, a skapu-wiwiri ben nati, ma a gron ben drei! Ma now Gideon e aksi taki a tra mamanten dow musu nati a heri gron lontu a skapu-wiwiri, ma a wiwiri musu tan drei. Di Yehovah arki a begi disi tu, Gideon ben de seiker taki Yehovah ben teki en fu frulusu Israel. A teki den srudati fu en fu go feti nanga den Midiansma.

 Yehovah taigi Gideon: ’Mi o meki Israel wini a feti. Ma fu di yu abi so furu srudati, meki yu kan denki taki na yu wini a feti. Taigi ala srudati di frede, taki den kan go na oso.’ Ne 22.000 srudati go na oso èn 10.000 tan abra. Yehovah taigi en: ’Toku den srudati furu tumusi ete. Tyari den go na a watra èn taigi den fu dringi watra. Teki soso den man di e dringi a watra aladi den e luku efu feanti e kon.’ Na 300 man nomo ben du dati. Yehovah pramisi taki a pikin grupu man disi ben o wini den 135.000 srudati fu den Midiansma.

A neti dati Yehovah taigi Gideon: ’Now yu kan go feti nanga den Midiansma!’ Gideon gi ibriwan fu den man wan tutu nanga wan bigi leigi watrakan. Wan frambo ben de na ini ibriwan fu den watrakan. Ne a taigi den: ’Un musu luku san mi e du èn na dati un musu du tu.’ Gideon bro en tutu, a naki a watrakan broko, a grabu a frambo, ne a bari: ’A feti na fu Yehovah nanga Gideon!’ Ala den 300 man du a srefi sani. Den srudati fu Midian kon frede èn den bigin lon bruyabruya. Ne den bigin feti nanga makandra. A leisi disi baka, Yehovah yepi den Israelsma fu wini den feanti.

„A o de krin taki a krakti di bigi pasa marki no e kon fu wisrefi, ma a e kon fu Gado.”​—2 Korentesma 4:7